پرەزيدەنتكە ءوڭىردىڭ الەۋمەتتىك-ەكونوميكالىق دامۋى جانە بۇعان دەيىن بەرىلگەن تاپسىرمالارىنىڭ ورىندالۋ بارىسى باياندالدى.
وبلىس اكىمى وتكەن جىلدىڭ قورىتىندىسى بويىنشا نەگىزگى سالالارعا تارتىلعان ينۆەستيسيا مەن ءوندىرىس كولەمىنىڭ وسكەنىن اتاپ ءوتتى، دەپ حابارلايدى aqshamnews.kz.
جالپى كولەمى 400 مىڭ شارشى مەتردەن استام تۇرعىن ءۇي پايدالانۋعا بەرىلىپ، 46 جاڭا ءوندىرىس ورنى ىسكە قوسىلعان.
قاسىم-جومارت توقايەۆقا شاعىن جانە ورتا بيزنەستى قولداۋ شارالارى، ينفراقۇرىلىمدى جاڭعىرتۋ، جاڭا الەۋمەتتىك نىساندار سالۋ جايىندا اقپارات بەرىلدى. نۇرىمبەت ساقتاعانوۆتىڭ ايتۋىنشا، تۋريزم، سيفرلاندىرۋ سالالارىن، كولىك-لوگيستيكا سەكتورى مەن اگروونەركاسىپ كەشەنىن دامىتۋعا باسا نازار اۋدارىلادى.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 18 نىسان سالىنىپ، 6 مەديسينالىق مەكەمەگە كۇردەلى جوندەۋ جۇرگىزىلدى. «جايلى مەكتەپ» ۇلتتىق جوباسى بويىنشا 5 ءبىلىم وشاعى پايدالانۋعا بەرىلدى. وقۋشى ورىندارىنىڭ تاپشىلىعىن ازايتۋ ءۇشىن 7 مەكتەپ بوي كوتەرەدى.
مەملەكەت باسشىسىنا جۇمىسشى ماماندىقتارى جىلىنا وراي كاسىپورىنداردىڭ سۇرانىسى نەگىزىندە قۇرىلىس، اۋىل شارۋاشىلىعى، اۆياسيا، ەنەرگەتيكا جانە سۋ كولىگى سالالارى بويىنشا جاڭا ءبىلىم بەرۋ باعدارلامالارى اشىلاتىنى جونىندە ايتىلدى. ەڭبەككەرلەردى قولداۋ ماقساتىندا «وتباسى بانكىمەن» بىرلەسىپ، وڭىرلىك «شىعىس مامانى» جەڭىلدەتىلگەن يپوتەكالىق باعدارلاماسى ىسكە قوسىلدى.
وبلىس اكىمى ءوڭىر تۇرعىندارىن تولىعىمەن تازا اۋىز سۋمەن قامتاماسىز ەتۋ جونىندەگى مىندەت جىل سوڭىنا دەيىن ورىندالاتىنىن جەتكىزدى. بۇل باعىتتا قۇنى 14 ميلليارد تەڭگە بولاتىن 8 جوبا جۇزەگە اسىرىلادى.
الداعى ەكى جىلدا وڭىرگە كەمىندە 1،5 تريلليون تەڭگە ينۆەستيسيا تارتۋ، 700 مىڭ شارشى مەتردەن استام تۇرعىن ءۇي جانە 28 الەۋمەتتىك نىسان سالۋ، سونداي-اق ۇزىندىعى 600 شاقىرىمنان استام جولدى جوندەۋ جوسپارلانىپ وتىر.
پرەزيدەنت وبلىس ەكونوميكاسىن ءارتاراپتاندىرۋ، قايتا وڭدەلگەن ءونىم ەكسپورتىن كەڭەيتۋ جانە ينۆەستيسيا تارتۋ جۇمىستارىن كۇشەيتۋدى تاپسىردى. قاسىم-جومارت توقايەۆ وڭىردەگى ەكولوگيالىق ماسەلەلەردى شەشۋ جانە كولىك ينفراقۇرىلىمىن جاقسارتۋعا باسا ءمان بەرۋ كەرەك ەكەنىنە توقتالدى.