كودەكس ءماتىنى ب ا ق بەتتەرىندە جاريالانادى
مەملەكەت باسشىسى قاسىم-جومارت توقايەۆ قازاقستان رەسپۋبليكاسىنىڭ الەۋمەتتىك كودەكسىنە قول قويدى، دەپ حابارلايدى Almaty-akshamy.kz.
ق ر پارلامەنتىنىڭ سەناتى جاڭا قۇقىقتىق جۇيەنى قامتيتىن اتالعان زاڭ جوباسىن 2022 جىلدىڭ ناۋرىز ايىنىڭ ورتاسىندا قابىلداعان بولاتىن.
كودەكستە كەلەسى نەگىزگى باعىتتار قامتىلعان:
- ۇلتتىق دەموگرافيالىق ساياساتتىڭ فاكتورى رەتىندە انا مەن بالانى قولداۋدىڭ باسىمدىعى؛
- ەڭبەك نارىعىن دامىتۋ جانە جۇمىسپەن قامتۋعا جاردەمدەسۋدى ۇيىمداستىرۋدىڭ جاڭا تاسىلدەرى؛
- از قامتىلعان وتباسىلارعا ماتەريالدىق ءال-اۋقاتىن ارتتىرۋعا كومەكتەسۋ؛
- ارناۋلى الەۋمەتتىك قىزمەتتەر جۇيەسىن جەتىلدىرۋ؛
- مۇگەدەكتىگى بار ادامداردى الەۋمەتتىك قورعاۋ؛
- زەينەتاقىمەن قامسىزداندىرۋدى ودان ءارى جەتىلدىرۋ؛
- اسىراۋشىسىنان ايىرىلعان ادامداردى الەۋمەتتىك قولداۋ؛
- الەۋمەتتىك قامسىزداندىرۋدىڭ جەكەلەگەن نورمالارىن حالىقارالىق ستاندارتتار دەڭگەيىنە كەلتىرۋ؛
- وتباسىنىڭ سيفرلىق الەۋمەتتىك كارتاسى؛
- الەۋمەتتىك قىزمەتكەردىڭ كاسىبيلىگى مەن مارتەبەسىن ارتتىرۋ.
قابىلدانعان كودەكستىڭ ماقساتى - جۇمىسپەن قامتىلۋ مازمۇنىنا، ياعني پلاتفورمالىق جۇمىس پا، بىرلەسكەن جۇمىس (ءبىر جۇمىس ورنىندا ەكى جۇمىسشى) پا، جۇمىس كەستەسى وزگەرمەلى مە، جۇمىس اپتاسى ءتورت كۇندىك پە جانە باسقالارىنا قاراماستان بارلىق جۇمىسشىنىڭ ەڭبەك قۇقىقتارىن تەڭەستىرۋ. ول ءۇشىن زاڭناماعا جاڭا ۇعىم ەنگىزىلەدى: "تاۋەلسىز جۇمىسشى".
ياندەكس تاكسي، Glovo جانە ت.ب. بارلىق ونلاين-پلاتفورمالار جاريا تۇردە شارت جاساسۋعا مىندەتتەلەدى جانە وفەرتاعا قوسىلاتىن كەز كەلگەن تاكسي جۇرگىزۋشىسى نەمەسە كۋرەر وسىلايشا بارلىق الەۋمەتتىك جەڭىلدىكتەرمەن قامتىلعان دەپ ەسەپتەلەدى.
بۇل رەتتە بىرىكتىرىلگەن تولەمدى ەنگىزۋ ەسەبىنەن سالىقتاردى، زەينەتاقى جانە الەۋمەتتىك اۋدارىمداردى تولەۋدى بارىنشا جەڭىلدەتۋ جانە جالپى تابىسقا سالىناتىن سالىق جۇكتەمەسىن ازايتۋ ۇسىنىلادى. ال بۇرىنعى ءبىرىڭعاي جيىنتىق تولەم جويىلادى.
سونىمەن قاتار، 2024 جىلدان باستاپ قازاقستاندىقتار قوسىمشا زەينەتاقى تولەمىن الا الادى.