بۇل تۋرالى پرەزيدەنت قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسىندا ايتتى.
«ينۆەستورلارعا، مىسالى، 50 ميلليون دوللاردان كوپ قارجى سالۋعا دايىن ءىرى كومپانيالارعا «ءبىر تەرەزە» قاعيداسىمەن جان-جاقتى قولداۋ كورسەتكەن ءجون. سونىمەن قاتار، جوبالاردىڭ ىسكە اسىرىلۋىن قاداعالايتىن ءتيىمدى مونيتورينگ جۇيەسىن ىسكە قوسۋ كەرەك. مەملەكەتتىك ورگاندار پايداسى جوق پرەزەنتاسيالار مەن ءىس-شارالار وتكىزۋمەن اۋەستەنبەۋگە ءتيىس»، - دەدى مەملەكەت باسشىسى.
پرەزيدەنت مەكەمە باسشىلارىنىڭ شەتەلگە جاساعان ءاربىر ءىسساپارى ناقتى ناتيجە بەرۋى كەرەگىن اتاپ ءوتتى. ساپار قورىتىندىسى بويىنشا ۇكىمەت باسشىلىعىنا نەمەسە قاجەت بولعان جاعدايدا پرەزيدەنتكە ەسەپ بەرىلۋى كەرەك.
«ينۆەستيسيالىق جوبالاردى ىسكە اسىرۋعا قاتىستى كەدەرگىلەر اسىرەسە، ايماقتاردا ءجيى بولىپ تۇرادى. اكىمدەر ينۆەستيسيا تارتۋدىڭ ورنىنا ەسكى ادەتكە سالىپ، بيۋدجەت قاراجاتىنا سەنىپ وتىرادى. ال، ايماقتارعا بارىپ، جۇمىس ىستەگىسى كەلەتىن ينۆەستور كوپتەگەن توسقاۋىلعا تاپ بولادى. جەرگىلىكتى بيلىك كوپ جاعدايدا ەشقانداي ارەكەت جاسامايدى نە بولماسا ينۆەستوردى اۋرە-سارساڭعا سالادى. سونىڭ كەسىرىنەن كاسىپكەر جوباسىن كەيىنگە شەگەرەدى نەمەسە ءبىرجولا توقتاتۋعا ءماجبۇر بولادى»، - دەيدى پرەزيدەنت.
ايماققا جەكە ينۆەستيسيا تارتۋ اكىمدەردىڭ ەڭ باستى مىندەتىنىڭ ءبىرى بولۋى كەرەك.
«جالپى، بارلىق مەملەكەتتىك ورگان ەل ەكونوميكاسىنا مەيلىنشە كوبىرەك ينۆەستيسيا تارتۋعا باسا ءمان بەرۋگە ءتيىس. بۇل – نەگىزگى باسىمدىق، ولاردىڭ جۇمىسى دا سوعان سايكەس باعالانۋى كەرەك. ماسەلە شتات سانىن كوبەيتىپ، جۇمىس توبىن قۇرىپ، جاڭا تۇجىرىمداما جازۋدا ەمەس. بۇل، ەڭ الدىمەن، مەملەكەتتىك اپپاراتتىڭ جۇمىس ىستەۋ ءتاسىلىن وزگەرتەتىن ناقتى رەفورما. سونى دۇرىس ءتۇسىنۋ قاجەت. ءبىز جارتى جىلدىڭ ناتيجەسى بويىنشا ينۆەستيسيالىق شتابتىڭ جۇمىسىن قورىتىندىلايمىز. ءاربىر مينيستر مەن اكىمنىڭ وسى باعىتتا اتقارعان جۇمىسىنا ناقتى باعا بەرەمىز. تالاپ قاتاڭ بولادى»، - دەپ ەسكەرتتى قاسىم-جومارت توقايەۆ.