بيىل 29 تامىزدا دۇنيە جۇزىندەگى ەڭ ءىرى يادرولىق سىناق الاڭدارىنىڭ ءبىرى – سەمەي پوليگونىنىڭ جابىلعانىنا 30 جىل تولادى.
وسىعان بايلانىستى قازاقستان جۋرناليستەر وداعىنىڭ عيماراتىندا «جەر-اناعا تاعزىم ەت!» اتتى باسپا ءسوز كونفەرەنسياسى ءوتتى.
بۇل ايتۋلى كۇندى ايتقاندا، يادرولىق جارىلىسقا قارسى حالىقارالىق قوزعالىس - قوعامدىق-ساياسي ۇيىم – «نيەۆادا-سەمەي» قوزعالىسى قاتار اتالادى. حالىقارالىق قوزعالىستىڭ باستاۋىندا اتى الەمگە ايگىلى اقىن، قازاقستاننىڭ حالىق جازۋشىسى، ۇيىم جەتەكشىسى ولجاس سۇلەيمەنوۆتىڭ تۇرعانى ءمالىم. جيىنعا ولجاس ومار ۇلىنىڭ ءوزى قاتىسىپ، انتيادرولىق قوزعالىسىنىڭ قۇرىلۋ سەبەبىن، پوليگونداعى سىناقتاردى توقتاتۋ ءۇشىن ۇيىمنىڭ مۇشەلەرى وتكىزگەن ءتۇرلى شارالار تۋرالى ايتىپ بەردى.
سەمەي ايماعىنا عانا ەمەس، بۇكىل قازاق دالاسىنا الاپات قاسىرەت الىپ كەلگەن سىناق ايماعىندا 1949-1989 جىلدارى 470-تەي يادرولىق جارىلىس جاسالىپ، ونىڭ 90-ى اۋەدە، 26-سى جەر استىندا جۇرگىزىلگەن. سەمەي پوليگونىنىڭ جابىلعانىنا 30 جىل وتسە دە، ونىڭ زاردابى تولىق جويىلعان جوق.
ولجاس سۇلەيمەنوۆ، «نيەۆادا-سەمەي» قوزعالىسىنىڭ جەتەكشىسى، اقىن، قازاقستاننىڭ حالىق جازۋشىسى:
الەم بويىنشا يادرولىق قارۋدان باس تارتقان تۇڭعىش مەملەكەت – قازاقستان. 1989 جىلى اقپان ايىندا سەمەي پوليگونىن جابۋ تۋرالى «نيەۆادا-سەمەي» قوزعالىسىنىڭ العاشقى ميتينگى ءوتتى. قازاقستانداعى يادرولىق پوليگوندى جابۋ ءۇشىن الاڭعا مىڭداعان ادام جينالدى. سىناق پوليگونىنىڭ قاۋىپ-قاتەرى تۋرالى جازۋشىلار، بۇقارالىق اقپارات قۇرالدارى اشىق اقپارات بەرە باستادى. ءدال وسى كۇنى «نيەۆادا-سەمەي» يادرولىق سىناققا قارسى قوزعالىسى قۇرىلدى. بۇل حالىقارالىق شەشىم ەدى. كەڭەس وداعى ءومىر سۇرگەن كەزدىڭ وزىندە «نيەۆادا-سەمەي» تۋرالى حابارلار بۇكىل الەمدى ءدۇر سىلكىندىردى. پوليگونعا جاقىن وبلىستاردان كەلگەن ەكى ميلليوننان استام قازاقستاندىقتار «پوليگون جويىلسىن!» ۇندەۋىنە قول قويدى. وسىلايشا ءبىز يادرولىق جارىلىستى بىرگە توقتاتتىق. سوڭعى جارىلىس 1989 جىلدىڭ 19 قازانىندا بولدى. بۇل كەز قوزعالىس قۇرىلعانىنا جارتى جىل ۋاقىت وتكەن ەدى. 1989 جىلى 20 قاراشادا كەڭەستەر وداعىنىڭ جوعارعى كەڭەسى سەمەي پوليگونىن جابۋ تۋرالى قاۋلى قابىلدادى. 1991 جىلى قازاق رەسپۋبليكاسىنىڭ ۇكىمەتى سەمەي پوليگونىن جابۋ تۋرالى شەشىم قابىلدادى.
جيىن بارىسىندا وسى تاقىرىپ بويىنشا ەلەۋلى ەڭبەك سىڭىرگەن ب ا ق وكىلدەرى ەستەلىك مەدالدارمەن ماراپاتتالدى. باسپا ءسوز كونفەرەنسياسىنان كەيىن «Alatay aqparat» ج ش س باستاعان «اعاشتاردى ايالايىق!» چەلەندجىن ارى قاراي جالعاستىرۋ ماقساتىندا قازاقستان جۋرناليستەر وداعى باسقارماسىنىڭ ءتوراعاسى سەيىتقازى ماتايەۆ چەللەندجدى ولجاس سۇلەيمەنوۆكە تابىستادى. ولجاس ومار ۇلى عيمارات الدىنداعى اعاشتارعا سۋ قۇيدى.