قازاقستان رەسپۋبليكاسىنىڭ مەملەكەت جانە قوعام قايراتكەرى، كورنەكتى قالامگەر-جۋرناليست، ساياساتكەر قۋانىش سۇلتانوۆ 80 جاسقا كەلدى. الماتىداعى ۇلتتىق كىتاپحانادا «قازاقتىڭ قونايەۆى»، «وتىز جىلداعى وي-تولعاۋ» اتتى ەكى كىتاپتىڭ تۇساۋكەسەر ءراسىمى ءوتتى، - دەپ حابارلايدى aqshamnews.kz.
جيىنعا قوعام قايراتكەرلەرى، اقىن-جازۋشىلار، ساياساتكەرلەر، مادەنيەت پەن ونەر وكىلدەرى قاتىستى.
جيىنعا قاتىسۋشىلار سەكسەننىڭ سەڭگىرىنە مەملەكەت پەن قوعام الدىندا بيىك ابىرويمەن جەتكەن قۋانىش سۇلتان ۇلىنىڭ ءجۇرىپ وتكەن ءومىر جولىنان ەستەلىكتەر ايتىپ، ءار كەزەڭدەگى قىزمەتتەرى جايىندا وي ءوربىتتى.
– قاكەڭ قازاقتىڭ سۇيىكتى پەرزەنتى ديماش احمەتۇلىمەن بىرگە قىزمەت ىستەدى. تاۋەلسىزدىكتەن بەرى ەل تىرلىگىنە ەلەۋلى ۇلەس قوسىپ كەلەدى. العاشقى اقپارات ءمينيسترى، قىتايدا ەلشى، سەناتور، ءماجىلىس دەپۋتاتى جانە ءتۇرلى لاۋازىمدى قىزمەتتەر اتقاردى. قايدا جۇرسە دە ۇلتقا قىزمەت قىلدى، – دەدى اقىن نۇرلان ورازالين.
القالى جيىن ورتاسىندا د.قونايەۆ اتىنداعى قوعامدىق قور مەملەكەت جانە قوعام قايراتكەرى قۋانىش سۇلتانوۆقا "قونايەۆ وردەنىن" تابىستادى.
تۇساۋى كەسىلىپ، كوپشىلىك وقىرمانعا جول تارتقان كىتاپ جايىندا د.قونايەۆ قورى باسشىسى ەلدار قونايەۆ ءوز پىكىرىن دە ورتاعا سالدى:
– كىتاپتى وقىپ، قايران قالدىم. اسىرەسە كەڭەستىك قازاقستان باسشىسى ديماش احمەت ۇلىنىڭ ءجۇرىپ وتكەن وتكەلدەرى، قيىن ۋاقىتتارى انىق جازىلعان. سول ءداۋىردىڭ ءبارىن كوزىمەن كورىپ، ىشىندە بولدى. تاۋەلسىزدىككە دەيىن، كەيىن دە وتە جاۋاپتى قىزمەتتەردە بولدى ، – دەدى قوعامدىق قور جەتەكشىسى.