مەملەكەت باسشىسى تۇركىستان وبلىسىنىڭ اكىمى دارحان ساتىبالدىنى قابىلدادى

پرەزيدەنت اكىمنىڭ ەسەبىن تىڭدادى.

قاسىم-جومارت توقايەۆقا تۇركىستان وبلىسىندا بيىلعى 8 ايدا اتقارىلعان جۇمىستار تۋرالى ەسەپ بەرىلدى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.

دارحان ساتىبالدىنىڭ ايتۋىنشا، ەكونوميكانىڭ نەگىزگى كورسەتكىشى – جالپى وڭىرلىك ونەركاسىپ ءونىمىنىڭ كولەمى 534 ميلليارد تەڭگەگە جەتىپ، 2021 جىلدىڭ وسى كەزەڭىمەن سالىستىرعاندا 125 ميلليارد تەڭگەگە وسكەن.

وبلىستا جالپى قۇنى 12،7 ميلليارد تەڭگەنى قۇرايتىن 26 ينۆەستيسيالىق جوبا ىسكە قوسىلىپ، 936 جۇمىس ورنى اشىلعان. اۋىل شارۋاشىلىعى سالاسىندا 477 ميلليارد تەڭگەنىڭ ءونىمى ءوندىرىلىپ، بىلتىرمەن سالىستىرعاندا كورسەتكىش 4 پايىزعا ارتتى.

تۇركىستان اۋماعىندا ءبىرقاتار سۋ نىساندارىنا جوندەۋ جۇمىستارى جۇرگىزىلدى. جوسپارداعى شارالار ىسكە اسىرىلعاننان كەيىن اۋىل شارۋاشىلىعىنىڭ جالپى ءونىم كولەمى 1 تريلليون تەڭگەگە جەتتى.

سونداي-اق جىل باسىنان بەرى 486 مىڭ شارشى مەتر تۇرعىن ءۇي پايدالانۋعا بەرىلگەن. جىل سوڭىنا دەيىن جالپى 85 تۇرعىن ءۇيدىڭ قۇرىلىسىن اياقتاۋ جوسپارلانىپ وتىر.

وبلىس اكىمى بيۋدجەت ەسەبىنەن 59 مەكتەپتىڭ قۇرىلىسى جۇرگىزىلىپ جاتقانىن، ناتيجەسىندە بيىل 4 اپاتتى جانە 2 ءۇش اۋىسىمدى مەكتەپتىڭ ماسەلەسى شەشىلەتىنىن باياندادى. بۇدان بولەك، جەكە ينۆەستورلار 13 مەكتەپتى پايدالانۋعا بەردى.

قاسىم-جومارت توقايەۆ تۇركىستان وبلىسىندا قولعا الىنعان جوبالاردى جالعاستىرۋدى جانە حالىقپەن تىعىز جۇمىس ىستەۋ ماسەلەسىن كۇشەيتۋدى تاپسىردى.