كەزدەسۋدە قاسىم-جومارت توقايەۆقا سەناتتىڭ قازىرگى قىزمەتى مەن الداعى جوسپارلارى تۋرالى مالىمەت بەرىلدى.
ماۋلەن اشىمبايەۆ ءۇشىنشى سەسسيا باستالعاننان بەرى پارلامەنتتىڭ 28 زاڭ قابىلداعانىن، ونىڭ بەسەۋىنە دەپۋتاتتاردىڭ باستاماشى بولعانىن جەتكىزدى، دەپ حابارلايدى aqshamnews.kz اقوردانىڭ رەسمي سايتىنا سىلتەمە جاساپ.
اتاپ ايتقاندا، پرەزيدەنت جولداۋلارى مەن تاپسىرمالارىن جۇزەگە اسىرۋ ماقساتىندا تۇرعىن ءۇي ساياساتىنا، ءبىلىم بەرۋ جانە بالالار قۇقىعىن قورعاۋعا، ءبىلىم سالاسىنداعى جيناقتاۋ جۇيەسىنە، بيرجا ساۋداسى مەن كاسىپكەرلىككە، سوت جۇيەسىن رەفورمالاۋ مەن ەسىرتكىنىڭ زاڭسىز اينالىمىنا قارسى كۇرەسكە قاتىستى زاڭدار قابىلدانعان.
ءقازىر پارلامەنتتە جۇمىسشىلاردىڭ ەڭبەك قۇقىقتارىن قورعاۋ، كرەاتيۆتى يندۋستريانى قولداۋ، ورمان شارۋاشىلىعى جانە ەرەكشە قورعالاتىن تابيعي اۋماقتار جونىندەگى زاڭ جوبالارى قارالىپ جاتىر. بۇل – سەناتورلاردىڭ باستاماسىمەن قولعا الىنعان قۇجاتتار.
سپيكەردىڭ ايتۋىنشا، جىل باسىنان بەرى سەناتتا 50-گە جۋىق ءىس-شارا وتكىزىلگەن، سەناتورلار ۇكىمەتكە 67 دەپۋتاتتىق ساۋال جولداعان. سونىمەن قاتار پارلامەنتارالىق ىنتىماقتاستىقتى كەڭەيتۋ اياسىندا 40-تان استام حالىقارالىق كەزدەسۋ ۇيىمداستىرىلعان.
ماۋلەن اشىمبايەۆ كەلەسى جىلى جوعارى پالاتادا بيۋدجەت، قۇرىلىس، سۋ، سالىق كودەكستەرى، «تۇركىستان قالاسىنىڭ ەرەكشە مارتەبەسى تۋرالى» جانە «تۇتىنۋشىلاردىڭ قۇقىعىن قورعاۋ تۋرالى» زاڭدار قارالاتىنىن ايتتى. سونداي-اق جۇمىسشى ماماندىقتارى جىلىنا ارنالعان پارلامەنتتىك تىڭداۋلار وتكىزۋ جوسپارلانىپ وتىر.
بۇدان بولەك، قاسىم-جومارت توقايەۆقا قازاقستاننىڭ ورنىقتى دامۋ سالاسىنداعى ۇلتتىق ماقساتتارى مەن مىندەتتەرىن ىسكە اسىرۋدى مونيتورينگتەۋ جونىندەگى پارلامەنتتىك كوميسسيانىڭ جۇمىسى تۋرالى اقپارات بەرىلدى. اتالعان كوميسسيا مەملەكەت باسشىسىنىڭ تاپسىرماسىمەن قۇرىلعان بولاتىن.
سەنات ءتوراعاسى پرەزيدەنتتىڭ وڭىرلەردى ودان ءارى دامىتۋ جونىندە جۇكتەگەن مىندەتتەرىن پالاتانىڭ باسىمدىق بەرەتىن باعىتتارىنىڭ ءبىرى ەكەنىن اتاپ ءوتتى. بۇل رەتتە سەنات ءماسليحاتتار دەپۋتاتتارىمەن جۇمىستى جانداندىرا تۇسكەن.
كەزدەسۋ سوڭىندا ماۋلەن اشىمبايەۆ قاسىم-جومارت توقايەۆقا الەمدىك جانە ءداستۇرلى دىندەر ليدەرلەرىنىڭ VIII سەزىنە دايىندىق بارىسىن باياندادى. اتالعان جيىن 2025 جىلدىڭ قىركۇيەك ايىنا جوسپارلانىپ وتىر.