كەلەسى اۋقىمدى ءىس-شارا كۇزگە جوسپارلانعان
ساقتانساڭ ساقتايدى. بۇگىن الماتىدا دابىل قاعىلىپ، جالپىقالالىق سەيسموجاتتىعۋ ءوتتى. وندا قۇتقارۋشىلاردىڭ عانا ەمەس، جەرگىلىكتى تۇرعىنداردىڭ دا دايىندىعى سىنالدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ساعات 11:00-دە دابىل سوعىلىپ، قالاداعى جۇرت اڭ-تاڭ. مەكتەپ قاسىنداعى قۇرىلىسى بىتپەگەن نىساننان قويۋ كوك ءتۇتىن شىعىپ، ماڭىندا جەدەل جاردەم مەن ءورت سوندىرۋشىلەر ءجۇر. وقۋ-جاتتىعۋ بولعانىمەن بارلىق مامان بارىن سالدى. قارا تەرگە مالىنىپ، جەر سىلكىنىسى زاردابىمەن كۇرەسۋ جۇمىسىن پىسىقتادى.
سەيسموجاتتىعۋعا مەكتەپ وقۋشىلارى دا قاتىستى. جەتكىنشەكتەرگە اپات كەزىندە قالاي ساقتانۋ كەرەگى ايتىلىپ قانا قويماي، تاجىريبە جۇزىندە كورسەتىلدى. بارلىعى دالاعا شىعارىلىپ، اۆتوبۋسپەن ەۆاكۋاسيالاندى.
«جىلدىڭ سوڭىنا دەيىن الماتى قالاسىندا 7 باللدان جوعارى جەر سىلكىنىسى بولمايدى دەگەن بولجام بار. بۇل – جوسپارلى تۇردە ءوتىپ جاتقان سەيسموجاتتىعۋ. جالپى ماقساتى – الماتى قالاسى تۇرعىندارى مەن قوناقتارىنىڭ جەر سىلكىنىسى كەزىندەگى ءىس-قيمىلىن پىسىقتاۋ»، – دەدى توتەنشە جاعدايلار دەپارتامەنتى باستىعىنىڭ مىندەتىن اتقارۋشى ەرلان الىبەكوۆ
بۇگىنگىدەي جالپىقالالىق سەسموجاتتىعۋ ەندى 2 رەت وتكىزىلەتىن بولدى. كەلەسى وسىنداي اۋقىمدى ءىس-شارا كۇزگە جوسپارلانعان. الماتىداعى ءبىلىم مەن مەديسينا مەكەمەلەرىندە دە كىشىگىرىم وقۋ-جاتتىعۋلار جۇرگىزىلەدى. بيىل 3 مىڭعا جۋىق ءىس-شارا ۇيىمداستىرىلىپتى.