مەملەكەت باسشىسى تامارا دۇيسەنوۆانى قابىلدادى

مەملەكەت باسشىسى قابىلدانعان شارالاردىڭ ماڭىزىن اتاپ ءوتىپ، اتالعان ۇسىنىستاردى قولدادى.

قاسىم-جومارت توقايەۆ پرەمەر-مينيستردىڭ ورىنباسارى تامارا دۇيسەنوۆانى قابىلدادى، دەپ حابارلايدى aqshamnews.kz اقورداعا سىلتەمە جاساپ.

تامارا دۇيسەنوۆا:

الەۋمەتتىك سالانى قارجىلاندىرۋدىڭ جاڭا ادىستەرىن تانىستىردى. اتالعان تاسىلدەر بولىنگەن قارجىنىڭ شىن مۇقتاج جاندارعا جەتۋىن، مەملەكەتتىك قولداۋ شارالارىنىڭ اشىقتىعىن، سونداي-اق بيۋدجەت قاراجاتىنىڭ ءتيىمدى جۇمسالۋىن قامتاماسىز ەتۋگە باعىتتالعان؛

وسى سالاعا 14،5 تريلليون تەڭگە بولىنگەنىن جەتكىزدى. بۇل جالپى مەملەكەتتىك بيۋدجەتتىڭ 60 پايىزىن قۇرايدى؛

وتباسىنىڭ سيفرلىق كارتاسى ارقىلى كورسەتىلەتىن قىزمەتتەر ازاماتتاردىڭ الەۋمەتتىك ساناتىنا قاراي دەربەس ۇسىنىلاتىنى تۋرالى باياندادى؛

بۇگىندە الەۋمەتتىك سالانى سيفرلاندىرۋدىڭ دەڭگەيى قىزمەت الۋشىلاردى جانە ولارعا كورسەتىلگەن قىزمەت كولەمىن انىقتاپ قانا قويماي، مەملەكەتتىك قولداۋ شارالارىنىڭ قۇرىلىمىنا تۇزەتۋ ەنگىزۋگە مۇمكىندىك بەرەتىنىن ايتتى. اۋىر تۇرمىستىق جاعدايداعى وتباسىلارعا ارنالعان ۇتىمدى ءارى ءتيىمدى كومەك شارالارى ازىرلەنەدى؛

ءبىلىم بەرۋ، مەديسينالىق كومەك ساپاسىن ارتتىرۋ جانە الەۋمەتتىك نىساندار قۇرىلىسى مەن اۋىل تۇرعىندارىن قولداۋ بويىنشا ۇكىمەت تاراپىنان قولعا الىنعان جوبالار جايىندا مالىمەت بەردى.

مەملەكەت باسشىسى قابىلدانعان شارالاردىڭ ماڭىزىن اتاپ ءوتىپ، اتالعان ۇسىنىستاردى قولدادى. سونداي-اق بۇعان دەيىن باستالعان جۇمىستاردى جۇيەلى تۇردە جالعاستىرۋدى تاپسىردى.