پرەزيدەنت ءسوزىنىڭ سوڭىندا بارشا قازاقستان حالقىنا اماندىق، باق-بەرەكە تىلەدى.
پرەزيدەنت قاسىم-جومارت توقايەۆ ءوز سوزىندە جينالعان قاۋىمدى قاسيەتتى رامازان ايىمەن قۇتتىقتاپ، بۇل اي كۇللى مۇسىلمان قاۋىمى ءۇشىن ەرەكشە ۋاقىت ەكەنىن، جاماعات وسى ايدا ىزگى امالدار جاساپ، مول ساۋاپقا كەنەلەتىنىن ايتتى، دەپ حابارلايدى اlmaty-akshamy.kz اقورداعا سىلتەمە جاساپ.
مەملەكەت باسشىسى ءبىر جىلدىڭ ىشىندە ەلىمىزدىڭ قوعامدىق-ساياسي ومىرىندە بولعان ايتۋلى وقيعالارعا ارنايى توقتالدى.
«جالپىۇلتتىق رەفەرەندۋم ارقىلى كونستيتۋسياعا وزگەرىستەر ەنگىزىلدى. ەلىمىز ءۇشىن اسا ماڭىزدى بىرنەشە ساياسي ناۋقان وتكىزىلدى. سونىڭ ىشىندە پرەزيدەنت سايلاۋى جانە جۋىردا بولعان پارلامەنت پەن ءماسليحاتتار سايلاۋى بار. ءبىر سوزبەن ايتساق، قىسقا مەرزىمدە وتە اۋقىمدى جۇمىس اتقارىلدى. ەلىمىز جاڭا داۋىرگە قادام باستى، ادىلەتتى قازاقستاندى قۇرا باستادىق. قازاقستان – ءوز گەوساياسي ايماعىندا وسىنداي اۋقىمدى رەفورمالار جاساپ جاتقان بىردەن-بىر ەل. جاڭارتىلعان كونستيتۋسيا جانە ەلىمىزدە بولىپ جاتقان وزگەرىستەر – وسىنىڭ ايقىن دالەلى. ءبىز وسى رەفورمالاردى، جالپى ايتقاندا، وسى ساياساتتى مىندەتتى تۇردە جالعاستىرامىز»، – دەدى قاسىم-جومارت توقايەۆ.
مەملەكەت باسشىسىنىڭ ايتۋىنشا، ەلىمىز حالىقارالىق ىنتىماقتاستىقتى بەلسەندى تۇردە جالعاستىرا بەرەدى، سىرتقى ساياساتىمىز ءاردايىم دەربەس بولادى. ءبىز مۇنىڭ بارىنە مىزعىماس بىرلىكتىڭ ارقاسىندا قول جەتكىزىپ وتىرمىز.
«حالقىمىز «ىرىس الدى – ىنتىماق» دەپ بەكەر ايتپاعان. قوعامدا بەيبىتشىلىك پەن كەلىسىم بولسا عانا، ەلىمىز تابىسقا جەتەدى. العا قويعان يگى ماقساتتارعا قول جەتكىزە الامىز. ال ەلدەن ىنتىماق كەتسە، مەملەكەتتە دامۋ بولمايدى، جۇرتتىڭ بولاشاققا دەگەن سەنىمى دە ازايادى. سوندىقتان ەلدىڭ بىرلىگى مەن ىنتىماعىن ساقتاۋ – نەگىزگى مىندەتىمىزدىڭ ءبىرى. بۇل بارشامىز جۇمىلىپ اتقاراتىن جۇمىس بولۋى كەرەك»، – دەدى پرەزيدەنت.
مەملەكەت باسشىسى حالقىمىزدىڭ دۇنيەتانىمىنا ساي ءداستۇرلى يسلامدى دارىپتەۋ قاجەت ەكەنىنە نازار اۋداردى.
«قازاقتىڭ ادەت-عۇرپى ءاردايىم ىزگىلىككە شاقىرادى. ءاربىر سالتتىڭ تەرەڭ تاربيەلىك ءمانى بار. مىسالى، اقساقالدارىمىز جاستارعا باتاسىن بەرەدى. جاستارىمىز ۇلكەننىڭ الدىن كەسىپ وتپەيدى، قۇرمەتىن كورسەتەدى، ەشكىمنىڭ الا ءجىبىن اتتامايدى. حالقىمىز قاشاندا قىز بالانى سىيلاپ، قادىرلەگەن. مۇنىڭ ءبارى ءداستۇرلى يسلام قۇندىلىقتارىمەن تىعىز ۇندەسەدى»، – دەدى قاسىم-جومارت توقايەۆ.
سونىمەن قاتار پرەزيدەنت ءوز سوزىندە ۇلتتىق مادەنيەتىمىزدى دامىتۋ ماڭىزدى ەكەنىنە توقتالدى.
«ۇلتتىق مادەنيەت دەگەنىمىز – ماعىناسى تەرەڭ، كوپقىرلى ۇعىم. حالقىمىزدىڭ ءتول مادەنيەتى سالت-داستۇردەن، ادەت-عۇرىپتان باستاۋ الادى. ۇلتتىق كيىمنىڭ ءوزى – ۇلت مادەنيەتىنىڭ جارقىن كورىنىسى. سوندىقتان ۇل-قىزدارىمىز ۇلتتىق كيىمدى ناۋرىز مەيرامىندا نە بولماسا باسقا مەرەكەلەردە ءجيى كيىپ جۇرسە، كەرەمەت بولار ەدى. تەك مەرەكەدە ەمەس، ۇدايى كيىپ جۇرسە دە، جاراسىمدى بولاتىنى ءسوزسىز. جالپى، ۇلت مادەنيەتى – حالىق ءومىرىنىڭ ايناسى، ونىڭ بولمىسى. ەلىمىزدىڭ رۋحاني دامۋى ۇلتتىق رۋحقا تىكەلەي بايلانىستى»، – دەدى مەملەكەت باسشىسى.
پرەزيدەنت قازىرگى جاھاندىق احۋالعا الاڭدايتىنىن ءبىلدىرىپ، قوعامدا مەيىرىمدىلىك، جاناشىرلىق، قامقورلىق سياقتى قاسيەتتەر جەتىسپەي جاتقانىنا نازار اۋداردى. ونىڭ ايتۋىنشا، ادامزات ءۇشىن وتە ءقاۋىپتى بۇل ءۇردىستى توقتاتۋعا ءبارىمىز كۇش سالۋىمىز كەرەك. ول ءۇشىن وسى اسىل قاسيەتتەردى ءارقايسىمىز جۇرەگىمىزدە ساقتاپ، ونى كۇندەلىكتى ىس-ارەكەتپەن، كوركەم مىنەزبەن كورسەتكەن ابزال.
مەملەكەت باسشىسى ءسوزىنىڭ سوڭىندا بارشا قازاقستان حالقىنا اماندىق، باق-بەرەكە تىلەدى.
«اقوردا» رەزيدەنسياسىندا مەملەكەت باسشىسىنىڭ اتىنان بەرىلگەن اۋىزاشارعا مەملەكەت جانە قوعام قايراتكەرلەرى، عالىمدار، دارىگەرلەر، مۇعالىمدەر، ەتنومادەني بىرلەستىكتەردىڭ وكىلى، ديپلوماتيالىق وكىلدىكتەردىڭ باسشىسى، مادەنيەت قايراتكەرلەرى، قۇتقارۋشىلار، ەڭبەك ادامدارى قاتىستى.
