الەۋمەتتىك ينسپەكتورلار حالىقتىڭ الەۋمەتتىك وسال توپتارىنىڭ قۇقىقتارىن قورعاۋ ماقساتىندا 223-تەن استام تەكسەرۋ جۇرگىزدى
ق ر الەۋمەتتىك كودەكسىنىڭ كۇشىنە ەنۋىمەن بيىلعى 1 شىلدەدە ەلىمىزدە قۇزىرەتىنە مۇگەدەكتىگى بار ادامداردى الەۋمەتتىك قورعاۋ، ارناۋلى الەۋمەتتىك قىزمەتتەر كورسەتۋ جانە الەۋمەتتىك قامسىزداندىرۋ سالاسىنداعى زاڭنامانىڭ ساقتالۋىن باقىلاۋدى جۇزەگە اسىرۋ كىرەتىن مەملەكەتتىك الەۋمەتتىك قورعاۋ ينسپەكتورلارى ينستيتۋتى ەنگىزىلدى. وسى كەزەڭدە الەۋمەتتىك ينسپەكتورلار 233 تەكسەرۋ جۇرگىزىپ، ونىڭ 73ء-ى پروفيلاكتيكالىق باقىلاۋ شەڭبەرىندە، 160-ى جوسپاردان تىس تەكسەرۋلەر بولدى، دەپ حابارلايدى Almaty-akshamy.kz.
مەملەكەتتىك باقىلاۋمەن: 49 مەكتەپ پەن كوللەدج، 36 جەرگىلىكتى اتقارۋشى ورگانداردىڭ وبلىستىق باسقارمالارى جانە اۋداندىق بولىمدەرى، 61 جۇمىسپەن قامتۋ باسقارمالارى مەن بولىمدەرى، 13 دۇكەن، 5 ساۋدا ورتالىعى، 14 مەديسينالىق-الەۋمەتتىك مەكەمە، 20 ەمحانا مەن اۋرۋحانا، 2 بانك بولىمشەسى، 3 قازپوشتا بولىمشەسى، 1 فيتنەس-كلۋب، 1 ۋنيۆەرسيتەت، 4 ساناتوريي، 2 كافە، 2 شاشتاراز جانە ت ب قامتىلدى.
«ماسەلەن، تۇركىستان وبلىسى بويىنشا ەڭبەك جانە الەۋمەتتىك قورعاۋ كوميتەتىنىڭ دەپارتامەنتى كەنتاۋ قالاسى تۇرعىنىنىڭ (1 توپتاعى مۇگەدەكتىگى بار ادام) ءوتىنىشى نەگىزىندە كەنتاۋ گۋمانيتارلىق-تەحنيكالىق كوللەدجىنە جوسپاردان تىس تەكسەرۋ جۇرگىزدى. تەكسەرۋ ناتيجەلەرى بويىنشا لاۋازىمدى ادامعا انىقتالعان زاڭبۇزۋشىلىقتاردى جويۋ تۋرالى نۇسقاما بەرىلدى، سونداي-اق اكىمشىلىك جاۋاپكەرشىلىك شارالارى قابىلداندى»، - دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگىنەن.
الماتى وبلىسى بويىنشا ەڭبەك جانە الەۋمەتتىك قورعاۋ كوميتەتىنىڭ دەپارتامەنتى تالعار قالاسى تۇرعىنىنىڭ ءوتىنىشى نەگىزىندە ءبىرقاتار مەملەكەتتىك مەكەمەلەردە: تالعار قالاسى اكىمىنىڭ اپپاراتىندا، تالعار اۋدانى بويىنشا مەملەكەتتىك كىرىستەر باسقارماسىندا، تالعار اۋداندىق پوليسيا باسقارماسىندا، تالعار اۋداندىق ورتالىق اۋرۋحاناسىندا، «AMANAT» پارتياسى تالعار اۋداندىق فيليالىندا جانە تالعار اۋداندىق ەلەكتر جەلىلەرى «الاتاۋ جارىق كومپانياسى» اق-دا جوسپاردان تىس تەكسەرۋلەر جۇرگىزدى.
تەكسەرۋ ناتيجەلەرى بويىنشا جەكە كاسىپكەرگە انىقتالعان زاڭبۇزۋشىلىقتاردى جويۋ تۋرالى نۇسقاما بەرىلدى جانە اكىمشىلىك جاۋاپكەرشىلىككە تارتىلدى.
«سونىمەن قاتار مەملەكەتتىك الەۋمەتتىك ينسپەكتورلار ينستيتۋتى ەنگىزىلگەنگە دەيىن ق ر ەحاقم ەڭبەك جانە الەۋمەتتىك قورعاۋ كوميتەتىنىڭ اۋماقتىق دەپارتامەنتتەرى 2023 جىلدىڭ 1 جارتىجىلدىعىندا 750 تەكسەرۋ جۇرگىزدى، انىقتالعان زاڭبۇزۋشىلىقتاردى جويۋ تۋرالى 533 ۇيعارىم بەرىلدى، 44 ملن تەڭگەدەن استام سوماعا 233 ايىپپۇل سالىندى»، - دەدى ۆەدومستۆو وكىلدەرى.
2023 جىلدىڭ 1 شىلدەسىنەن باستاپ الەۋمەتتىك ينسپەكتورلاردى ەنگىزۋ حالىقتىڭ الەۋمەتتىك وسال ساناتتارىنىڭ قۇقىقتارىن ۋاقتىلى قورعاپ قانا قويماي، مۇگەدەكتىگى بار ادامداردىڭ ءومىر ءسۇرۋ ساپاسىن ارتتىرۋعا دا ىقپال ەتپەك.