مەملەكەت باسشىسى SINOPEC كومپانياسى ديرەكتورلار كەڭەسىنىڭ ءتوراعاسى ما يۋنشەندى قابىلدادى
اڭگىمەلەسۋ بارىسىندا ءوزارا ىنتىماقتاستىق جانە مۇناي-گاز حيمياسى مەن ەنەرگەتيكا سالالارىنداعى بىرلەسكەن ينۆەستيسيالىق جوبالاردى جۇزەگە اسىرۋ پەرسپەكتيۆالارى تالقىلاندى، دەپ حابارلايدى اlmaty-akshamy.kz.
قاسىم-جومارت توقايەۆ SINOPEC كومپانياسىنىڭ پوليەتيلەن ءوندىرىسى جوباسىنا تولىققاندى سەرىكتەس رەتىندە قاتىسۋى قازاقستاننىڭ اتالعان كاسىپورىنمەن ورنىقتى ىقپالداستىعىنىڭ ايقىن دالەلى ەكەنىن اتاپ ءوتتى. قازاقستان مۇناي-گاز حيمياسىنا قاتىستى الەمدىك دەڭگەيدەگى مۇنداي اۋقىمدى جوبانى بۇعان دەيىن جۇزەگە اسىرماعان. جوبانىڭ جالپى قۇنى – 7،7 ميلليارد دوللار.
– ءبىز كومپانيانىڭ قازاقستان مەن جۇڭگو اراسىنداعى ەكىجاقتى قارىم-قاتىناستى دامىتۋعا، سونداي-اق ەلىمىزدىڭ مۇناي-گاز سالاسىنا قوسقان ۇلەسىن جوعارى باعالايمىز. ءسىزدىڭ كاسىپورنىڭىزبەن ىنتىماقتاستىقتى نىعايتۋعا مۇددەلىمىز ءارى ءسىزدىڭ كومپانيانى قازاقستاننىڭ ستراتەگيالىق سەرىكتەسى دەپ سانايمىز، – دەدى مەملەكەت باسشىسى.
ءوز كەزەگىندە ما يۋنشەن مەملەكەت باسشىسىنا كومپانيانىڭ 2024 جىلدىڭ ەكىنشى جارتىسىندا زاۋىت قۇرىلىسىن باستاۋعا نيەتتەنىپ وتىرعانىن ايتتى. سونداي-اق اتىراۋ مۇناي وڭدەۋ زاۋىتىنىڭ بازاسىندا تاعى ءبىر ستراتەگيالىق جوبانى جۇزەگە اسىرۋ – تەرەفتال قىشقىلى مەن پوليەتيلەنتەرەفتالات ءوندىرىسى كەشەنىن سالۋ جوسپارىن جەتكىزدى.
– ءبىز وسى جوبانىنىڭ دامۋىنا ۇلەسىمىزدى قوسقىمىز كەلەدى. بۇل جوباعا ايرىقشا ءمان بەرەمىز، – دەدى ما يۋنشەن.
بۇدان بولەك، كەزدەسۋدە گەولوگيالىق بارلاۋ جانە جەر قويناۋىن پايدالانۋ، سونداي-اق اتالعان باعىتتا زاماناۋي تەحنولوگيالاردى قولدانۋعا قاتىستى ىنتىماقتاستىق ماسەلەلەرى قاراستىرىلدى.
مۇنان كەيىن مەملەكەت باسشىسى CITIC Group كومپانياسىنىڭ باسقارما ءتوراعاسى چجۋ حەسيندى قابىلدادى.
اڭگىمەلەسۋ بارىسىندا ەنەرگەتيكا، مۇناي حيمياسى ونەركاسىبى جانە باسقا دا ماڭىزدى سالالارداعى ءوزارا سەرىكتەستىكتى نىعايتۋ ماسەلەلەرى تالقىلاندى. پرەزيدەنتكە CITIC Group كومپانياسى مەن قازاقستاننىڭ بۇعان دەيىن قول جەتكىزگەن ۋاعدالاستىقتارىنىڭ جۇزەگە اسىرىلۋ بارىسى تۋرالى مالىمەت بەرىلدى.
– ءبىزدىڭ تۇراقتى كەزدەسۋلەرىمىز اراداعى ىنتىماقتاستىقتىڭ ستراتەگيالىق سيپاتىن بىلدىرەدى. بيىل مامىر ايىندا CITIC Construction كومپانياسى قازاقستاندىق سەرىكتەستەرىمەن جالپى ينۆەستيسيا كولەمى 2 ميلليارد دوللار بولاتىن جوبالاردى ىسكە اسىرۋ جونىندەگى 5 قۇجاتقا قول قويدى. ماڭىزدى جوبالاردىڭ ءبىرى – اقتاۋداعى Caspi Bitum زاۋىتىنىڭ مۇناي وڭدەۋ قۋاتىن جىلىنا 1،5 ميلليون تونناعا دەيىن جەتكىزۋ. ماعان «قازمۇنايگاز» بەن CITIC Group اراسىندا ءتيىستى كەلىسىمگە قول قويىلعانى جونىندە مالىمەت بەرىلدى. قۇرىلىس سالاسىندا مول تاجىريبەڭىز بار ەكەنىن ەسكەرسەك، بۇل جوبا ساپالى ءارى قىسقا مەرزىم ىشىندە جۇزەگە اسىرىلادى دەپ ويلايمىن، – دەدى مەملەكەت باسشىسى.
CITIC باسقارما ءتوراعاسى قازاقستان تاراپىمەن ءوزارا ءتيىمدى ىنتىماقتاستىقتى جوعارى باعالادى.
– ءبىزدىڭ سITIC كورپوراسياسى قازاقستاندا تابىستى جۇمىس ىستەپ جاتىر. ماعان جانە مەنىڭ ارىپتەستەرىمە بۇگىن سىزبەن جۇزدەسۋ – زور مارتەبە. ءبىزدىڭ قىزمەتىمىزدىڭ نەگىزگى ماقساتى – قازاقستانمەن اراداعى ىنتىماقتاستىقتى نىعايتۋ، – دەدى چجۋ حەسين.
بۇدان بولەك، كەزدەسۋ بارىسىندا ينۆەستيسيا جانە اگروونەركاسىپ كەشەنى سالالارىنداعى ىنتىماقتاستىق پەرسپەكتيۆالارى قاراستىرىلدى