مەملەكەتتىك قىزمەتشىلەرگە قوسىمشا جۇمىس ىستەۋگە رۇقسات بەرىلەدى

ءبىراق قوسىمشا جۇمىس كاسىپكەرلىكپەن بايلانىستى بولماۋى كەرەك

قازاقستاندا مەملەكەتتىك قىزمەتكەرلەرگە جۇمىستان تىس ۋاقىتتا قوسىمشا تابىس تابۋعا زاڭ جۇزىندە رۇقسات بەرۋ مۇمكىندىگى قاراستىرىلۋدا. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ق ر مەملەكەتتىك قىزمەت ىستەرى اگەنتتىگىنىڭ ءتوراعاسى انار جايىلعانوۆا ءمالىم ەتتى، دەپ حابارلايدى Almaty-akshamy.kz 

«بۇگىنگى تاڭدا زاڭنامادا مەملەكەتتىك قىزمەتكەرلەرگە قوسىمشا جۇمىسپەن اينالىسۋعا رۇقسات بەرەتىن نورما جوق. ءبىراق ءبىز زاڭعا بوس ۋاقىتتا قوسىمشا جۇمىسپەن اينالىسۋ مۇمكىندىگىن قاراستىرۋ  جونىندە وزگەرىستەر ەنگىزۋ تۋرالى ويلاپ وتىرمىز»، - دەدى انار جايىلعانوۆا.

ونىڭ پىكىرىنشە، مەملەكەتتىك قىزمەتكەرلەر كاسىپكەرلىككە جاتپايتىن قىزمەتتىڭ باسقا تۇرلەرىمەن اينالىسۋ ارقىلى جۇمىستان تىس ۋاقىتتا تابىس الا الادى. الايدا، سپيكەر تۇسىندىرگەندەي، جۇمىس كاسىپكەرلىكپەن بايلانىستى بولماۋى كەرەك. 

«ءبىز وتباسىن اسىراۋعا قوسىمشا قاراجات قاجەت بولعان جاعدايدا (قوسىمشا جۇمىس ىستەۋگە) مۇمكىندىك بەرەتىن زاڭنامالىق وزگەرىستەردى دايىنداپ جاتىرمىز. ءبىراق ول ءالى قابىلدانعان جوق. ال كاسىپكەرلىكپەن اينالىسۋعا بولمايدى»، - دەدى انار جايىلعانوۆا.