ايىرقالپاق باۋىرلار قىرعىز ءتىلىنىڭ مارتەبەسىن كوتەرمەك.
قىرعىز رەسپۋبليكاسىنىڭ پرەزيدەنتى سادىر جاپاروۆ «قىرعىز رەسپۋبليكاسىنىڭ مەملەكەتتىك ءتىلى تۋرالى» قىرعىز رەسپۋبليكاسىنىڭ كونستيتۋسيالىق زاڭىنا قول قويدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
زاڭ قىرعىز رەسپۋبليكاسىنىڭ جوعارعى كەڭەسىمەن 2023 جىلعى 31 مامىردا قابىلداندى.
«قىرعىز رەسپۋبليكاسىنىڭ مەملەكەتتىك ءتىلى تۋرالى» قىرعىز رەسپۋبليكاسىنىڭ كونستيتۋسيالىق زاڭى قىرعىز رەسپۋبليكاسى كونستيتۋسياسىنىڭ 13-بابىن ىسكە اسىرۋ ماقساتىندا قابىلداندى، وعان سايكەس قىرعىز ءتىلى — قىرعىز رەسپۋبليكاسىنىڭ مەملەكەتتىك ءتىلى جانە مەملەكەتتىك ءتىلدى قولدانۋ ءتارتىبى كونستيتۋسيالىق زاڭمەن ايقىندالادى»، دەلىنگەن قىرعىزستان پرەزيدەنتىنىڭ رەسمي حابارلاماسىندا.
مەملەكەتتىك ءتىل تۋرالى جاڭا زاڭناما قىرعىز رەسپۋبليكاسىنىڭ ازاماتتارىنا، قىرعىز رەسپۋبليكاسىندا تۇراقتى تۇراتىن شەتەل ازاماتتارىنا جانە ازاماتتىعى جوق ادامدارعا — بارلىعىنا بىردەي قولدانىلادى.
قىرعىز ءتىلى مىندەتتى تۇردە قولدانىلاتىن سالالار دا بەكىتىلدى:
- مەملەكەتتىك ورگانداردىڭ، جەرگىلىكتى ءوزىن-وزى باسقارۋ ورگاندارىنىڭ، كاسىپورىنداردىڭ، مەكەمەلەردىڭ جانە بارلىق مەنشىك نىسانىنداعى ۇيىمداردىڭ قىزمەتىندە؛
- سايلاۋ مەن رەفەرەندۋمداردى دايىنداۋ جانە وتكىزۋ پروسەسىندە؛
- سوت ءىسىن جۇرگىزۋدە، قارۋلى كۇشتەردە، قىرعىز رەسپۋبليكاسىنىڭ قۇقىق قورعاۋ ورگاندارىندا؛
- قىرعىز رەسپۋبليكاسى قاتىسۋشىسى بولىپ تابىلاتىن حالىقارالىق شارتتاردى جاساسۋ كەزىندە جانە ت.ب.
سونىمەن قاتار 32-باپتا مەملەكەتتىك ءتىلدى مەڭگەرۋگە جانە ونى قىزمەتتىك مىندەتتەرىن اتقارۋ كەزىندە پايدالانۋعا مىندەتتى ادامداردىڭ تىزبەسى ايقىندالعان. ولاردىڭ قاتارىنا مەملەكەتتىك جانە مۋنيسيپالدى قىزمەتكەرلەر، قىرعىز رەسپۋبليكاسىنىڭ جوگوركۋ كەنەش دەپۋتاتتارى، جەرگىلىكتى كەنەش دەپۋتاتتارى، قىرعىز رەسپۋبليكاسى ۇلتتىق بانكىنىڭ قىزمەتشىلەرى، ىشكى ىستەر ورگاندارى مەن باسقا دا قۇقىق قورعاۋ ورگاندارىنىڭ وفيسەرلىك جانە باسشى (ورتا جانە جوعارى) قۇرامىنىڭ ادامدارى، سوت تورەشىلەرى، پروكۋرورلار، قورعاۋشىلار، نوتاريۋستار جانە ت.ب. جاتادى.