مەملەكەتتىك فۋنكسيالارعا جاۋاپتى ادامداردىڭ كولەڭكەلى كىرىسىن انىقتاۋ تەتىكتەرى كۇشەيتىلدى

زاڭ جوباسى 11 زاڭنامالىق اكتىگە، ونىڭ ىشىندە 3 كودەكس پەن 8 زاڭعا تۇزەتۋلەردى قامتىپ وتىر.

بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سىبايلاس جەمقورلىققا قارسى ءىس-قيمىل جانە مەملەكەتتىك قورعاۋعا جاتاتىن ادامداردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالىپ، قابىلداندى، دەپ حابارلايدى almaty-akshamy.kz قازاقپاراتقا سىلتەمە جاساپ.

بۇل قۇجات زاڭنامانى ودان ءارى جەتىلدىرۋ جانە حالىقارالىق وزىق ستاندارتتار نەگىزىندە سىبايلاس جەمقورلىقتىڭ الدىن الۋ قۇرالدارىن ەنگىزۋ ارقىلى جەمقورلىققا قارسى ءىس-قيمىلدىڭ ءتيىمدى جۇيەسىن قالىپتاستىرۋعا باعىتتالعان. زاڭ جوباسى 11 زاڭنامالىق اكتىگە، ونىڭ ىشىندە 3 كودەكس پەن 8 زاڭعا تۇزەتۋلەردى قامتىپ وتىر.

زاڭ جوباسىنىڭ نەگىزگى مىندەتتەرى - مەملەكەتتىك فۋنكسيالاردى ورىنداۋعا ۋاكىلەتتىك بەرىلگەن جانە ولارعا تەڭەستىرىلگەن ادامداردىڭ نەگىزسىز بايۋىن باقىلاۋدىڭ الدىن الۋ شارالارى ارقىلى سىبايلاس جەمقورلىق كورىنىستەرىن بارىنشا ازايتۋ، سونداي-اق سىبايلاس جەمقورلىق فاكتىلەرى تۋرالى حابارلاعان ادامداردى تيىسىنشە قورعاۋدى، ونىڭ ىشىندە ولاردىڭ ەڭبەك قۇقىقتارىنا نۇقسان كەلمەۋىنە جانە بەرىلگەن اقپاراتتىڭ قۇپيالىلىعىنا كەپىلدىك بەرۋ ارقىلى قامتاماسىز ەتۋ.