مەملەكەتىمىزدىڭ وركەندەۋى ايماقتاردىڭ قۋاتتى بولۋىنا تىكەلەي بايلانىستى. بۇل تۋرالى ق ر پرەزيدەنتى قاسىم-جومارت توقايەۆ قازاقستان حالقىنا جولداۋىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءقازىر قازاقستان دامۋدىڭ جاڭا كەزەڭىنە قادام باستى. الەۋمەتتىك، ەكونوميكالىق جانە دەموگرافيالىق احۋال مۇلدە باسقا. بۇگىنگى سىن-قاتەرلەر دە، مىندەتتەر دە بولەك. مەملەكەتىمىزدىڭ وركەندەۋى ايماقتاردىڭ قۋاتتى بولۋىنا تىكەلەي بايلانىستى. بۇل ماسەلەگە 2019 جىلعى جولداۋىمدا كەڭىرەك توقتالدىم. «قۋاتتى وڭىرلەر - قۋاتتى ەل» دەگەن ۇستانىم وزەكتى. وسى ورايدا ەلىمىزدەگى اكىمشىلىك-اۋماقتىق قۇرىلىمنىڭ وڭتايلى بولۋى وتە ماڭىزدى»، - دەدى مەملەكەت باسشىسى.
ق ر پرەزيدەنتى بۇعان دەيىن شىمكەنتتىڭ رەسپۋبليكالىق قالاعا اينالعانىن، وبلىس ورتالىعى تۇركىستان قالاسىنا كوشىرىلگەنىن اتاپ ءوتتى.
«سونىمەن بىرگە وڭتۇستىك قازاقستان وبلىسى تۇركىستان وبلىسى دەپ اتالدى. بۇل قاي جاعىنان الساق دا دۇرىس بولدى. ونى حالىق وتە جىلى قابىلدادى. مەن «تاۋەلسىزدىك بارىنەن قىمبات» اتتى ماقالامدا وسى ءۇردىستىڭ جالعاساتىنىن ايتقان ەدىم. سودان بەرى ازاماتتارىمىزدان كوپتەگەن ۇسىنىس كەلىپ ءتۇستى. مەنىڭ تاپسىرمام بويىنشا ونىڭ ءبارى مۇقيات زەردەلەندى»، - دەدى قاسىم-جومارت توقايەۆ.