مەملەكەت باسشىسى قاسىم-جومارت توقايەۆتىڭ قاتىسۋىمەن وتەتىن بۇكىلارميالىق كەڭەستىڭ وتىرىسى باستالدى، دەپ حابارلايدى Almaty-akshamy.kz.
«قارۋلى كۇشتەرىمىز – مەملەكەتتىگىمىزدىڭ مىزعىماس تىرەگى. تۋعان ەلدىڭ تاۋەلسىزدىگىن جانە بەيبىت ءومىرىن قورعاۋ – قاسيەتتى پارىز. تۋعان جەردىڭ اۋماقتىق تۇتاستىعىن ساقتاۋ – قاستەرلى بورىش. باتىر بابالارىمىز عاسىرلار بويى جەرىنىڭ شەتىن جاۋعا باستىرماي، بىزگە ميراس ەتتى. وسى ۇلى مۇرانى كوزدىڭ قاراشىعىنداي ساقتاۋ – باستى مىندەتىمىز. ءبىرتۇتاس ءارى قۋاتتى مەملەكەتتى ۇرپاققا تابىستاۋ – نەگىزگى ماقساتىمىز. ەل ءىشى – تىنىش، قوعام – تۇراقتى بولسا، جاسامپاز ءارى وركەنيەتتى مەملەكەتكە اينالامىز. ياعني، دامىعان ەل بولامىز دەسەك، ەڭ الدىمەن، بەيبىتشىلىك جانە تىنىشتىق كەرەك. قارۋلى كۇشتەرىمىز وسى قاستەرلى قۇندىلىقتاردى قورعاۋعا ءتيىس. قازاقستان بارلىق ەلدەرمەن دوستىق قاتىناس ورناتقان. ءبىزدىڭ ۇستانىم – ايقىن»،-دەدى مەملەكەت باسشىسى.
7 مامىر - ق ر قارۋلى كۇشتەرىنىڭ قۇرىلعان كۇنى قارساڭىندا وتەتىن جيىن بارىسىندا اسكەري سالانى دامىتۋعا جانە اسكەر دايىندىعىنا، قازاقستان ارمياسىن تەحنولوگيالىق تۇرعىدا جاڭعىرتۋعا قاتىستى ماسەلەلەر قاراستىرىلادى.
قورعانىس ءمينيسترىنىڭ ورىنباسارى سۇلتان قامالەتدينوۆتىڭ سوزىنشە، بيىل قازاقستاننىڭ اسكەري بيۋدجەتى وسكەن.
«قورعانىس مينيسترلىگىنىڭ اسكەري بيۋدجەتى قاراستىرىلىپ، قازاقستاننىڭ جىو-دەگى اسكەري بيۋدجەتى ءبىر پايىز شاماسىندا بەكىتىلدى»، - دەيدى ءمينيستردىڭ ورىنباسارى.
بۇعان دەيىن قورعانىس مينيسترلىگىنە قاراستى وقۋ ورىندارى پەداگوگتەرىنىڭ جالاقىسى وسەتىنى بەلگىلى بولعان ەدى.
ناقتىراق ايتساق، اسكەري پەداگوگتەردىڭ لاۋازىمدى ايلىق مولشەرى:
- 2023 جىلعى 1 قاڭتاردان باستاپ 2،32 مولشەرىندە؛
- 2024 جىلعى 1 قاڭتاردان باستاپ 2،74 مولشەرىندە؛
- 2025 جىلعى 1 قاڭتاردان باستاپ 3،2 مولشەرىندە تۇزەتۋ كوەففيسيەنتىن قولدانا وتىرىپ ايقىندالادى.
كەلەشەكتە اسكەري كومانديردىڭ وڭ قورىتىندىسىن العان مەرزىمدى اسكەردەگى جاۋىنگەرلەرگە تەگىن جوعارى اسكەري ءبىلىم ۇسىنىلۋى مۇمكىن. قورعانىس مينيسترلىگىنىڭ بۇل باستاماسىن ەلدەگى 70 جوعارى وقۋ ورنى قولداپ وتىر.