بۇل تۋرالى پرەمەر-مينيستردىڭ ورىنباسارى التاي كولگىنوۆ ايتتى.
ول مادەنيەت سالاسىن دامىتۋدا كينويندۋستريانىڭ الەۋەتى زور ەكەنىن تىلگە تيەك ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سەبەبى، حالىق اراسىندا تارتىمدىلىعىنا بايلانىستى، كينو – مەملەكەتتىك مادەنيەت ساياساتىن ىسكە اسىرۋدىڭ پارمەندى قۇرالى.
«بىزگە كينونىڭ باستى كورەرمەنى سانالاتىن جاستار اراسىندا وتانسۇيگىشتىكتى، ەڭبەكقورلىقتى، وتباسىلىق قۇندىلىقتاردى، جاۋاپكەرشىلىكتى، سالاۋاتتى ءومىر سالتىن، ءبىلىم الۋدى ناسيحاتتايتىن تارتىمدى كارتينالار كەرەك. مينيسترلىك مەملەكەتتىك بيۋدجەت ەسەبىنەن تۇسىرىلەتىن فيلمدەردىڭ وسى تالاپتارعا سايكەس بولۋىن قاتاڭ باقىلاۋعا الۋى كەرەك»، - دەدى ا. كولگىنوۆ مادەنيەت مينيسترلىگىنىڭ القا ماجىلىسىندە.
سونىمەن قاتار، ول باسقا دا كوممەرسيالىق جوبالاردىڭ قوعامدىق نورمالارعا قايشى بولماۋى مينيسترلىكتىڭ نازارىندا بولۋى ءتيىس ەكەنىن تاپسىردى.
«ءقازىر كورەرمەن تالعامىنىڭ وسكەنىن بايقاپ وتىرمىز. سوندىقتان، فيلمدەردى كورەرمەن پىكىرىن ەسكەرە وتىرىپ، مەملەكەتتىك بيۋدجەتتەن قارجىلاندىرۋ مەحانيزمىن ويلاستىرۋ قاجەت. بۇل رەتتە فيلمدەر مونيتورينگىنىڭ ءبىرىڭعاي اقپاراتتىق جۇيەسىن ىسكە قوسۋ ماڭىزدى. وسى اقپاراتتىق جۇيە ارقىلى ءاربىر ءفيلمنىڭ پروكاتىن ونلاين-رەجيمدە قاداعالاۋعا مۇمكىندىك تۋادى. مۇنداي اقپاراتتىق جۇيە كينو سالاسىنىڭ دامۋىنا وتە قاجەت. بۇل وتاندىق كينو نارىعىن دامىتۋعا وڭ اسەرىن تيگىزەتىن بولادى»، - دەدى ۇكىمەت باسشىسىنىڭ ورىنباسارى.
وسى ورايدا، ول فيلمدەردى مەملەكەتتىك تىلدە دۋبلياجداۋ ماسەلەسىنە ارنايى توقتالدى.
«مينيسترلىك ۇزدىك فيلمدەردى قازاق تىلىنە اۋدارۋ ماسەلەسىن قولعا الۋى ءتيىس. جاستار جانە بالالار قىزىعا تاماشالايتىن فيلمدەردىڭ قازاقشالانۋى مەملەكەتتىك ءتىلدىڭ قولدانىس اياسىن كەڭەيتۋگە وڭ اسەرىن تيگىزەتىن بولادى. جالپى، كينووندىرىس سالاسىن دامىتۋدا ءتيىستى قاۋىمدىستىقتارمەن بىرلەسكەن جۇمىستى جانداندىرۋ كەرەك. وسى ورايدا، مەملەكەت باسشىسى «قازاقفيلم» ۇلتتىق كينوستۋدياسىن قازىرگى زامانعا ساي مودەرنيزاسيالاۋدى تاپسىردى. بۇل باعىتتا ناقتى جوسپارلار جاسالعان، ونى تاعى دا پىسىقتاپ، تياناقتى ىسكە اسىرۋدى سۇرايمىن»، - دەدى التاي كولگىنوۆ.