پرەزيدەنت قازاقستانعا رەسمي ساپارمەن كەلگەن شۆەيساريانىڭ فەدەرالدى كەڭەسشىسى، سىرتقى ىستەر ءمينيسترى ينياسيو كاسسيسپەن كەزدەسۋ وتكىزدى.
قاسىم-جومارت توقايەۆ ەكى ەل اراسىنداعى تىعىز قارىم-قاتىناس دوستىق پەن ىنتىماقتاستىق رۋحىندا دامىپ كەلە جاتقانىن اتاپ ءوتتى، دەپ حابارلايدى Almaty-akshamy.kz اقورداعا سىلتەمە جاساپ.
مەملەكەت باسشىسى شۆەيساريانىڭ الماتىداعى قۇرمەتتى كونسۋلدىعى قىزمەتىنىڭ باستالۋىمەن قۇتتىقتادى. ونىڭ رەسمي اشىلۋ راسىمىنە ينياسيو كاسسيس قاتىستى.
مەملەكەت باسشىسى شۆەيساريا قازاقستاننىڭ ەۋروپاداعى نەگىزگى ساياسي، ساۋدا جانە ەكونوميكالىق سەرىكتەستەرىنىڭ ءبىرى ەكەنىن ايتتى. قازىرگى ۋاقىتتا شۆەيساريا قازاقستاننىڭ جەتەكشى 20 ساۋدا سەرىكتەسىنىڭ قاتارىنا كىرەدى. ەلىمىزگە جالپى كولەمى 32،5 ميلليارد دوللاردان استام ينۆەستيسيا قۇيعان ءۇش ءىرى ينۆەستوردىڭ ءبىرى.
«ءبىز قازاقستان ەكونوميكاسىنىڭ پەرسپەكتيۆتى سالالارىنا ينۆەستيسيا قۇيۋعا دايىن جاڭا شۆەيساريالىق كومپانيالاردى قولدايمىز. قازاقستان ۇكىمەتى مەن Stadler تەمىرجول كونسەرنى اراسىندا قول قويىلعان كەلىسىمنىڭ كەلەشەگى زور دەپ ويلايمىن. سوندىقتان وسى مامىلەنىڭ جۇزەگە اسىرىلۋ بارىسىن ەرەكشە قاداعالايمىز. بۇل ءبىزدىڭ قارىم-قاتىناسىمىزدىڭ دامۋىنا تىڭ سەرپىن بەرەدى»، – دەدى قاسىم-جومارت توقايەۆ.
مەملەكەت باسشىسى شۆەيساريا كونفەدەراسياسىنىڭ پرەزيدەنتى الەن بەرسەگە ىزگى تىلەگىن جولدادى.
ينياسيو كاسسيس ەكىجاقتى ىنتىماقتاستىقتىڭ قازىرگى دامۋ دەڭگەيىنە وڭ باعا بەرىپ، ونى نىعايتۋ ىسىنە اتسالىسۋعا دايىن ەكەنىن جەتكىزدى. شۆەيساريانىڭ سىرتقى ىستەر ءمينيسترى ەلىمىزدە جۇرگىزىلىپ جاتقان اۋقىمدى رەفورمالاردى جوعارى باعالادى.
«ەكىجاقتى ساۋدا مەن ينۆەستيسيا تىعىز بايلانىستارىمىزدىڭ ماڭىزدى باعىتى سانالادى. ءوزىڭىز ايتقانداي، ەگەر شۆەيساريانىڭ جەكە كومپانيالارى ءسىزدىڭ ەلىڭىزگە ينۆەستيسيا قۇيسا، بۇل رەفورمالارىڭىزدىڭ تابىستى جۇزەگە اسۋىنا، سونداي-اق قارجى سالۋ ءۇشىن جاسالاتىن جاعدايدىڭ جاقسارۋىنا ىقپال ەتەدى»، – دەدى مينيستر.
اڭگىمەلەسۋ بارىسىندا وڭدەۋ ونەركاسىبى، ساۋدا جانە لوگيستيكا، ماشينا جاساۋ، اۋىل شارۋاشىلىعى، قارجى قىزمەتتەرى، سيفرلاندىرۋ، ءبىلىم بەرۋ سالالارىندا بىرلەسكەن ينۆەستيسيالىق جوبالاردى ىسكە اسىرۋعا ەرەكشە نازار اۋدارىلدى.
سونىمەن قاتار كەزدەسۋدە حالىقارالىق جانە وڭىرلىك كۇن تارتىبىندەگى وزەكتى ماسەلەلەر قاراستىرىلدى.