پرەزيدەنتكە شوقان ءۋاليحانوۆتىڭ ءومىرى مەن ەڭبەك جولى، اسكەري قىزمەتى، تاريحي-ەتنوگرافيالىق، گەورافيالىق زەرتتەۋلەرى جانە عۇمىرىنىڭ سوڭعى كەزەڭى تۋرالى تاريحي دەرەكتەر مەن جادىگەرلەر تانىستىرىلدى، دەپ حابارلايدى almaty-akshamy.kz.
قاسىم-جومارت توقايەۆ شوقان ءۋاليحانوۆ جايلى جازىلعان ەڭبەكتەردىڭ ءبارىن وقىپ شىققانىن ەسكە سالىپ، ونىڭ زەرتتەۋ جۇمىستارىمەن تانىس ەكەنىن ايتتى. سونىمەن قاتار پرەزيدەنت مۋزەيدەگى جادىگەرلەردى ءالى دە تولىقتىرا ءتۇسۋ كەرەك ەكەنىنە نازار اۋداردى.
پرەزيدەنت قۇرمەتتى قوناقتار كىتابىنا قولتاڭباسىن قالدىرىپ، مۋزەي قىزمەتكەرلەرىمەن اڭگىمەلەستى.
بىلتىر مەملەكەت باسشىسىنىڭ تاپسىرماسى بويىنشا مۋزەيگە جانە وسى مادەني-تۋريستىك نىسانعا باراتىن جولعا جوندەۋ جۇمىستارى جۇرگىزىلگەن بولاتىن.
سونىمەن قاتار، پرەزيدەنت جەتىسۋ وبلىسىنىڭ تۋريستىك الەۋەتىمەن تانىستى
مەملەكەت باسشىسىنا شوقان ءۋاليحانوۆ اتىنداعى «التىنەمەل» مەموريالدىق مۋزەيىندە جەتىسۋ وبلىسىنىڭ تۋريزم سالاسىن دامىتۋ ءۇشىن اتقارىلىپ جاتقان جۇمىستار جونىندە قىسقاشا مالىمەت بەرىلدى.
وبلىس اكىمىنىڭ ورىنباسارى رۋستام ءاليدىڭ ايتۋىنشا:
▪️تۋريزم سالاسىنىڭ دامۋىنا قاتىستى نەگىزگى كورسەتكىشتەردە ءوسىم بايقالادى. سوڭعى ءۇش جىلدا وڭىرگە كەلگەن تۋريستەر سانى ەكى ەسە ارتقان. ال وسى سالاداعى كورسەتىلەتىن قىزمەتتەر كولەمى 16 ميلليارد تەڭگەگە دەيىن ءوستى. اتالعان باعىتتىڭ دامۋىنا تىڭ سەرپىن بەرۋ ءۇشىن ءبىرقاتار ينفراقۇرىلىمدىق جوبا جۇزەگە اسىرىلىپ جاتىر؛
▪️ءقازىر الاكولگە كولىكتىڭ بىرنەشە تۇرىمەن جەتۋگە بولادى؛
▪️بىلتىر ءۇشارال اۋەجايىنىڭ ۇشۋ-قونۋ جولاعىنا رەكونسترۋكسيا جاسالىپ، تۇراقتى اۋە قاتىناسى جولعا قويىلعان؛
▪️بيىل «استانا – دوستىق» باعىتى بويىنشا «تالگو» پويىزى ىسكە قوسىلدى جانە «ءۇشارال – دوستىق» اۆتوجولىنىڭ رەكونسترۋكسياسى اياقتالدى؛
▪️قازىرگى كەزدە «تالدىقورعان – قالباتاۋ – وسكەمەن» اۆتوجولىن قايتا جوندەۋ، الاكول كۋرورتتىق ايماعىندا جوعارى ۆولتتى ەلەكتر جەلىلەرىن تارتۋ جۇمىستارى جۇرگىزىلىپ جاتىر؛
▪️«بالقاش» تۋريستىك-رەكرەاسيالىق ايماعىنىڭ باس جوسپارى» ازىرلەندى؛و
▪️ونىڭ اياسىندا ۇزىندىعى 16 شاقىرىم بولاتىن جاعالاۋعا بيۋدجەت ەسەبىنەن ينجەنەرلىك-كوممۋنيكاسيالىق جەلى تارتىلىپ، جالپى اۋماعى 860 گەكتار جەرگە 7 باعىتتاعى دەمالىس ايماقتارى ورنالاستىرىلادى؛
▪️جوسپار شەڭبەرىندە 30 ميلليارد تەڭگەگە دەيىن جەكە ينۆەستيسيا تارتۋ كوزدەلگەن؛
▪️كەلەسى جىلى كولگە اپاراتىن «الماتى – وسكەمەن – لەپسى – اقتوعاي» جولىنىڭ رەكونسترۋكسياسىن اياقتاۋ جوسپارلانىپ وتىر؛
«التىن-ەمەل»، «جوڭعار الاتاۋى» ۇلتتىق تابيعي پاركتەرىندە ەكولوگيالىق تۋريزمگە باسىمدىق بەرىلەدى. بيىل «Altynemel» ۆيزيت-ورتالىعى اشىلدى. ال «جوڭعار الاتاۋى» ۇلتتىق پاركىنىڭ اۋماعىندا جالپى قۇنى 1،7 ميلليارد تەڭگە بولاتىن 8 ينۆەستيسيالىق جوبا جۇزەگە اسىرىلماق؛
تەكەلى ماڭايىندا شاڭعى-بياتلون كەشەنىن سالۋ جانە بۇرقانبۇلاق سارقىراماسىنا دەيىنگى جولدى جوندەۋ جۇمىستارى جوسپارلانعان.
پرەزيدەنت وبلىس ورتالىعىنداعى دراما تەاترىنا ەسىمى بەرىلگەن قازاق سسر حالىق ءارتىسى بيكەن ريموۆانىڭ بيۋستىنە گۇل شوعىن قويدى. بۇدان كەيىن مەملەكەت باسشىسى تەاتر عيماراتىن ارالاپ كورىپ، تالدىقورعان دراما تەاترىندا جەتىسۋ وبلىسىنىڭ زيالى قاۋىم وكىلدەرىمەن كەزدەسىپ، پىكىر الماستى.
– بۇگىن، مىنە، حالقىمىزعا تانىمال اسا كورنەكتى اكتريسا بيكەن ريموۆا تەاترىندا كەزدەسىپ وتىرمىز. وتە قۋانىشتىمىن. شىن مانىندە، ءبىز وتكەن زاماننىڭ قايراتكەرلەرىنە، ولاردىڭ ەڭبەگىنە لايىقتى، ادىلەتتى باعا بەرۋىمىز كەرەك. بۇل ەلىمىزدىڭ بولاشاعى ءۇشىن، جاس ۇرپاققا دۇرىس جول كورسەتۋ ءۇشىن قاجەت، – دەدى پرەزيدەنت.
مەملەكەت باسشىسى وبلىس زيالىلارىنا جاستار تاربيەسى مەن ايماقتىڭ كەلەشەگى تۋرالى ويىن ايتتى.
– ءبىز ەلىمىزدىڭ بولاشاعى قانداي باعىتتا داميتىنىن ويلاساق، ەڭ الدىمەن، جاستارىمىزعا كوڭىل ءبولۋىمىز كەرەك. ەلىمىزدىڭ بولاشاعى جاستاردىڭ قولىندا. قاي جەرگە بارسام دا، ۇنەمى ايتىپ ءجۇرمىن. جاستارىمىزدى كوزى اشىق، كوكىرەگى وياۋ، ادال ازامات ەتىپ تاربيەلەۋىمىز قاجەت. بۇل – ەل دامۋىنىڭ ماڭىزدى ءبىر باعىتى. ال ەندى وبلىستىڭ دامۋىنا كەلەر بولساق، ءوڭىردىڭ الەۋەتى زور. دامۋ قارقىنى جاقسى، ءالى دە تۇيتكىلدى ماسەلەلەر بار. مەن وبلىستىڭ جاعدايىن جاقسى بىلەمىن. الداعى ۋاقىتتا دا نازار اۋدارامىز، – دەدى قاسىم-جومارت توقايەۆ.
كەزدەسۋگە قاتىسۋشىلار ەلىمىزدىڭ مادەنيەت سالاسىنا ەرەكشە كوڭىل ءبولىنىپ، مەملەكەتتىڭ قولداۋىن سەزىنىپ وتىرعانىن جەتكىزىپ، پرەزيدەنتكە العىس ايتتى. سونىمەن قاتار وبلىس اقساقالدارى كەشە رەسپۋبليكا كۇنىندە ءوزىڭىز كوتەرگەن كوك بايراعىمىز جىعىلماسىن دەگەن تىلەگىن ءبىلدىردى.