«اينابۇلاق» سپورت كەشەنىندە الماتى قالاسىنىڭ اكىمشىلىك جانە مەملەكەتتىك قىزمەتشىلەرى اراسىندا ۇلتتىق سپورت تۇرلەرى بويىنشا سپارتاكيادا ءوتتى.
قازاقستان رەسپۋبليكاسىنىڭ مەملەكەتتىك قىزمەتشىلەر كۇنىنە ورايلاستىرىلعان ءىس-شارادا اكىمدىك باسقارمالارى، دەپارتامەنتتەر بولىمشەلەرى اراسىنان شىققان سپورتشىلار ءوزارا كۇش سىناستى.
بۇل سايىستا نەگىزىنەن قازاقتىڭ ۇلتتىق سپورت ويىندارى باستى نازارعا الىندى. دالىرەك ايتقاندا قازاق كۇرەسى، ارقان تارتۋ، توعىزقۇمالاق، ارمرەسلينگ، گىر سپورتى بويىنشا جارىسقا ءتۇستى.
سپارتاكيادانىڭ ماقساتى – مەملەكەتتىك قىزمەتكەرلەر اراسىندا سالاۋاتتى ءومىر سالتىن قالىپتاستىرۋ. سونداي-اق ۇلتتىق سپورت ويىندارىنىڭ مەرەيىن اسىرۋ، ۇلىقتاۋ، وسكەلەڭ جاس ۇرپاقتىڭ الدىندا ۇلتتىق رۋحانياتىمىزدى دارىپتەۋ بولىپ ەسەپتەلەدى.
«ارنايى مەرەكە اياسىندا الماتى قالاسىنىڭ مەملەكەتتىك قىزمەتشىلەرىنىڭ باسىن قوسىپ ۇيىمداستىردى. بۇل سپورتتىق ءىس-شارادا ەرەكشەلىك بار. ياعني، قۇقىق قورعاۋ ورگاندارىنىڭ قىزمەتكەرلەرى قاتىستىرىلمادى. ويتكەنى، سپورت ولاردىڭ كۇندەلىكتى اينالىسىپ جۇرگەن ەتەنە جاقىن سالاسى بولىپ ەسەپتەلەدى. بۇل ادىلدىك بولدى. ولارعا ءوزارا جەكە ۇيىمداستىرىلىپ قالار. وسىلايشا اكىمشىلىك قىزمەتتەر باعىتىنداعىلار عانا سايىستى»، - دەدى الماتى قالاسى بويىنشا مەملەكەتتىك قىزمەتتەر ىستەرى اگەنتتىگىنىڭ وكىلى ماقسات جاڭبىرشييەۆ.
سپارتاكيادانىڭ ءادىل ءوتۋى جانە ءادىل باعالانۋى تەك قانا تورەشىلەر قولىندا. جارىستىڭ باستالار ساتىندە تورەشىلەر قاۋىمى ءادىلقازى القاسى بولۋعا، ادال باسەكە ۇيىمداستىرۋعا سەرت بەردى.
«بۇل سايىستىڭ مەرەيى ۇستەم. ۇلتتىق سپورت تۇرلەرى بويىنشا جارىستار قامتىلعان. ناقتىراق ارقان تارتىس، قازاق كۇرەسى، اسىق اتۋ، توعىزقۇمالاق، گىر تاسىن كوتەرۋ جانە ت.ب. ۇتقان قۇراماعا الماتى قالالىق سپورت باسقارماسى تاعايىنداعان مەدال، گراموتا، باعالى سىيلىقتار تابىستالدى»، - دەدى قازاق كۇرەسىنەن جوعارى ۇلتتىق دارەجەدەگى تورەشى بولاتبەك يبراگيموۆ.