باقىتجان بايقاداموۆ اتىنداعى مەملەكەتتىك حور كاپەللاسى 1935 جىلى دميتريي ماسۋسيننىڭ باسقارۋىمەن جامبىل اتىنداعى قازاق مەملەكەتتىك اكادەميالىق فيلارمونياسى قابىرعاسىندا شاعىن حور بولىپ قۇرىلدى. العاشقى كەزەڭدە حور ۇجىمىنا 1959 جىلدان 1991 جىلعا دەيىن كسرو حالىق ءارتىسى اناتوليي ۆاسيليەۆيچ مولودوۆ باسقاردى. وسى جىلدار اراسىندا كاپەللانىڭ ەلىمىزدە حور جانرىنىڭ دامۋ جولىندا اتقارعان قىزمەتى ەسكەرىلىپ، 1967 جىلى «قازاقستاننىڭ ەڭبەك سىڭىرگەن ۇجىمى» اتاعىن يەلەندى.
بيىل ب.بايقاداموۆ اتىنداعى مەملەكەتتىك حور كاپەللاسىندا ۇزاق جىلدار بويى ەڭبەك ەتىپ، ەلىمىزدە حور ونەرىنىڭ دامۋى جولىندا ءوزىنىڭ زور ۇلەسىن قوسقان كسرو حالىق ءارتىسى، مەملەكەتتىك سىيلىقتىڭ لاۋرەاتى، پروفەسسور اناتوليي مولودوۆتىڭ 95 جىلدىعىنا ارنالىپ، جامبىل اتىنداعى فيلارمونياسىنىڭ ۇلكەن زالىندا كونسەرت-فەستيۆال ءوتتى. كەشتە مەملەكەتتىك حور كاپەللاسىمەن بىرگە استانا قالاسىنان كەلگەن ە.راحمادييەۆ اتىنداعى مەملەكەتتىك اكادەميالىق فيلارمونياسىنىڭ كامەرالىق حورى، قۇرمانعازى اتىنداعى قۇك ارالاس حورى، قالامىزدىڭ №79 مەكتەپ گيمنازياسىنان كەلگەن “بايتەرەك” بالالار حورى ونەر كورسەتتى.
كەش بارىسىندا اناتوليي مولودوۆتىڭ شاكىرتتەرى بولعان، بۇگىندە اتالعان حور ۇجىمدارىنىڭ كوركەمدىك جەتەكشىسى ءارى باس ديريجەرى – ەلەنا بايىسبايەۆا، قازاقستاننىڭ ەڭبەك سىڭىرگەن قايراتكەرلەرى - يان رۋدكوۆسكيي، گۋلميرا قۇتتىباداموۆا، بەيىمبەت دەمەۋوۆ ۇستازدارىنىڭ حور ونەرى جولىنداعى ەڭبەگى تۋرالى ەستەلىك اڭگىمەلەرىمەن ءبولىستى.
قازاقستاننىڭ ەڭبەك سىڭىرگەن قايراتكەرى - گۇلميرا قۇتتىباداموۆا:
-«اناتوليي ۆاسيليەۆيچ - قازاق حور ونەرىن جاڭا ساپالىق كەزەڭگە شىعارعان العاشقى حور ديريجەرى بولدى دەسەم ارتىق ايتقانىم ەمەس. ال، ونىڭ شاكىرت تاربيەلەۋ تەحنيكاسى جادىمىزدا. ۆوكالدىق جانە حور مادەنيەتىن مەڭگەرۋ بويىنشا سولفەدجيو ساباقتارى كاپەللادا كۇندەلىكتى وتەتىن. سونىڭ ارقاسىندا كاپەللا ۇلكەن ۇجىم بولىپ قالىپتاستى. قازاقستان كومپوزيتورلارىنىڭ حور ونەرىندەگى ناعىز شىعارماشىلىق زەرتحاناسى بولىپ قالىپتاسقان حور كاپەللاسى - كانتاتالاردىڭ، وراتوريالاردىڭ، حور سيۋيتالارى مەن مينياتيۋرالارىنىڭ تۇڭعىش ورىنداۋشىسى، رەسپۋبليكادا عانا ەمەس، بۇكىل كەڭەس وداعىندا مويىندالعان ۇجىم. قازاق ونەرىنىڭ تاريحي كەزەڭىندەگى مولودوۆتىڭ ەسىمى اتالعان بارلىق وقيعالار، اتقارىلعان ەڭبەكتەر قازاقستاننىڭ حور ونەرىنىڭ دامۋ ساتىسىنداعى ءساتتى كورىنىسى ەتىپ بەينەلەنەدى. ونىڭ جەتەكشىلىگىمەن مەملەكەتتىك حور كاپەللاسى رەسپۋبليكانىڭ ەڭبەك سىڭىرگەن ءانسامبلى اتاعىن الدى».
كونسەرت باعدارلاماسىندا ا.مولودوۆتىڭ حورعا وڭدەگەن «قوس القا»، «قارلىعاش» ، «شولپان»، «ارىس جاعاسىندا» اتتى ۇزدىك شىعارمالارى ورىندالدى. كەش سوڭىندا فەستيۆالدە ونەر كورسەتكەن ۇجىمدارعا جامبىل اتىنداعى فيلارمونياسىنىڭ اكىمشىلىگى اتىنان ريزاشىلىق ءبىلدىرىلىپ، ارنايى العىس حات تابىس ەتتى. 95 جىلمەن قۇتتىقتاپ كەلگەن تىڭدارمان حور ۇجىمىنا ءوز ريزاشىلىقتارىن ءبىلدىرىپ، ىستىق قوشەمەتكە بولەدى.