مەملەكەت ءۇشىن جاستاردىڭ جان-جاقتى دامۋى ماڭىزدى

ق ر پرەمەر-مينيسترىنىڭ ورىنباسارى تامارا دۇيسەنوۆا قازاقستان شاحمات فەدەراسياسىنىڭ پرەزيدەنتى تيمۋر تۋرلوۆپەن كەزدەستى. قاۋىمداستىق باسشىسى بيىلعى ناتيجەلەر مەن كەلەر جىلعا ارنالعان جوسپارلار تۋرالى ايتىپ ءوتتى.

جىل باسىنان بەرى فەدەراسيا رەسپۋبليكالىق جانە حالىقارالىق دەڭگەيدەگى 30 جارىس ۇيىمداستىردى، ولارعا بارلىعى 5،5 مىڭنان اسا ادام قاتىستى. تۇڭعىش رەت مەكتەپ كوماندالارى اراسىندا الەم چەمپيوناتى ءوتتى. دوداعا 53 مەملەكەتتەن 400-گە جۋىق جاس شاحماتشى قاتىستى. سونداي-اق 23 شاحماتشىعا گرانتتىق كومەك كورسەتىلدى، 89 ادامعا سىياقى تولەندى.

«ءبىز شاحماتتى ەل ىشىندە ناسيحاتتاۋعا، ونىڭ وڭىرلەردە دامۋىنا ۇلكەن كوڭىل بولەمىز. ول ءۇشىن ارنايى “شاحمات كەرۋەنى” اتتى اۋقىمدى جوبانى جۇزەگە اسىردىق. ەكى اي ىشىندە 20 قالادا اۋەسقوي شاحماتشىلار اراسىندا سايىستار ۇيىمداستىرىلدى. وعان مىڭنان اسا ادام قاتىستى، جۇلدە قورى 16 ملن تەڭگەنى قۇرادى. سونداي-اق وسى باستاما اياسىندا بارلىق وبلىستاردا فەدەراسيانىڭ وكىلدىكتەرى اشىلدى. باستامالارىمىز مەملەكەت تاراپىنان رەسپۋبليكالىق دەڭگەيدە دە، وڭىرلەردە دە ۇلكەن قولداۋعا يە بولىپ جاتقانى ماڭىزدى. سول ءۇشىن العىس ايتا وتىرىپ، ارىپتەستىكتى ارى قاراي دا نىعايتۋعا دايىن ەكەنىمىزدى ايتقىم كەلەدى»، — دەدى تيمۋر تۋرلوۆ.

ءوز كەزەگىندە تامارا دۇيسەنوۆا حالىقارالىق دەڭگەيدە جوعارى جەتىستىككە قول جەتكىزگەن وتاندىق گروسسمەيستەرلەردىڭ شەبەرلىگىن اتاپ ءوتتى. قازىردە شاحماتتان قازاقستان قۇراماسى – مىقتى ۇجىمداردىڭ قاتارىندا.

«مەملەكەت ءۇشىن جاستاردىڭ جان-جاقتى دامۋى ماڭىزدى. سىزگە جانە وتاندىق فەدەراسياعا بۇل باعىتتا اتقارىلعان جۇمىس ءۇشىن العىس بىلدىرەمىن. ءقازىر سپورت تۋرالى زاڭ جوباسى قاراستىرىلىپ جاتىر. قۇجات سپورت تۇرلەرىن قارجىلاندىرۋ، سالالىق فەدەراسيالار جۇمىسىن رەتتەۋگە مۇمكىندىك بەرەدى. مەملەكەت بۇقارالىق سپورتتىڭ دامۋى مەن ونى جان-جاقتى ناسيحاتتاۋعا مۇددەلى»، — دەدى تامارا دۇيسەنوۆا.