مەملەكەتتىڭ قولداۋىمەن جەتىسۋ وڭىرىندە كاسىپكەرلەر سانى ارتىپ كەلەدى

ولار قايتارىمسىز نەسيە الىپ، ءوز بيزنەسىن باستاعان.

الماتى وبلىسىنىڭ تۇرعىندارى ءوز كاسىبىن باستاپ، دامىتۋ ءۇشىن ارنايى كۋرستاردان ءبىلىم الىپ، مەملەكەتتىك قولداۋعا يە بولىپ وتىر، دەپ حابارلايدى Almaty-akshamy.kz.

ءوز كاسىبىن باستاعاندار قاتارىندا قاراساي اۋدانىنىڭ تۇرعىنى عاليا قوجامبەرگەنوۆا دا بار. ماماندىعى بويىنشا ينجەنەر-قۇرىلىسشى بولسا دا، تىگىن ىسىنە قىزىعۋشىلىق تانىتىپ، سۇيىكتى ىسىنە اينالدىردى. مەملەكەتتىك باعدارلاما اياسىندا قايتارىمسىز نەسيە الىپ، ءوزىنىڭ تىگىن سەحىن اشتى. وبلىس بويىنشا «ەڭبەك» باعدارلاماسى اياسىندا مىڭنان اسا بيزنەس جوبا قايتارىمسىز گرانت نەمەسە جەڭىلدەتىلگەن نەسيە العان.

«كاسىپكەرلەر پالاتاسى قاراساي اۋداندىق فيليالى ديرەكتورى ورىنباي ءجانادىلدىڭ بەرگەن مالىمەتىنە سۇيەنسەك، بيىلعى جىلى قاراساي اۋدانىندا «باستاۋ بيزنەس» جوباسى بويىنشا 484 اۋدان تۇرعىنى وقىپ، ونىڭ ىشىنەن 70 بيزنەس-جوبا قارجىلاندىرىلدى»،– دەلىنگەن الماتى وبلىسىنىڭ اكىمدىگى باسپا ءسوز قىزمەتىنىڭ حابارلاماسىندا. 

ايتا كەتەرلىگى، الماتى وبلىسىندا جىل باسىنان بەرى ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ مەملەكەتتىك «ەڭبەك» باعدارلاماسى اياسىندا 2895 جۇمىسسىز جاس «باستاۋ بيزنەس» جوباسى بويىنشا كاسىپكەرلىك نەگىزدەرىن وقىدى. وتكەن جانە بيىلعى جىلدىڭ كۋرس تىڭداۋشىلارىن قوسا العاندا، 1050 بيزنەس-جوبا گرانتپەن قارجىلاندىرىلىپ، جەڭىلدەتىلگەن نەسيە الدى.