ق ر قارۋلى كۇشتەرى ۇلتتىق اسكەري-پاتريوتتىق ورتالىعىندا قورعانىس ءمينيسترىنىڭ جۇلدەسىنە ارنالعان رەسپۋبليكالىق اسكەري مۋزىكا بايقاۋىنىڭ ناتيجەسى جاريالاندى.
وڭىرلەردەگى ۇمىتكەرلەرگە ءىس-شاراعا ونلاين فورماتتا قاتىسۋ مۇمكىندىگى بەرىلدى. بايقاۋعا بارلىعى 80-نەن استام ءوتىنىم كەلىپ ءتۇستى، دەپ حابارلايدى اlmaty-akshamy.kz.
قورعانىس ءمينيسترىنىڭ ورىنباسارى گەنەرال-لەيتەنانت مۇحامەدجان تالاسوۆ قازىلار القاسىنا اتقارىلعان كاسىبي جۇمىسى، ال بايقاۋ جەڭىمپازدارى مەن جۇلدەگەرلەرىنە اسكەري مۋزىكالىق شىعارماشىلىقتى دامىتۋعا قوسقان ۇلەسى ءۇشىن العىسىن ءبىلدىردى.
قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ لاۋرەاتى تولەگەن مۇحامەدجانوۆ ءتوراعالىق ەتكەن قازىلار القاسى «اسكەري بي» اۋەنى ءۇشىن قورعانىس ءمينيسترىنىڭ باس جۇلدەسىن نۇرلىبەك امانوۆقا تابىس ەتتى.
«اسكەري ۇرمەلى وركەسترلەرگە ارنالعان اسپاپتىق مۋزىكا» نوميناسياسى بويىنشا نۇرلان كۋچكاروۆ «ساربازدار مارشى» اۋەنىمەن جەڭىمپاز اتاندى. ەكىنشى ورىندى «ايبىن» مارشىمەن نيكيتا پوچيتالين يەلەندى. ءۇشىنشى ورىن بەيبىت ورال ۇلىنىڭ «جاس ۇلاندار مارشىنا» بەرىلدى. بۇل نوميناسيا بويىنشا «مانشۇك» مارشىمەن ولەگ فايحنەر ديپلومانت اتاندى.
«اسكەري-پاتريوتتىق ءان» نوميناسياسى بويىنشا ءالىبي ءابدىنۇروۆ پەن ءابدىراحمان ماماش ۇلىنىڭ «اسكەري مارش» شىعارماسى ۇزدىك دەپ تانىلدى. ەكىنشى ورىن «قارۋلى كۇش – قورعانىم» ءانى ءۇشىن قايىرجان بەردىباي مەن تالانت ارعىنعاليگە بەرىلدى. ايسۇلۋ تاني مەن اراسانباي ەستەنوۆتىڭ «ساربازدار مەن باس ساردار» ءانى ءۇشىنشى ورىندى يەلنەندى. جانەل بەكەتانوۆ پەن قىدىرجان بيباتشايەۆ «شىعىس ۇلاندارى»، بەيبىت ورال ۇلى مەن اقىلباي قۇلىمشين «العا ساربازدار»، قۋانىش كيسمەتوۆ پەن ەستاي راشقالييەۆ «قازاقستان ساربازدارى»، اسكەربەك قۇرمانايەۆ «سەرجانتتار – سەرىلەرىم» اندەرىمەن ديپلومانت اتاندى.
«بي توپتارىنا ارنالعان مۋزىكالىق شىعارمالار» نوميناسياسى بويىنشا قازىلار القاسى شولپان قورعانبەكتىڭ «قاسيەتتى ەل» شىعارماسىن ۇزدىك دەپ تانىدى. ەكىنشى ورىندا ولەگ فايحنەردىڭ «توميريس»، ءۇشىنشى ورىندا ساۋلە بورانبايەۆانىڭ «العا» كومپوزيسيالارى. نيكيتا پوچيتالين بۇل نوميناسيادا «ۆالس فانتازياسى» اۋەنىمەن ديپلومانت اتاندى.
بايقاۋدى قورىتىندىلاعان قازىلار القاسىنىڭ ءتوراعاسى تولەگەن مۇحامەدجانوۆ جانرلىق ارتۇرلىلىك پەن ۇسىنىلعان جۇمىستاردىڭ جوعارى دەڭگەيىن اتاپ ءوتتى.
بايقاۋدىڭ جۇلدە قورى التى ميلليون تەڭگەدەن اسقانىن اتاپ وتكەن ءجون. بايقاۋ جەڭىمپازدارى مەن جۇلدەگەرلەرىنە تۇرمىستىق تەحنيكا ساتىپ الۋعا سەرتيفيكاتتار تاپسىرىلدى. باس جۇلدە ءۇشىن سىياقى ميلليون تەڭگەنى قۇرادى.
ءىس-شارا بارىسىندا ءبىرقاتار بايقاۋ جەڭىمپازدارىنىڭ، جۇلدەگەرلەرى مەن ديپلومانتتارىنىڭ شىعارمالارى ورىندالدى.