ەرلان قارين 2026 جىلى 6 قاڭتاردا مەملەكەت باسشىسى اتىنان "حالىق قاھارمانى" باۋىرجان مومىش ۇلىنىڭ تۋىستارىنا التىن جۇلدىز بەن "وتان" وردەنىن تاپسىردى، دەپ حابارلايدى aqshamnews.kz
مەملەكەتتىك كەڭەسشى ەرلان قارين الماتىدا ۇلى وتان سوعىسىندا ەرلىك پەن باتىلدىق كورسەتكەن باۋىرجان مومىش ۇلىنىڭ كەلىنى زەينەپ احمەتوۆا مەن نەمەرەسى ەرجان مومىشۇلىنا پرەزيدەنت اتىنان ايرىقشا ەرەكشەلىك بەلگىسى – التىن جۇلدىز بەن "وتان" وردەنىن تاپسىردى.
"حالقىمىز باۋىرجان مومىشۇلىن ءاردايىم باتىر دەپ بىلەدى، قاھارمان دەپ قاستەرلەيدى. مەملەكەت باسشىسى قاسىم-جومارت توقايەۆتىڭ بۇل جولعى شەشىمى حالىقتىڭ وعان دەگەن ىستىق ىقىلاسىن ودان ءارى ارتتىرا ءتۇستى. ەڭ باستىسى، كوپتەن كۇتكەن تاريحي ادىلدىك قالپىنا كەلتىرىلدى"، – دەدى مەملەكەتتىك كەڭەسشى.
سونداي-اق ەرلان قارين قايسار رۋح پەن ءور مىنەزدىڭ سيمۆولىنا اينالعان باۋىرجان مومىش ۇلىنىڭ ءومىرى جاس ۇرپاققا ۇلگى-ونەگە ەكەنىن اتاپ ءوتتى.