قاسىم-جومارت توقايەۆ سي سزينپين مەن ونىڭ بارشا وتانداسىن «چۋنسزە» مەرەكەسىمەن قۇتتىقتاپ، جەدەلحات جولدادى.
پرەزيدەنت جاڭارۋ مەن بىرلىكتى، مەيىرىمدىلىك پەن جاسامپازدىقتى دارىپتەيتىن قاستەرلى مەيرامعا وراي جىلى لەبىزىن جەتكىزىپ، ەلىن بۇگىنگىدەن دە بيىك بەلەستەرگە جەتەلەۋدى كوزدەگەن قحر ءتوراعاسىنىڭ ستراتەگيالىق باستامالارى مەن يگى جوسپارلارىنا ساتتىلىك تىلەدى، دەپ حابارلايدى aqshamnews.kz.
– قازاقستان مەن قىتايدىڭ ماڭگى ءارى جان-جاقتى ستراتەگيالىق سەرىكتەستىگى كۇننەن-كۇنگە جاندانىپ، مىزعىماس دوستىق پەن ءوزارا ءتيىمدى ىقپالداستىقتىڭ ۇلگى تۇتارلىق كورىنىسىنە اينالعانىن زور ريزاشىلىقپەن اتاپ وتەمىن. بۇل يگى ىسكە ءسىزدىڭ قوسىپ وتىرعان ەرەكشە ۇلەسىڭىزدى جوعارى باعالايمىن جانە قىتايمەن سان قىرلى ىنتىماقتاستىعىمىزدى ودان ءارى نىعايتۋعا مۇددەلى ەكەنىمدى راستايمىن، – دەپ جازىلعان جەدەلحاتتا.