مەملەكەت باسشىسى سۋمەن قامتۋ نىسانىنىڭ قۇرىلىسىمەن تانىستى

پرەزيدەنت ءارقايسىسىنىڭ سىيىمدىلىعى 3000 تەكشە مەتر بولاتىن «بالقاش» تازا اۋىزسۋ ستانسياسىنىڭ ەكى رەزەرۆۋارىنىڭ جانە سورعى ستانسياسىنىڭ قۇرىلىسىمەن تانىستى.

قاسىم-جومارت توقايەۆقا «كاپتاج»، «باستاۋ» توعاندارىنان جانە «مەدەۋ» سۇزگى ستانسياسىنان كەلەتىن سۋدىڭ وسى رەزەرۆۋارلاردا جيناقتالىپ، زارارسىزداندىرىلاتىنى جونىندە مالىمەت بەرىلدى، دەپ حابارلايدى اlmaty-akshamy.kz.

تازالانعان اۋىزسۋ ارنايى ورناتىلعان سورعىلاردىڭ كومەگىمەن كامەنسكوە پلاتو، كولساي، يۋبيلەينىي جانە مۇزتاۋ ىقشاماۋداندارىنىڭ ماگيسترالدى جەلىلەرى ارقىلى تاراتىلادى.

نىساندى ارالاپ كورۋ بارىسىندا مەملەكەت باسشىسىنا الماتى قالاسىن سۋمەن قامتۋ جەلىسىنىڭ قازىرگى جاي-كۇيى مەن دامۋ جوسپارى تۋرالى باياندالدى.

پرەزيدەنتتىڭ تاپسىرمالارىن ورىنداۋ اياسىندا قالا اكىمدىگى بىلتىر جاڭادان 117 شاقىرىم سۋمەن قامتۋ جەلىسىن سالىپ، 46 شاقىرىم سۋ قۇبىرىن جاڭعىرتۋ جۇمىستارىن جۇرگىزگەن. اتالعان شارالار الماتى حالقىنىڭ 99،3 پايىزىن سۋمەن قامتيتىن ورتالىق جەلىگە قوسۋعا مۇمكىندىك بەردى. بيىل تاعى 142 شاقىرىم سۋ قۇبىرىن تارتىپ، 48 شاقىرىم جەلىگە جوندەۋ جۇمىستارىن جۇرگىزۋ جوسپارلانىپ وتىر. بۇل جىل سوڭىنا دەيىن تۇرعىنداردىڭ 99،6 پايىزىنا سۋ جەتكىزىپ، جەلىلەردىڭ توزۋ دەڭگەيىن 53،8 پايىزعا دەيىن تومەندەتۋگە سەپتىگىن تيگىزەدى.

قاسىم-جومارت توقايەۆقا مەدەۋ اۋدانىنىڭ 50 مىڭ تۇرعىنىن سۋمەن قامتۋدىڭ قوسالقى سحەماسىن ىسكە قوسۋ جوسپارى جونىندە مالىمەت بەرىلدى. ال الاتاۋ، بوستاندىق جانە ناۋرىزباي اۋداندارىنىڭ حالقىن سۋمەن تۇراقتى ءارى ساپالى تۇردە قامتاماسىز ەتۋ ءۇشىن ەكى توعان سالىنىپ جاتىر جانە تاعى ەكەۋىنىڭ جوبالاۋ جۇمىستارى جۇرگىزىلۋدە.