قازاقستان رەسپۋبليكاسى ۇلتتىق ۇلانىنىڭ «وڭتۇستىك» وڭىرلىك قولباسشىلىعىنا قاراستى اسكەري بولىمدەرىندە «ماڭگىلىك ساپتا» اتتى ەسكە الۋ ءىس-شاراسى ۇيىمداستىرىلدى. اتالعان شارا 2022 جىلعى قاڭتار وقيعاسى كەزىندە قازا تاپقان ۇلتتىق ۇلان ساربازدارى – قاتارداعى ايبات امانوۆ پەن ماديار قايساروۆتى ەسكە الۋعا ارنالدى.
ءىس-شارا اياسىندا اسكەري قىزمەتشىلەر قازا بولعان ساربازداردىڭ ەرلىگىنە تاعزىم ەتىپ، ەسكەرتكىش تاقتالارعا گۇل شوقتارىن قويدى، ولاردىڭ وتان الدىنداعى ادال قىزمەتى مەن باتىلدىعىن ءبىر مينۋت ۇنسىزدىكپەن ەسكە الدى. اسكەري بولىمدەردە ەستەلىك سوزدەر ايتىلىپ، پاتريوتتىق رۋحتاعى تاربيەلىك جۇمىستار جۇرگىزىلدى.
سونىڭ ىشىندە تالدىقورعان قالاسىندا ورنالاسقان 5514 اسكەري بولىمىندە وتكەن ءىس-شارا مازمۇندى ءارى تاعىلىمدى تۇردە ۇيىمداستىرىلدى. جەكە قۇرام ساپقا تۇرعىزىلىپ، قازا تاپقان جاۋىنگەرلەردىڭ ەسىمدەرى قۇرمەتپەن اتالىپ ءوتتى. تاعزىم ەتۋ شاراسىنا ۇلتتىق ۇلاننىڭ ارداگەرلەرى جانە مەكتەپ وقۋشىلارى دا قاتىستى.
5514 اسكەري ءبولىمىنىڭ كومانديرى پولكوۆنيك امير مانسۋروۆ:
-ايبات امانوۆ پەن ماديار قايساروۆ – اسكەري انتقا ادالدىقتىڭ، وتانعا دەگەن شىنايى سۇيىسپەنشىلىكتىڭ جارقىن ۇلگىسى. ولاردىڭ ەرلىگى مەن جانقيارلىعى ۇلتتىق ۇلاننىڭ ءاربىر اسكەري قىزمەتشىسىنىڭ جادىندا ماڭگى ساقتالادى. ءبىز باتىر ساربازدارىمىزدىڭ رۋحى الدىندا باس يەمىز. ەلدىڭ ىشكى تىنىشتىعى مەن قاۋىپسىزدىگىن ساقتاۋ – ءبىزدىڭ قاسيەتتى بورىشىمىز»، – دەپ اتاپ ءوتتى.
ايتا كەتۋ كەرەك، «ماڭگىلىك ساپتا» ءىس-شاراسى ۇلتتىق ۇلاننىڭ جەكە قۇرامىنا پاتريوتتىق تاربيە بەرۋ، قازا تاپقان ساربازداردىڭ ەرلىگىن ۇلىقتاۋ جانە اسكەري قىزمەتتىڭ ماڭىزىن ارتتىرۋ ماقساتىندا تۇراقتى تۇردە وتكىزىلىپ كەلەدى.