مەملەكەتتىك كىرىستەر كوميتەتى ناۋرىزدىڭ سوڭىنا دەيىن سالىق دەكلاراسياسىن تاپسىرۋ قاجەتتىگىن ەسكەرتتى

دەكلاراسيانى تۇرعىلىقتى جەرى بويىنشا سالىق ورگانىنا نەمەسە ەلەكتروندى تۇردە تاپسىرۋعا بولادى.

زاڭ بويىنشا 2021 جىلى مۇلىكتى جالعا بەرگەن نەمەسە مۇلىكتى ساتقان كەزدە قۇن وسىمىنەن تابىس تاپقان جەكە تۇلعالار 2022 جىلدىڭ 31 ناۋرىزىنان كەشىكتىرمەي، سالىق دەكلاراسياسىن تاپسىرۋى قاجەت، دەپ حابارلايدى Almaty-akshamy.kz

تابىستىڭ ناقتى تۇرلەرى دە انىقتالعان. ولار:

سالىق اگەنتتەرى بولىپ تابىلمايتىن تۇلعالارعا مۇلىكتى جالعا بەرۋدەن تۇسەتىن كىرىس؛

جەكە تۇرعىن ءۇي قۇرىلىسى، ساياجاي، جەكە قوسالقى شارۋاشىلىق، گاراج، پاتەر، جەر ۋچاسكەلەرى، مەحانيكالىق كولىك قۇرالدارى جانە تىركەمەلەر بويىنشا مەنشىك قۇقىعى ءبىر جىلعا جەتپەگەن جاعدايدا قۇن وسىمىنەن تۇسەتىن كىرىس؛

جىلجىمايتىن مۇلىكتى، جەر ۋچاسكەلەرىن جانە جەر ۇلەستەرىن، ينۆەستيسيالىق التىندى، باعالى قاعازداردى، تۋىندى قارجى قۇرالدارىن، زاڭدى تۇلعانىڭ جارعىلىق كاپيتالىنا قاتىسۋ ۇلەسىن وتكىزۋ كەزىندە قۇن وسىمىنەن تۇسەتىن كىرىس؛

تالاپ ەتۋ قۇقىعىن، ونىڭ ىشىندە تۇرعىن ءۇي قۇرىلىسىنا ۇلەستىك قاتىسۋ تۋرالى شارت بويىنشا تۇرعىن ۇيدەگى (عيماراتتاعى) ۇلەستى تالاپ ەتۋ قۇقىعىن باسقاعا بەرۋدەن تۇسەتىن كىرىس؛

قازاقستان رەسپۋبليكاسىنان تىس جەرلەردەگى كوزدەردەن الىنعان مۇلىكتى ساتۋدان (مۇلىكتى، باعالى قاعازداردى، بورىشتىق باعالى قاعازداردى، قاتىسۋ ۇلەسىن وتكىزۋدەن) تۇسكەن كىرىس؛

جارعىلىق كاپيتالعا سالىم رەتىندە مۇلىكتى (اقشادان باسقا) بەرۋ كەزىندە قۇن وسىمىنەن تۇسەتىن كىرىس؛

شاعىن بيزنەس سۋبەكتىلەرى ءۇشىن نە شارۋا نەمەسە فەرمەر قوجالىقتارى ءۇشىن ارناۋلى سالىق رەجيمىن قولداناتىن دارا كاسىپكەردىڭ وزگە دە اكتيۆتەرىن ساتۋ كەزىندە قۇن وسىمىنەن تۇسەتىن كىرىس.

بۇدان بولەك، ادۆوكاتتار، نوتاريۋستار، سوت ورىنداۋشىلارى، مەدياتورلار، ەڭبەكشى كوشىپ كەلۋشىلەر-رەزيدەنتتەر، ءۇي قىزمەتكەرلەرى، بەيرەزيدەنت-جەكە تۇلعالار، شەت مەملەكەتتەردىڭ ديپلوماتيالىق جانە ولارعا تەڭەستىرىلگەن وكىلدىكتەرىمەن، كونسۋلدىق مەكەمەلەرىمەن جاسالعان ەڭبەك شارتتارى (كەلىسىمشارتتارى) جانە (نەمەسە) ازاماتتىق-قۇقىقتىق سيپاتتاعى شارتتار بويىنشا جۇمىسكەر تابىسىن العان ازاماتتار، سالىق اگەنتتەرى بولىپ تابىلمايتىن قوعامدىق ۇيىمدار مەن قورلار دەكلاراسيانىڭ 240.00 فورماسىن تاپسىرۋعا مىندەتتى.

سونداي-اق بۇل تىزىمگە 2021 جىلعى 31 جەلتوقسانداعى جاعداي قازاقستاننان تىس جەرلەردە تىركەلگەن جىلجىمايتىن مۇلىككە، باعالى قاعازدارعا مەنشىك قۇقىعى، زاڭدى تۇلعانىڭ جارعىلىق كاپيتالىنا قاتىسۋ ۇلەسى بار جەكە تۇلعالار دا كىرەدى.

تابىس سالىعىنىڭ مولشەرى كىرىستىڭ 10 پروسەنتىن قۇرايدى. ونى 10 ساۋىردەن كەشىكتىرمەي تولەۋ كەرەك.

ال دەكلاراسيانى تۇرعىلىقتى جەرى بويىنشا سالىق ورگانىنا قاعاز تۇرىندە جانە «e-Salyq Azamat» ءموبيلدى قوسىمشاسى نەمەسە cabinet.salyk.kz web-پورتالىنداعى سالىق تولەۋشىنىڭ كابينەتى ارقىلى ەلەكتروندى تۇردە تاپسىرۋعا بولادى.