مەملەكەت تۇرعىن ۇيگە مۇقتاج قازاقستاندىقتار ءۇشىن جالدامالى پاتەر اقىسىنىڭ 50%-ىن تولەيدى، دەپ حابارلادى اlmaty-akshamy.kz يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ.
«مەملەكەت باسشىسى حالىقتىڭ الەۋمەتتىك وسال توپتارىن قولداۋ ءۇشىن ارنايى باعدارلاما ازىرلەۋدى تاپسىرعان بولاتىن. وسىلايشا، 18 ءساۋىر كۇنى ءبىز جالدامالى پاتەر اقىسىن سۋبسيديالاۋعا وتىنىمدەر قابىلداۋدى باستاپ كەتتىك. الايدا، بۇعان دەيىن باعدارلامانى 2022 جىلدىڭ مامىر ايىندا ىسكە قوسۋ جوسپارلانعان بولاتىن. اتالعان باعدارلاما وتباسىنىڭ ءاربىر مۇشەسىنە شاققانداعى تابىسى ايىنا ءبىر ەڭ تومەنگى كۇنكورىس دەڭگەيىنەن اسپايتىن وتباسىلارعا جالدامالى پاتەر اقىسىنىڭ 50%-ىن تولەۋدى كوزدەيدى. باعدارلامانىڭ وپەراتورى - «وتباسى بانكى»، - دەپ جازدى ۆەدومستۆو.
ەڭبەك مينيسترلىگىنىڭ اقپاراتىنا سايكەس، بۇگىنگى تاڭدا ەلىمىزدە 590 مىڭعا جۋىق كەزەكتە تۇرعان ازامات بار، ولاردىڭ 210 مىڭى الەۋمەتتىك وسال توپتارعا جاتادى. ولاردىڭ ىشىندە، تابىسى ەڭ تومەنگى كۇنكورىس دەڭگەيىنەن تومەن 70 مىڭعا جۋىق قازاقستاندىق بار. وسىعان بايلانىستى مەملەكەت باسشىسىنىڭ تاپسىرماسى بويىنشا جەكە تۇرعىن ءۇي قورىنان جالعا الىناتىن تۇرعىن ءۇي ءۇشىن تولەمدەردى تاعايىنداۋ قاعيدالارى ازىرلەنگەن.
«ورتالىق كوممۋنيكاسيالار قىزمەتىنىڭ الاڭىندا ارىپتەستەرىم تۇرعىن ءۇي تولەمدەرىنە ءوتىنىم بەرۋ مەحانيزمى جانە سۋبسيديالاۋ قاعيدالارى تۋرالى ەگجەي-تەگجەيلى ايتىپ بەرگەن بولاتىن. وسىلايشا، كوپ بالالى وتباسىلار، ءبىرىنشى جانە ەكىنشى توپتاعى مۇگەدەكتەر، جەتىم بالالار، مۇمكىندىگى شەكتەۋلى بالالاردى تاربيەلەپ وتىرعان وتباسىلار مەملەكەت تاراپىنان قولداۋعا يە بولا الادى. حالىققا ىڭعايلى بولۋ ءۇشىن ءبىز وتىنىمدەردى قابىلداۋ بويىنشا سيفرلىق پلاتفورمانى ىسكە قوستىق. وسىلايشا بارلىق پروسەسس otbasybank.kz پورتالىندا ونلاين جۇزەگە اسىرىلادى. ءوتىنىش بەرۋشىلەردىڭ بارلىق تالاپقا سايكەستىگى باسقا ۆەدومستۆولاردىڭ دەرەكتەر بازاسىمەن ينتەگراسيالاۋ ارقىلى تەكسەرىلەتىن بولادى»، - دەدى مينيستر قايىربەك وسكەنبايەۆ.
ول وسى رەتتە تولەمدەردى سۋبسيديالاۋعا وتىنىمدەر قابىلداۋ پروسەسىن تۇراقتى باقىلاۋدا ۇستايتىنىن ەرەكشە اتاپ وتكەن. سونداي-اق كۇندەلىكتى «وتباسى بانكىنە» كەلىپ ءتۇسىپ جاتقان وتىنىمدەر بويىنشا قانشاسى ماقۇلدانىپ، قانشا ءوتىنىم كەرى قايتارىلعاندىعى جونىندە سانداردى سارالاپ، مونيتورينگ جاساپ وتىرماق.