قاسىم-جومارت توقايەۆ Instagram پاراقشاسىندا ۇستازدار مەن وقۋشىلاردى ءبىلىم كۇنىمەن قۇتتىقتادى، دەپ حابارلايدى Almaty-akshamy.kz.
پرەزيدەنت ءوز قۇتتىقتاۋىندا وسكەلەڭ ۇرپاق ەلىمىزدىڭ ەرتەڭى ەكەنىنە توقتالىپ، مەملەكەت جاس ورەندەردىڭ ساپالى ءبىلىم، تاعىلىمدى تاربيە الۋى ءۇشىن بارلىق جاعدايدى جاسايتىنىن اتاپ ءوتتى.
«قۇرمەتتى ۇستازدار مەن وقۋشىلار! سىزدەردى ءبىلىم كۇنىمەن شىن جۇرەكتەن قۇتتىقتايمىن!
بۇگىن جاڭا وقۋ جىلى باستالادى. رەسپۋبليكامىزداعى بارلىق مەكتەپ ميلليونداعان شاكىرتكە ەسىگىن ايقارا اشادى. وسكەلەڭ ۇرپاق – ەلىمىزدىڭ ەرتەڭى! مەملەكەت جاس ورەندەردىڭ ساپالى ءبىلىم، تاعىلىمدى تاربيە الۋى ءۇشىن بارلىق جاعدايدى جاسايدى.
«مەكتەپتىڭ جانى – ءمۇعالىم» دەپ احمەت بايتۇرسىن ۇلى ايتقانداي، ۇستازدىڭ بالا تاربيەسىندەگى ورنى ەرەكشە. ءار وقۋشىنىڭ تۇلعا بولىپ قالىپتاسۋىندا مۇعالىمدەر ماڭىزدى ءرول اتقارادى. سوندىقتان ءبىز پەداگوگتەردى ءاردايىم قولدايمىز. قازاقستاننىڭ بولاشاعى – ءبىلىمدى ۇرپاقتىڭ قولىندا! ولاردىڭ وقۋدا وزات بولىپ، قوعامنىڭ بارلىق سالاسىندا بيىك بەلەستەردى باعىندىرۋىنا تىلەكتەسپىن.
جاستارىمىز كەلەشەكتە وتانىمىزعا ادال قىزمەت ەتىپ، ونىڭ دامۋىنا ۇلەس قوساتىنىنا كامىل سەنەمىن. ءبىلىم كۇنى قۇتتى بولسىن!» دەلىنگەن جازبادا.