ولارعا 3،8 ملرد تەڭگە تولەندى.
قازاقستاندا ىستەگەن جۇمىسىنىڭ اقىسىن الا الماي جۇرگەن ازاماتتاردىڭ قۇقىعى قورعالدى. مەملەكەتتىك ەڭبەك ينسپەكتورلارى بەرەشەگى بار كومپانيالاردى انىقتادى، دەپ حابارلايدى Almaty-akshamy.kz.
«اعىمداعى جىلعى 1 تامىزداعى جاعداي بويىنشا، مەملەكەتتىك ەڭبەك ينسپەكتورلارى رەسپۋبليكانىڭ 632 كاسىپورنىندا 17،7 مىڭ جۇمىسكەردىڭ الدىندا 3،9 ملرد تەڭگەدەن استام جالاقى بويىنشا بەرەشەكتى انىقتادى.وسى كاسىپورىنداردىڭ باسشىلارىنا ورىندالۋى مىندەتتى 675 نۇسقاما بەرىلىپ، 77،4 ملن تەڭگەدەن استام سوماعا ايىپپۇل سالىندى»،– دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، قابىلدانعان شارالار، سونىڭ ىشىندە جالاقى بويىنشا بەرەشەكتى وتەۋدىڭ قاتاڭ كەستەلەرى مەن مەرزىمدەرىن بەلگىلەۋ ناتيجەسىندە 16،9 مىڭنان استام جۇمىسكەردىڭ قۇقىقتارى قورعالدى. ولارعا 3،8 ملرد تەڭگە تولەندى.