مەملەكەتتىك ءتىلدى بىلمەيتىن مينيستر كىم؟

19 ءمينيستردىڭ 2ء-ى مەملەكەتتىك ءتىلدى بىلمەيدى ەكەن.

ال 7ء-ى اعىلشىن ءتىلىن مەڭگەرمەگەن، دەپ حابارلايدى Almaty-akshamy.kz Ranking.kz-كە سىلتەمە جاساپ.

ءقازىر قازاقستاندا 19 مينيسترلىك بار.  Ranking.kz زەرتتەۋ جۇرگىزىپ، ءتىل مەڭگەرۋ دەڭگەيى بويىنشا قازاقستان مينيسترلەرىنىڭ رەيتينگىن جاسادى.

بيىل بۇل تىزىمدە عىلىم جانە جوعارى ءبىلىم ءمينيسترى ساياسات نۇربەك كوش باستادى. مينيستر جەتى تىلدە – قازاق، ورىس، اعىلشىن، يتاليان، تۇرىك، جاپون جانە لاتىن تىلدەرىندە سويلەيدى.

ەكىنشى ورىندى سىرتقى ىستەر ءمينيسترى مۇحتار تىلەۋبەردى مەن ۇلتتىق ەكونوميكا ءمينيسترى الىبەك قۋانتىروۆ يەلەندى: ءارقايسىسى بەس ءتىل بىلەدى.

ۇزدىك ۇشتىكتى ق ر اقپارات جانە الەۋمەتتىك دامۋ ءمينيسترى دارحان ءقىدىرالى، سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين جانە ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا قورىتىندىلادى: ءارقايسىسى ءتورت تىلدە سويلەيدى.

ايتا كەتەتىنى، ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ءتورت ءتىلدى مەڭگەرگەنىمەن، ولاردىڭ اراسىندا قازاق ءتىلى جوق.

توتەنشە جاعدايلار ءمينيسترى يۋريي يلين دە مەملەكەتتىك ءتىلدى بىلمەيدى.

قازاقستاندىق 19 ءمينيستردىڭ 12ء-سى اعىلشىن ءتىلىن مەڭگەرگەن. جالپى، ەلىمىزدە بۇل ءتىلدى مەڭگەرۋ دەڭگەيى وتە تومەن.

ماسەلەن، EF EPI 2021 رەيتينگىندە قازاقستان ءتىزىمنىڭ سوڭىندا دەرلىك تۇر. الەمدەگى 112 ەلدىڭ ىشىندە 96-شى ورىندا. وسىلايشا قازاقستان اعىلشىن ءتىلىن وتە تومەن دەڭگەيدە مەڭگەرگەن ەلدەر قاتارىنا جاتقىزىلدى. يندەكس 426 بولدى.