تۇركىستاندا ءوتىپ جاتقان ۇلتتىق قۇرىلتايدا پرەزيدەنت قاسىم-جومارت توقايەۆ مەملەكەتتىك ماراپاتتار جۇيەسىن حالىقتىڭ جانىنا جاقىن ءارى تۇسىنىكتى ەتىپ جاساۋ كەرەكتىگىن ايتتى، دەپ حابارلايدى Almaty-akshamy.kz.
«ەلىمىزدە كۇندەلىكتى قاجىرلى ەڭبەگىمەن مەملەكەتىمىزدى وركەندەتۋگە جانە ازاماتتاردىڭ قاۋىپسىزدىگىن قامتاماسىز ەتۋگە مول ۇلەس قوسىپ جۇرگەن جاندار از ەمەس. ولاردىڭ قاتارىندا ءمۇعالىم، دارىگەر، عالىم، كاسىپكەر، ءتارتىپ ساقشىسى، اسكەري قىزمەتشى، قۇتقارۋشى جانە باسقا دا ماماندىق يەلەرى بار. قوعامعا ۇلگى بولاتىن وسىنداي جاسامپاز ءارى وتانشىل جانداردى مەملەكەت ءاردايىم قولداۋعا ءتيىس.
مەن ءوزىم بۇل ماسەلەگە ايرىقشا ءمان بەرەمىن. سول سەبەپتى، ءاربىر وردەن-مەدالدىڭ تەرەڭ ماعىنالى ءارى ەرەكشە بولۋى، جۇرت كوڭىلىنەن شىعاتىنداي بولۋى وتە ماڭىزدى. سول ءۇشىن مەملەكەتتىك ماراپاتتار جۇيەسىن حالىقتىڭ جانىنا جاقىن ءارى تۇسىنىكتى ەتىپ جاساۋ قاجەت»، - دەدى پرەزيدەنت.
بۇل رەتتە مەملەكەت باسشىسى ۇلتتىق يدەولوگيانى قالىپتاستىرۋ ءۇشىن تاريحي تۇلعالاردى جۇيەلى دارىپتەۋدى قولعا الۋ كەرەكتىگىن ايتتى.
«جۋىردا ءبىز مەملەكەتتىك سىيلىقتارعا حالقىمىزدىڭ ءبىرتۋار پەرزەنتتەرىنىڭ ەسىمىن بەردىك. ءال-فارابي، اباي، احمەت بايتۇرسىن ۇلى اتىنداعى سىيلىقتار بار. مۇنداي ۇستانىم ۇلى تۇلعالارىمىزدىڭ ەسىمىن ەل جادىندا ساقتاۋ ءۇشىن قاجەت. سول ارقىلى ءبىز ولاردىڭ وزىق ويلارى مەن ونەگەلى ىستەرىن دارىپتەيمىز. شىن مانىندە، ۇلتتىق يدەولوگيا وسىنداي ماڭىزدى شەشىمدەر ارقىلى قالىپتاسادى»، - دەپ توقتالدى مەملەكەت باسشىسى قاسىم-جومارت توقايەۆ.