– ءبىز مەملەكەت باسشىسىنىڭ جولداۋدا كوتەرگەن باستامالارىن قولدايمىز. سونىمەن قاتار تاعى ءبىر تاراپتان مۇنىڭ تۇبەگەيلى ورىندالىپ، جۇرت يگىلىگىن كورۋ جاعىن دا قاراستىرعان ابزال. مىنە، وسى ماسەلەدە سان-ساۋالدار تۋىندايدى. ياعني، مۇنداي نۇسقاداعى ساۋالدار كوپ. دەگەنمەن بىزگە بىرلەسىپ، ءبىر ويدا بولىپ جۇمىس جاساۋ ماڭىزدىراق سانالادى. ول ءۇشىن ءاربىرىمىز رۋحاني جىگەرىمىزدى جانۋىمىز قاجەت.
بۇرىن كەڭەس وداعىنىڭ داۋرەنى ءجۇرىپ تۇرعان شاقتا قانشا كەلى ەت، كوكونىس تۇتىناتىنى ەسەپتەلەتىن. ءبىراق ەشكىم تەاتر ساندارىنىڭ ۇلعايۋى جانە مەكتەپتەردىڭ كوبەيۋىنە دەن قويا قويمادى. رۋحاني الەمنىڭ كوكجيەگىنىڭ كەڭەيۋىنە ءمان بەرىلمەدى. ەگەر رۋحانيات بولماسا، قالعان ىستەردىڭ بولاشاعى بۇلىڭعىر بولماق. پرەزيدەنت ءبىرقاتار تىڭ باستامالار ۇسىنىپ، ولاردى جۇزەگە اسىرۋدىڭ ناقتى قاعيداتتارىن نەگىزدەپ بەردى.
«ءبىز اشىق باسەكەلەستىك ورنىققان جانە بارىنە تەڭ مۇمكىندىك بەرىلەتىن ادىلەتتى قازاقستاندى قۇرىپ جاتىرمىز.اۋقىمدى ساياسي وزگەرىستەردى اشىقتىق، ادىلدىك جانە ءوزارا سەنىم ارقىلى جۇزەگە اسىرۋ اسا ماڭىزدى. جاڭا سايلاۋ ناۋقانىنىڭ مەرزىمدەرىن جانە ونىڭ رەتىن ەلگە اشىق جاريالاۋ شەشىم قابىلداۋ كەزىندەگى اشىقتىق قاعيداتىنا ساي كەلەدى. وسى قادامنىڭ ءبارى ءبىزدىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» اتتى باستى فورمۋلامىزدى بىرتىندەپ ناقتى مان-مازمۇنمەن بايىتا تۇسەدى. ءبىزدىڭ بۇگىنگى باستامالارىمىز قازاقستاننىڭ بولاشاعىن ايقىندايدى. ءبىز كۇن سايىن ەسكى مەن جاڭانىڭ، توقىراۋ مەن دامۋدىڭ اراسىنان تاڭداۋ جاسايمىز. بارشاڭىزدى ۇلت مۇددەسى ءۇشىن ۇيىسۋعا شاقىرامىن»، - دەدى مەملەكەت باسشىسى.
پرەزيدەنت باستامالارى دەر كەزىندە قابىلدانعان ماڭىزدى شەشىمدەر دەپ ويلايمىن. مەملەكەت مۇددەسى بارىنەن بيىك.