الەۋمەتتىك سالاعا ايرىقشا نازار اۋدارعان ءجون.
ەلدىڭ ءاربىر بەسىنشى تۇرعىنى الەۋمەتتىك كومەك الادى – جۇيەنى قايتا قاراۋ قاجەت. بۇل تۋرالى پرەزيدەنت قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا ايتتى.
«رەفورما جۇرگىزگەن كەزدە الەۋمەتتىك كومەكتىڭ كىمگە جانە قالاي بەرىلەتىنىن تۇگەل قايتا قاراۋ قاجەت. ياعني، بولىنگەن قارجىنى بارىنشا ءتيىمدى جۇمساپ، ونى شىن مانىندە كومەككە مۇقتاج ادامعا بەرۋ كەرەك. قازىرگى تاڭدا ءتورت جارىم ميلليونعا جۋىق ادام مەملەكەتتەن الەۋمەتتىك كومەك الادى. بۇل – شامامەن ەلىمىزدىڭ ءاربىر بەسىنشى تۇرعىنى دەگەن ءسوز. باسىم كوپشىلىگى – ەڭبەككە جارامدى ازاماتتار. حالىققا الەۋمەتتىك كومەك بەرەمىز دەپ، ءبىز، شىنى كەرەك، قوعامدا ماسىلدىق پسيحولوگياعا جول بەردىك. وركەنيەتتى ەل بولامىز دەسەك، مۇنداي جاعىمسىز ۇدەرىسكە توسقاۋىل قويۋىمىز كەرەك. تۇراتىن ءۇيى، ءتىپتى، استىندا قىمبات كولىگى بار ازاماتتارعا ەمەس، كومەككە ءزارۋ ادامدارعا كومەك بەرىلۋى قاجەت. جالپى، ازاماتتارعا الەۋمەتتىك قولداۋ كورسەتۋ جۇيەسىن قايتا قاراعان ءجون. سەبەبى، مەملەكەتتەن كومەك الۋ ءۇشىن تابىسىن ادەيى ازايتىپ كورسەتەتىن ادامدار بار. الەۋمەتتىك كومەكتى كىمگە بەرۋ قاجەتتىگى ادامنىڭ كىرىسىنە ەمەس، شىعىسىنا قاراپ انىقتالۋعا ءتيىس. بۇل ماسەلەدە ءبىر ناقتى شەشىم قابىلداۋ قاجەت. ازاماتتاردى ەڭبەكپەن قامتۋ – حالىقتى الەۋمەتتىك تۇرعىدان قورعاۋدىڭ ماڭىزدى باعىتى. ءقازىر ەڭبەكپەن قامتۋ ورتالىقتارى جاڭعىرتىلىپ جاتىر. وسى جۇمىستى ۋاقتىلى اياقتاۋ قاجەت. ولارعا ناقتى ناتيجەسىنە قاراي، ياعني جۇمىسقا ورنالاسقان ادام سانىنا بايلانىستى اقى تولەگەن ءجون. ۇكىمەت بارلىق ءامال-تاسىلدى زەردەلەپ، حالىققا الەۋمەتتىك كومەك كورسەتۋدىڭ جاڭا كەشەندى ۇلگىسىن ۇسىنۋى كەرەك»، - دەدى مەملەكەت باسشىسى.