سەنات ءتوراعاسى ماۋلەن اشىمبايەۆ جاپونيا پارلامەنتىنىڭ قازاقستانمەن دوستىق ليگاسىنىڭ ءتوراعاسى توشياكي ەندو باستاعان جاپونيا پارلامەنتى دەپۋتاتتارىنىڭ دەلەگاسياسىمەن كەزدەستى، دەپ حابارلايدى Almaty-akshamy.kz پالاتانىڭ باسپا ءسوز قىزمەتىنە سىلتەمە جاساپ.
كەزدەسۋدە تاراپتار پارلامەنتارالىق ىنتىماقتاستىقتى ودان ءارى نىعايتۋ ماسەلەلەرىن تالقىلادى. ءوز سوزىندە ماۋلەن اشىمبايەۆ جاپونيا قازاقستاننىڭ ازيا-تىنىق مۇحيتى وڭىرىندەگى ماڭىزدى ساياسي جانە ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى.
سونداي-اق، سپيكەر جاپونيا پارلامەنتىنىڭ قازاقستانمەن دوستىق ليگاسىنىڭ جۇمىسىن جوعارى باعالاپ، پارلامەنتارالىق ىنتىماقتاستىقتى حالىقارالىق ۇيىمدار اياسىندا دا ارتتىرۋدىڭ ماڭىزدى ەكەنىن تىلگە تيەك ەتتى.
سۇحبات بارىسىندا ساۋدا-ەكونوميكالىق جانە ينۆەستيسيالىق ىنتىماقتاستىق ماسەلەلەرى دە ءسوز بولدى. ودان بولەك، تاراپتار دەكاربونيزاسيا، سيفرلاندىرۋ، سيرەك مەتالداردى ءوندىرۋ، اۋىل شارۋاشىلىعى، لوگيستيكا سياقتى سالالاردا بىرلەسكەن جوبالاردى ىسكە اسىرۋعا مۇددەلىلىك تانىتتى.
سەنات سپيكەرى ەلىمىزدە مەملەكەت باسشىسىنىڭ باستاماسىمەن ىسكە اسىرىلىپ جاتقان رەفورمالاردىڭ ماڭىزىنا دا توقتالىپ ءوتتى.
سونىمەن قاتار، ماۋلەن اشىمبايەۆ الەمدىك جانە ءداستۇرلى دىندەر ليدەرلەرى سەزىنىڭ قىزمەتىنە نازار اۋدارىپ، ءدىني فورۋمعا كورسەتكەن قولداۋى مەن وعان بەلسەنە قاتىسىپ كەلە جاتقانى ءۇشىن جاپون تاراپىنا العىس ءبىلدىردى.
ءوز كەزەگىندە توشياكي ەندو قازاقستاندا جۇرگىزىلىپ جاتقان ساياسي وزگەرىستەردىڭ تيىمدىلىگىن جانە جان-جاقتى ءوزارا ءىس-قيمىلدى ارتتىرۋدىڭ ماڭىزدى ەكەنىن ايتتى.