مەملەكەتتىك باسقارۋ اكادەمياسىندا قوسىمشا وقۋعا قابىلداۋ باستالدى

مودۋلدىك وقىتۋ نەگىزگى جۇمىستان قول ۇزبەي ءوز قۇزىرەتتەرىن ارتتىرعىسى كەلەتىن ازاماتتارعا ارنالعان. وقۋ جىلى 6 مودۋلدەن تۇرادى. ءاربىر مودۋلدە وفلاين جانە قاشىقتان وقىتۋ فورماتتارى قاراستىرىلعان. مۇنداي ءتاسىل ءبىلىم الۋشىلارعا وقۋ ماتەريالدارىن ارنايى كەستە بويىنشا ىڭعايلى تۇردە يگەرۋگە مۇمكىندىك بەرەدى. كونكۋرسقا مەملەكەتتىك قىزمەتشىلەر، مەملەكەتتىك بيۋدجەت ەسەبىنەن قارجىلاندىرىلاتىن ۆەدومستۆولىق باعىنىستى ۇيىمداردىڭ وكىلدەرى، كۆازيمەملەكەتتىك سەكتور ماماندارى، سونداي-اق ءماسليحات دەپۋتاتتارى قاتىسا الادى.

ماگيستراتۋرا بويىنشا 1 جىلدىق ەكى باعدارلاما قاراستىرىلعان: «مەملەكەتتىك باسقارۋ – Executive Master of Public Administration» جانە «وڭىرلىك دامۋ – Master of Regional Development».

- «مەملەكەتتىك باسقارۋ» ءبىلىم بەرۋ باعدارلاماسىنا ۇمىتكەرلەردىڭ باسشىلىق لاۋازىمداردا كەمىندە 2 جىل جۇمىس ءوتىلى بولۋى قاجەت. «وڭىرلىك دامۋ» ءبىلىم بەرۋ باعدارلاماسىنا تۇسۋشىلەردىڭ جالپى جۇمىس ءوتىلى كەمىندە 2 جىل بولۋى قاجەت. وسى جىلى مەملەكەتتىك قىزمەتشىلەرگە دە مودۋلدىك باعدارلامالار بويىنشا ماگيستراتۋراعا وقۋعا تۇسۋگە مۇمكىندىك ۇسىنىلدى. ولار مەملەكەتتىك ورگاننان جولدامانى ۇسىنۋى كەرەك. سونىمەن قاتار مەملەكەتتىك ءتىلدى مەڭگەرۋ دەڭگەيى ۆ1-دەن تومەن ەمەس ەكەنىن راستايتىن QAZAQ RESMI TEST نەمەسە قازتەست سەرتيفيكاتى بولۋى قاجەت، – دەدى وسى تاقىرىپقا ارنالعان بريفينگتە اكادەميا رەكتورى ەرلان ءابىل.