پرەزيدەنت تاپسىرمالارىنىڭ ورىندالۋ بارىسى باقىلاۋدا
مەملەكەتتىك ساتىپ الۋ سالاسىنا قوعامدىق باقىلاۋ جۇرگىزۋ بارىسىندا بىرنەشە زاڭبۇزۋشىلىق انىقتالىپ، ناتيجەسىندە 40 حاتتاما تولتىرىلدى. سونىمەن قاتار 12 قىلمىستىق ءىس قوزعالدى. بۇل تۋرالى «ەل نامىسى» ارنايى مونيتورينگىلىك توبىنىڭ مۇشەسى ديدار سماعۇلوۆ ءمالىم ەتتى، دەپ حابارلايدى قازاقپارات-قا سىلتەمە جاساپ.
«ءبىزدىڭ قوعامدىق ۇيىم جۇمىسىن باستاعالى ەلىمىزدە 13،5 مىڭنان استام ازاماتتىڭ قاتىسۋىمەن 500-دەن استام كەزدەسۋ ءوتتى. ونىڭ ىشىندە 615 ازاماتتىڭ ماسەلەسى جەكە قارالدى. ءار ازاماتتىڭ ءوتىنىشى مەن ماسەلەسىنە ءتيىستى كەڭەس بەرىلىپ، قۇزىرلى ورگاندارعا حات جولداندى. كەيبىر جايتتار سول جەردە شەشىمىن تاۋىپ جاتتى. ءقازىر قولىمىزدا بار مالىمەتكە سايكەس، شەنەۋنىكتەرگە قاتىستى 145 اكىمشىلىك جاۋاپقا تارتۋ حاتتاماسى تولتىرىلدى. سالىنعان جالپى ايىپپۇل كولەمى 40 ملن تەڭگەدەن اسادى. زاڭبۇزۋشىلىققا كەلسەك، جاۋاپقا تارتىلعان شەنەۋنىكتەر نەمەسە مەملەكەتتىك قىزمەتكەرلەردىڭ جارتىسى نەگىزگى جۇمىسىنان بولەك، كاسىپكەرلىكپەن اينالىسقان»، - دەدى ديدار سماعۇلوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
مونيتورينگىلىك توپ مۇشەسىنىڭ مالىمەتىنشە، قوعامدىق باقىلاۋ بارىسىندا مەملەكەتتىك ساتىپ الۋ سالاسىندا دا زاڭبۇزۋشىلىقتار انىقتالدى.
«جوعارىدا اتالعان 145 حاتتامانىڭ 40-ى — مەملەكەتتىك ساتىپ الۋعا قاتىستى. ناتيجەسىندە 16 ملرد تەڭگەدەن استام سوماعا مەملەكەتتىك ساتىپ الۋ باعاسىن قولدان ءوسىرۋ جايتى انىقتالىپ، 12 قىلمىستىق ءىس قوزعالدى. مىسالى، اقتوبە قالاسىنداعى سپورت مەكتەبى ديرەكتورىنىڭ ورىنباسارى نەگىزگى جۇمىسىنان بولەك جەكە كاسىپكەر رەتىندە مەملەكەتتىك ساتىپ الۋمەن اينالىسقان. ءسويتىپ، باسقا سپورتتىق مەكتەپتەرگە قىزمەتىن ۇسىنىپ كەلگەن. ناتيجەسىندە ايىپتىنىڭ زاڭسىز تابىسى تاركىلەنىپ، وعان 428 مىڭ تەڭگە ايىپپۇل سالىندى. سونىمەن قوسا اتالعان ازامات مەملەكەتتىك ساتىپ الۋمەن قاتار، جەتكىزۋشى ءرولىن دە اتقارعان»، - دەيدى ول.
ايتا كەتەيىك، بيىل جىل باسىندا ەلىمىزدە «ەل نامىسى» اتتى ارنايى مونيتورينگىلىك توپ قۇرىلدى. اتالعان قوعامدىق ۇيىمنىڭ ماقساتى – پرەزيدەنت تاپسىرمالارىنىڭ ورىندالۋ بارىسىن باقىلاۋ.