مەملەكەتتىك قىزمەتشىلەر استانادان اۋىلعا جىبەرىلەدى

سەنات بۇل تۋرالى زاڭدى ماقۇلدادى.

سەناتورلار مەملەكەتتىك قىزمەتشىلەردىڭ روتاسياسىن ەنگىزۋ جۇيەسىن ماقۇلدادى، دەپ حابارلايدى Almaty-akshamy.kz

جوعارى پالاتا سپيكەرى ماۋلەن اشىمبايەۆتىڭ ايتۋىنشا، زاڭمەن ورتالىق پەن وڭىرلەر اراسىندا كادرلىق روتاسيا جۇرگىزۋ شارالارى بەكىتىلىپ وتىر.

"بۇگىندە مينيسترلىكتەردەگى كوپ ازامات وڭىرلەردە جۇمىس ىستەمەگەن، تاجىريبەسى جوق. وڭىرلەردە نە بولىپ جاتقانىن بىلە بەرمەيدى. ال مينيسترلىكتەردە قابىلداناتىن بارلىق شەشىم وڭىرلەردىڭ مۇددەسىن، وڭىرلەردىڭ جاعدايىن ەسكەرىپ، قابىلدانۋى كەرەك. وسى ماقساتتا روتاسيا مەحانيزمى جۇمىس ىستەيدى دەپ سەنەمىز"، - دەيدى اشىمبايەۆ.

سپيكەر وڭىرلەر اراسىنداعى روتاسيانى دا قامتۋ كەرەكتىگىن ەرەكشە اتاپ ءوتتى.

"مىسالى، باتىستىڭ ازاماتتارى شىعىسقا بارىپ جۇمىس ىستەيتىندەي مۇمكىندىك بولۋى كەرەك. سولتۇستىكتەگى ازاماتتار وڭتۇستىككە بارسىن. سوعان جاعداي جاساۋىمىز قاجەت. بۇل ەلىمىزدى ءبىرتۇتاس مەملەكەت رەتىندە دامىتۋعا ءوز ۇلەسىن قوساتىن قادام ەكەنى ءسوزسىز"، - دەپ اتاپ ءوتتى اشىمبايەۆ.

ايتا كەتەرى، مەملەكەتتىك قىزمەتشىلەردى روتاسيالاۋ كەزىندە تۇرعىن ءۇيدى جالداۋ ماقساتىندا روتاسيالىق تولەمدەر بەرىلەدى دەگەن جوسپار بار.