وڭتۇستىك استانادا الماتى وبلىسى ەڭبەكشىقازاق اۋدانىنىڭ 65 جاستاعى تۇرعىنىنا جۇرەكتىڭ جاساندى سول جاق قارىنشاسى (LVAD) يمپلانتتالدى.
ءمامس ەسەبىنەن قارجىلاندىرىلاتىن مۇنداي وپەراسيا الماتىدا وسىمەن ەكىنشى ادامعا جاسالىپ وتىر. ەكىنشى وپەراسيا دا ءساتتى ءوتتى، دەپ حابارلايدى Almaty-akshamy.kz.
پاسيەنت 2017 جىلدان بەرى يشەميالىق ديلاتاسيالىق كارديوميوپاتيادان زارداپ شەگەدى. سول جاق قارىنشانىڭ شىعارىلىم فراكسياسى وتە تومەن بولدى - نەبارى 20%، ينفاركت سوقتى. الدىڭعى تومەندەيتىن ارتەرياعا ستەنت ورناتىلعان. سونىمەن قاتار، جۇرەك توقتاپ قالۋىنىڭ الدىن الۋ ءۇشىن كارديوۆەرتەر-دەفيبريللياتور يمپلانتتالدى. جۇرەك جەتكىلىكسىزدىگىن دەكومپەنساسيالاۋعا باعىتتالعان ەم-شارالاردىڭ بىرنەشە كۋرسىن قابىلداعان.
عزي باسقارما ءتوراعاسى مارات پاشيموۆتىڭ ايتۋىنشا، استانا ۇلتتىق عىلىمي كارديوحيرۋرگيا ورتالىعىنىڭ باسقارما ءتوراعاسى ماحاببات بەكبوسىنوۆا جانە ورتالىقتىڭ جەتەكشى ماماندارىنىڭ قاتىسۋىمەن وتكەن كونسيليۋمدا پاسيەنتكە LVAD يمپلانتىن ورناتۋ ۇسىنىلدى.
«بيىل ءساۋىر ايىندا ۇعكو باسشىلىعىمەن بولعان كەزدەسۋدە ءبىز مەديسينالىق كومەكتىڭ قولجەتىمدىلىگى مەن ساپاسىن قامتاماسىز ەتۋ ءۇشىن ءوزارا تاجىريبە، يننوۆاسيالار جانە تەحنولوگيالارمەن الماسۋ جۇمىستارىن جالعاستىرامىز دەپ كەلىسكەن ەدىك. ءبىزدىڭ دارىگەرلەرمەن بىرگە وسى كۇردەلى وپەراسيانى جاساعان استانالىق ارىپتەستەرىمە العىس ايتامىن. وپەراسيا الەۋمەتتىك ساقتاندىرۋ قورى ەسەبىنەن جۇزەگە اسىرىلادى جانە قازاقستان ازاماتتارى ءۇشىن تەگىن»، - دەپ اتاپ ءوتتى مارات پاشيموۆ.
كارديولوگيا جانە ىشكى اۋرۋلار عزي كارديوحيرۋرگيا بولىمشەسى مەڭگەرۋشىسى رۋستەم تولەۋتايەۆتىڭ ايتۋىنشا، ناۋقاس وپەراسياعا دەيىن ءۇش رەت جانساقتاۋ بولىمىندە جاتتى. بۇعان دەيىن قانشا رەت اۋرۋحانالاردا جاسالعان ەم-دوم وڭ ناتيجە بەرمەگەن.
«بۇعان دەيىن مۇنداي دياگنوز قويىلعان ناۋقاستار اعزانىڭ رەزەرۆتىك مۇمكىندىگىنە قاراي ءومىر سۇرەتىن، ەندى ولاردىڭ ءومىرىن ۇزارتۋعا مۇمكىندىك بار. ءقازىر وسىنداي اپپاراتتار الەمدە كوپ ورناتىلىپ جاتىر. دەگەنمەن وپەراسيا قۇنى قىمبات بولعاندىقتان مۇنداي وتالاردى ەكىنىڭ ءبىرىنىڭ قالتاسى كوتەرە بەرمەيدى»، - دەپ تۇيىندەدى دارىگەر.
يمپلانتاسيادان كەيىن جالپى اعزانىڭ جاعدايى جاقسارادى، جۇرەك جەتكىلىكسىزدىگىنىڭ بەلگىلەرى باسىلادى. ءقازىر ناۋقاستىڭ جاعدايى ەداۋىر جاقسارعان: ىسىك، ەنتىگۋ باسىلدى، ۇيقىسى رەتتەلگەن. دەمالىستان كەيىن اۋرۋحانادان شىعادى.
1-7 مامىر ارالىعىندا بۇكىل الەمدە حالىقارالىق جۇرەك جەتكىلىكسىزدىگى تۋرالى حاباردار بولۋ اپتالىعى اتالىپ وتەدى. شارا اياسىندا ەلىمىزدىڭ بارلىق ەمحانالارىندا، كارديوورتالىقتاردا اشىق ەسىك كۇندەرىن وتكىزۋ جوسپارلانعان.
جۇرەك جەتكىلىكسىزدىگى اقش پەن ەۋروپادا ولىم-جىتىمگە سەبەپشى بولاتىن اۋرۋلار اراسىندا ەكىنشى ورىندا تۇر. الەمدە بۇل دەرتكە 70 ملن. استام ادام شالدىققان. ءاربىر بەسىنشى ناۋقاس دياگنوز قويىلعاننان كەيىن ءبىر جىل ىشىندە ومىردەن وتەدى.