پوليسيامىز ءوز مىندەتىن جوعارى دەڭگەيدە اتقارۋدا.
قاسىم-جومارت توقايەۆ الدىمەن شۇعىل باسقارۋ ورتالىعىنىڭ عيماراتىنا بارىپ، ىشكى ىستەر مينيسترلىگىنىڭ احۋالدىق ساراپتامالىق ورتالىعىنىڭ جۇمىسىمەن تانىستى. بۇدان كەيىن پرەزيدەنتكە مينيسترلىكتىڭ سيفرلىق تەحنولوگيالارى كورسەتىلدى. مەملەكەت باسشىسى اتقارىلعان جۇمىستاردى ماقۇلدادى، دەپ حابارلايدى Almaty-akshamy.kz اقورداعا سىلتەمە جاساپ.
«بۇل جۇمىستار تەك باسى عانا دەپ ويلايمىن. سەبەبى بۇل سالانى تولىقتاي سيفرلاندىرۋ اسا قاجەت. جۇمىس اشىق ءارى، جاريالى تۇردە بولۋى كەرەك»، – دەدى مەملەكەت باسشىسى.
قاسىم-جومارت توقايەۆ سالتاناتتى جيىندا قازاقستان پوليسياسىن 30 جىلدىق مەرەيتويىمەن قۇتتىقتاپ، بۇل داتا تاۋەلسىزدىك تاريحىنداعى ايتۋلى بەلەس ەكەنىن اتاپ ءوتتى. پرەزيدەنتتىڭ پىكىرىنشە، قۇقىق قورعاۋ جۇيەسى – مەملەكەتتىگىمىزدىڭ بەرىك نەگىزى، ەلدەگى تۇراقتىلىقتىڭ باستى كەپىلى.
«زاڭنىڭ ورىندالۋىن قامتاماسىز ەتۋ، قوعامدىق ءتارتىپتى ساقتاۋ – جاۋاپكەرشىلىگى مول جۇمىس. وتكەن جىلداردا ىشكى ىستەر سالاسىنا اۋقىمدى ءارى جۇيەلى رەفورما جاسالدى. سونىڭ ناتيجەسىندە، پوليسيامىز ءوز مىندەتىن جوعارى دەڭگەيدە اتقارۋدا. تاۋەلسىزدىكتىڭ العاشقى كەزەڭىندە قۇقىق قورعاۋ جۇيەسى ءتۇرلى سىن-قاتەرمەن بەتپە-بەت كەلدى. وتپەلى كەزەڭدەگى احۋال قانداي كۇردەلى بولعانىن جاقسى بىلەسىزدەر. پوليسيا قىلمىسپەن تاباندى تۇردە كۇرەستى. سول ارقىلى بيزنەستىڭ قالىپتاسۋىنا جاعداي جاسالدى»، – دەدى مەملەكەت باسشىسى.
قاسىم-جومارت توقايەۆ سول كەزدەرى ازاماتتاردىڭ قاۋىپسىزدىگىن قامتاماسىز ەتۋ ايرىقشا ماڭىزدى بولعانىن جانە مۇنىڭ ءبارى كوزسىز ەرلىك پەن تىنىمسىز ەڭبەكتى تالاپ ەتكەنىنە توقتالدى. سونىمەن قاتار قيىن كەزدە انتقا ادال بولىپ، حالىققا قىزمەت ەتكەن بارشا پوليسيا ارداگەرىنە العىس ايتتى.
قازاقستان پرەزيدەنتى قۇقىق قورعاۋ قىزمەتكەرلەرىنە ايرىقشا مىندەت جۇكتەلگەنىن، ولاردىڭ ءارقاشان شيراق قيمىلداپ، باتىل ارەكەت جاساۋى كاسىبيلىكتىڭ بەلگىسى ەكەنىن اتاپ ءوتتى.
«بۇل، اسىرەسە، قاڭتار وقيعالارى كەزىندە انىق بايقالدى. ءتارتىپ ساقشىلارى وتانشىلدىقتىڭ شىنايى ۇلگىسىن كورسەتتى. دەگەنمەن، بەيقام وتىرۋعا بولمايدى. زامان كۇن سايىن وزگەرىپ جاتىر. جاڭا سىن-قاتەرلەر پايدا بولۋدا. ونىڭ ءبارى ىشكى ىستەر ورگاندارىنىڭ تۇبەگەيلى وزگەرۋىن تالاپ ەتەدى. ءبىز بولاشاققا نىق سەنىممەن قادام باسۋىمىز قاجەت. قۋاتتى مەملەكەت بولۋ ءۇشىن مىزعىماس تۇراقتىلىق، تەمىردەي ءتارتىپ ورناۋى كەرەك. بۇل – ەلىمىز ءۇشىن ستراتەگيالىق مىندەت. وتاندىق پوليسيا وسى مىندەتتى ابىرويمەن اتقاراتىنىنا مەن كامىل سەنەمىن»، – دەدى پرەزيدەنت.
مەملەكەت باسشىسى رەفەرەندۋم ارقىلى قابىلداعان كونستيتۋسياعا ەنگىزىلگەن تۇزەتۋلەر شىن مانىندە ەكىنشى رەسپۋبليكانىڭ قۇرىلۋىن جانە ەلىمىزدىڭ دامۋ پاراديگماسىنىڭ تۇبەگەيلى وزگەرۋىن بىلدىرەتىنىن ايتتى. پرەزيدەنتتىڭ پىكىرىنشە، بارلىق نەگىزگى بيلىك ينستيتۋتتارىن تەرەڭ جاڭارتۋ نەگىزىندە مەملەكەتتىك قۇرىلىستىڭ ساپالى جاڭا كەزەڭىنە كوشەمىز.
«ءبىز ازاماتتاردىڭ شەشىم قابىلداۋعا قاتىسۋىن ايتارلىقتاي كەڭەيتە وتىرىپ، مەملەكەت پەن قوعام اراسىنداعى قارىم-قاتىناستىڭ ءتيىمدى جانە تەڭگەرىمدى ۇلگىسىن قالىپتاستىرۋىمىز كەرەك. جوسپارلانعان رەفورمالاردىڭ نەگىزگى باعىتى – قۇقىق قورعاۋ جۇيەسىن دايەكتى تۇردە قايتا قۇرۋ. اۋقىمدى رەفورمالار جۇرگىزە وتىرىپ، مەملەكەتىمىزدىڭ السىرەۋىنە ەشقاشان جول بەرمەۋىمىز كەرەك. ءبىز بارلىق ىس-ارەكەتتەرىمىزدى باستى قۇندىلىعىمىز – تاۋەلسىزدىكپەن بايلانىستىرۋىمىز قاجەت»، – دەدى قاسىم-جومارت توقايەۆ.
مەملەكەت باسشىسى ەلدى پروگرەسسيۆتى دەموكراتيالاندىرۋ ۇدەرىسى، ازاماتتاردىڭ تابيعي تۇردە ارتىپ كەلە جاتقان ساياسي بەلسەندىلىگى تەك زاڭ شەڭبەرىندە ءجۇرۋى كەرەك ەكەنىن ايتتى. قاسىم-جومارت توقايەۆ جاڭا قازاقستاندى قۇرۋ بۇل ماڭىزدى ينستيتۋسيونالدىق وزگەرىستەر عانا ەمەس، سونىمەن بىرگە الەۋمەتتىك كوزقاراستار مەن مىنەز-قۇلىقتاردى جاڭعىرتۋ دەپ اتادى. ياعني جاڭارتىلعان قۇندىلىقتار مەن دۇنيەتانىم جۇيەمىزدىڭ باستى قاعيدالارىنىڭ ءبىرى – ادامنىڭ ار-نامىسى مەن قادىر-قاسيەتىن قۇرمەتتەۋ بولۋعا ءتيىس.
«تۇراقسىز، ءبىراق قارقىندى دامىپ كەلە جاتقان الەمدە زاڭدار مەن مورالدىق نورمالاردى قۇرمەتتەيتىن حالىق قانا كۇشتى جانە ەگەمەندى ەل مارتەبەسىن ساقتاي الادى. بۇگىنگى تاڭدا قوعامدا وتكەنىمىزگە ءتۇرلى، كەيدە ءبىرجاقتى باعا بەرىلىپ، ۇشقارى پكىرلەر ايتىلىپ ءجۇر. دەگەنمەن، تاۋەلسىزدىك كەزەڭىندەگى ايتۋلى جەتىستىكتەردى جوققا شىعارۋعا بولمايدى. تاريحىن، كوشباسشىلارىن جوققا شىعارعان حالىقتىڭ بولاشاعى جوق ەكەنىن ەستە ۇستاعان ءجون. سوندىقتان ازاماتتاردى وبەكتيۆتى ءارى دۇرىس كوزقاراستا بولۋعا شاقىرامىن»، – دەدى پرەزيدەنت.
قاسىم-جومارت توقايەۆ حالىقتىڭ ادىلدىك پەن مەملەكەتتىڭ تيىمدىلىگىنە دەگەن سەنىمى كوپ جاعدايدا قۇقىق قورعاۋ ورگاندارى قىزمەتكەرلەرىنىڭ كاسىبي شەبەرلىگى مەن ادامي قاسيەتتەرىنە بايلانىستى ەكەنىن ايتتى. قازاقستان پرەزيدەنتىنىڭ پىكىرىنشە، ءتۇرلى جاعدايدا ادامدارمەن تىكەلەي ارالاساتىن پوليسەيلەردىڭ ءارقايسىسى مەملەكەت تۋرالى تۇسىنىك قالىپتاستىرادى. بۇل قوعام الدىندا پوليسيا قىزمەتكەرىن بيلىكتىڭ ۋاكىلەتتى وكىلى دەپ بىلەتىن، اسىرەسە ۋچاسكەلىك پوليسيا قىزمەتكەرىن ءار ازاماتى تانيتىن اۋىلدىق جەردە ماڭىزدى.
«ازاماتتاردىڭ مەملەكەتتىك ساياساتقا، ەلىمىزدە جۇرگىزىلىپ جاتقان رەفورمالارعا كوزقاراسى ونىڭ ءسوزى مەن ىس-ارەكەتىنە تىكەلەي بايلانىستى. پوليسەيلەر مۇنى ەشقاشان ۇمىتپاۋى كەرەك. سىزدەرگە ەرەكشە جاۋاپكەرشىلىك جۇكتەلەدى. وكىنىشكە قاراي، ازاماتتاردىڭ قۇقىق قورعاۋ جۇيەسىنە دەگەن سەنىمى ءالى دە جوعارى دەڭگەيدە ەمەس. ادىلەتسىز جاعدايلار، پوليسەيلەردىڭ نەمقۇرايلىلىعى، كەيدە ولاردىڭ زاڭسىز ارەكەتتەرى ىشكى ىستەر مينيسترلىگىنىڭ بارلىق قۇرىلىمىنىڭ قىزمەتىنە سىزات تۇسىرەدى. جاعدايدى وزگەرتۋ ءۇشىن ءبىز قازاقستان پوليسياسىندا اۋقىمدى رەفورمالاردى باستادىق، بىرتىندەپ قىزمەت كورسەتۋ ۇلگىسىنە كوشەمىز. بۇگىنگى تاڭدا تەك قىلمىسپەن كۇرەسۋ ازدىق ەتەدى، ازاماتتاردىڭ قاۋىپسىزدىگىن قامتاماسىز ەتۋ، ەڭ باستىسى پوليسيانىڭ ادامدارعا بەيىمدەلۋى ماڭىزدى. مەنىڭ تاپسىرماممەن ىشكى ىستەر مينيسترلىگى بۇل باعىتتا ءبىرقاتار ماڭىزدى شارالاردى قولعا الدى. ءبىراق الدا ءالى جۇمىس كوپ»، – دەدى مەملەكەت باسشىسى.
قاسىم-جومارت توقايەۆ پوليسيانىڭ بيلىك پەن قوعام اراسىنداعى دانەكەر بولۋى وتە ماڭىزدى مىندەت ەكەنىنە توقتالىپ، ازاماتتارمەن قارىم-قاتىناستىڭ جاڭا مادەنيەتىن قالىپتاستىرۋ قاجەتتىگىن العا تارتتى.
«پوليسيا ءوز جۇمىسىن بارىنشا اشىق جۇرگىزىپ، حالىققا جاقىن بولۋعا ءتيىس. بيۋروكراتيادان ارىلاتىن ۋاقىت الدەقاشان جەتتى. بۇل ساياسي كەسەل حالىقپەن تىكەلەي جۇمىس ىستەۋگە كەدەرگى كەلتىرەدى. تۇرعىنداردىڭ ورىندى
سىن-ەسكەرتۋلەرىن دۇرىس قابىلداعان ءجون»، – دەپ تاپسىردى پرەزيدەنت.
مەملەكەت باسشىسى ءوز سوزىندە قوعامعا قارسى ىس-ارەكەت تۋعىزاتىن جاعدايلاردى تۇبىرىمەن جويۋ قاجەت ەكەنىنە توقتالىپ، جاعىمسىز الەۋمەتتىك فاكتورلاردىڭ ىقپالىن ازايتۋ كەرەك دەدى.
«اسىرەسە، زاڭدى بەلدەن باسۋعا بەيىم ادامداردىڭ ءتارتىپ بۇزۋىنا جول بەرۋگە بولمايدى. مۇنىڭ ءبارى ىشكى ىستەر مينيسترلىگى عانا اتقاراتىن جۇمىس ەمەس. بۇل – وزگە مەملەكەتتىك ورگاندارعا دا ورتاق مىندەت. بىزدە قۇقىق بۇزۋشىلىقتىڭ الدىن-الۋ جونىندەگى كوميسسيالار بار. رەسپۋبليكالىق جانە وڭىرلىك دەڭگەيدەگى وسىنداي كوميسسيالاردىڭ مۇمكىندىگىن تولىق پايدالانعان ءجون. اكىمدەر دە ايماقتىڭ تۇراقتىلىعى مەن تىنىشتىعىنا جاۋاپتى. ۇكىمەت ولاردىڭ وسى باعىتتاعى جۇمىسىنا قويىلاتىن تالاپتى قايتا قاراۋى قاجەت. ايماقتىڭ قاۋىپسىزدىگى – وتە ماڭىزدى»، – دەدى قاسىم-جومارت توقايەۆ.
پرەزيدەنت ەل ىشىنە ىرىتكى سالاتىن جات يدەولوگيالاردى تاعى ءبىر ماڭىزدى ماسەلە رەتىندە اتادى. اسىرەسە، الەۋمەتتىك جەلىدە جۇرتتى زاڭ بۇزۋعا يتەرمەلەيتىن اعىمداردىڭ وتە كوپتىگىنە نازار اۋدارىپ، ولاردىڭ جولىن كەسۋ ءۇشىن باسقا دا قۇزىرلى ورگاندارمەن بىرلەسىپ جۇمىس اتقارۋ كەرەك ەكەنىن اتاپ ءوتتى. سونىمەن قاتار قوعامدىق ۇيىمدارمەن تىعىز قارىم-قاتىناس ورناتقان ابزال ەكەنىن ەسكە سالدى.
مەملەكەت باسشىسى ازاماتتاردىڭ بارىنە تەڭ مۇمكىندىك بەرەتىن قوعام قۇرۋ، سونىڭ ىشىندە ايەلدەر مەن بالالاردىڭ قۇقىعىن قورعاۋ باستى مىندەت ەكەنىن اتاپ ءوتتى.
«تاعى ءبىر ماڭىزدى مىندەت – ايەلدەر مەن بالالاردى زورلىق-زومبىلىقتان قورعاۋ. مينيسترلىكتە وسىنداي ىستەردى تەرگەۋمەن اينالىساتىن ارناۋلى ءبولىم قايتا اشىلدى. مەنىڭ تاپسىرمام بويىنشا بيىل ايەلدەر مەن بالالارعا كەشەندى قولداۋ كورسەتەتىن ورتالىقتار قۇرىلدى. بۇل ورتالىقتار ءقازىر پيلوتتىق رەجيمدە جۇمىس جاساپ تۇر. وندا پسيحولوگيالىق، قۇقىقتىق جانە مەديسينالىق كومەك كورسەتىلەدى. سونداي-اق، ءتيىستى ساراپتامالار جاسالادى. ارنايى دايارلىقتان وتكەن تەرگەۋشى ايەلدەر زارداپ شەككەن جاندارعا جاردەم بەرەدى. جالپى، بۇل ورتالىقتار ءتيىمدى جۇمىس ىستەپ جاتىر. مۇنداي ورتالىقتاردى بۇكىل ەل اۋماعىندا اشىپ، اۋقىمىن كەڭەيتۋ كەرەك. ۇكىمەتكە جانە اكىمدەرگە وسى جۇمىستى قولعا الۋدى تاپسىرامىن»، – دەدى قاسىم-جومارت توقايەۆ.
قاسىم-جومارت توقايەۆ پوليسيا قىزمەتىنىڭ كوبىنەسە ادام ءومىرى مەن دەنساۋلىعىنا قاتەر توندىرەتىن ءقاۋىپتى ماماندىق ەكەنىن اتاپ ءوتىپ، تاۋەلسىزدىك جىلدارىندا قىزمەت بابىندا 815 قىزمەتكەردىڭ قازا تاپقانى، 4،5 مىڭنان استامى جاراقات العانى تۋرالى دەرەك كەلتىردى. سوندىقتان قوعامنىڭ قاۋىپسىزدىگى مەن تۇراقتىلىعىن قامتاماسىز ەتۋ ىسىندەگى ىشكى ىستەر ورگاندارىنىڭ ۇلەسىن باعالاماۋعا بولمايدى.
«ءبىز ءتارتىپ ساقشىلارىن قولداۋعا ءاردايىم ەرەكشە كوڭىل بولەمىز. كەيىنگى جىلدارى پوليسيا قىزمەتكەرلەرىنىڭ جالاقىسى بىرنەشە رەت ءوسىپ، تۇرعىن ءۇيدى جالعا الۋ قۇنىنا وتەماقى تولەۋ ەنگىزىلدى. سونىمەن قاتار اكىمدەرگە جەرگىلىكتى بيۋدجەت ەسەبىنەن قارجىلاندىرىلاتىن قىزمەتتەرگە 30 پايىزدىق ۇستەماقى بەلگىلەۋ قۇقىعى بەرىلدى. مەنىڭ تاپسىرماما سايكەس بيىلعى 1 قازاننان باستاپ جەدەل-ىزدەستىرۋ قىزمەتى قىزمەتكەرلەرىنىڭ ەڭبەكاقىسى كوتەرىلەدى. ءبىز پوليسيا قىزمەتكەرلەرىن قۇقىقتىق جانە الەۋمەتتىك تۇرعىدان قورعاۋدى جاقسارتۋ ءۇشىن كەشەندى شارالاردى جالعاستىرامىز»، – دەدى مەملەكەت باسشىسى.
پرەزيدەنت قۇقىق قورعاۋ ورگاندارىندا قىزمەت اتقارۋدىڭ جاستار ءۇشىن تارتىمدى ءارى مارتەبەلى بولۋى ماڭىزدى دەپ ەسەپتەيدى. ۇزدىك پوليسەيلەردى كوتەرمەلەپ، ەرەكشەلەپ، ماراپاتتاۋ ءىسىن قولدايتىنىن ءبىلدىردى. سونداي-اق قۇقىق قورعاۋ ورگاندارىنداعى قىزمەت تەك ارتىقشىلىق پەن ابىروي عانا ەمەس، حالىق الدىنداعى ۇلكەن جاۋاپكەرشىلىك ەكەنىن ءتۇسىنۋ كەرەك دەپ اتاپ ءوتتى. قاسىم-جومارت توقايەۆ ىشكى ىستەر مينيسترلىگى كادرلىق الەۋەتتى ۇدايى جەتىلدىرۋدى، قىزمەتكەرلەردىڭ كاسىبي بىلىكتىلىگىن جانە مورالدىق رۋحىن نىعايتۋدى قامتاماسىز ەتۋى قاجەت ەكەنىن ايتتى. قازاقستان پوليسياسىندا وتانسۇيگىشتىكتىڭ، اشىقتىقتىڭ، ءارقاشان ادامدارعا كومەككە كەلۋگە دايىن تۇراتىن ادالدىقتىڭ وبرازى قالىپتاسۋى كەرەك. بۇل بارلىق ءتارتىپ ساقشىلارىنىڭ ويلاۋ جۇيەسى مەن مىنەز-قۇلقىنا تۇبەگەيلى وزگەرىستەر ەنگىزۋدى تالاپ ەتەدى.
مەملەكەت باسشىسى سوڭعى كەزدەرى قۇقىق قورعاۋ ورگاندارىنىڭ قىزمەت بابىن اسىرا پايدالانۋىنا قاتىستى شاعىمداردىڭ جيىلەپ كەتكەنىن اتاپ ءوتتى. سونداي-اق مامىر ايىندا وتاندىق بيزنەس وكىلدەرىمەن كەزدەسۋىندە كاسىپكەرلەردىڭ كوپشىلىگى تىكەلەي قىسىم كورىپ جاتقانى تۋرالى شاعىمدانعانىن ايتتى.
پرەزيدەنت ەكونوميكالىق تەرگەۋ قىزمەتىنىڭ وڭىرلەردەگى جۇمىسىنا جاعىمسىز پىكىرلەر كوپتەپ ءتۇسىپ جاتقانىن ەرەكشە اتاپ ءوتتى. مەملەكەت باسشىنىڭ ايتۋىنشا، زاڭسىز ارەكەتتەردەن ىشكى ىستەر مينيسترلىگى قىزمەتكەرلەرى دە تىسقارى ەمەس. كەيبىرى جەمقورلىققا قاتىستى ايتىلىپ وتىر.
«بۇل بۇكىل قۇقىق قورعاۋ جۇيەسىنىڭ بەدەلىنە ايتارلىقتاي نۇقسان كەلتىرەدى. قارجى مونيتورينگى اگەنتتىگىنىڭ كۇشىن الاياقتىققا، قارجى پيراميدالارىنا، كاپيتال مەن رەسۋرستاردى شەتەلگە زاڭسىز شىعارۋ فاكتىلەرىنە باعىتتاۋ كەرەك. اگەنتتىك كولەڭكەلى ەكونوميكامەن كۇرەسەتىن نەگىزگى مەملەكەتتىك ورگانعا اينالۋعا ءتيىس. ءبىز قوعامدا جوعارى قۇقىقتىق مادەنيەت جانە سىبايلاس جەمقورلىق پەن زاڭسىزدىقتىڭ كەز كەلگەن كورىنىستەرىنە بەرىك يممۋنيتەت قالىپتاستىرۋىمىز كەرەك»، – قاسىم-جومارت توقايەۆ.
بەلسەندىلەر ساياسي پارتيالار مەن قوزعالىستار قۇرۋعا ىنتالى ەكەنىن مالىمدەپ، ىشكى جانە سىرتقى ساياساتتىڭ وزەكتى ماسەلەلەرى بويىنشا ءارتۇرلى پىكىرلەرى مەن كوزقاراستارىن بىلدىرەدى. بۇل – ازاماتتىق قوعامنىڭ جەتىلگەنىن كورسەتەتىن تابيعي پروسەسس. دەگەنمەن، پرەزيدەنتتىڭ پىكىرىنشە، ازاماتتىق بەلسەندىلەردىڭ بارلىق ارەكەتى، سونىڭ ىشىندە نارازىلىق اكسيالارى قولدانىستاعى زاڭناماعا جانە پاراساتتىلىققا قاتاڭ سايكەس كەلۋى وتە ماڭىزدى.
«زاڭدى بۇزۋعا، زاڭسىز ارەكەتتەرگە بارۋعا، سونىڭ ىشىندە پوليسيا قىزمەتكەرلەرىنىڭ ادامدىق قادىر-قاسيەتىنە، كاسىبي ار-نامىسىنا قارسى باعىتتالعان ارەكەتتەرگە باراتىندار زاڭنامامىزعا سايكەس جاۋاپكەرشىلىككە تارتىلادى. قازاقستاننىڭ ۇلتتىق مۇددەسىنە قارسى ارەكەت ەتەتىن كاسىبي ارانداتۋشىلار اشكەرەلەنۋى كەرەك»، – دەدى مەملەكەت باسشىسى.
قازاقستان پرەزيدەنتى تاعى ءبىر ماڭىزدى ماسەلە رەتىندە قازىرگى ۋاقىتتا قوعامدا بولىپ جاتقان قىزۋ پىكىرتالاستار كەزىندە ساياسي ادىلدىك ماسەلەسى تۋرالى ۇمىتپاۋ كەرەك ەكەنىن اتاپ ءوتتى.
«ەلىنىڭ دامۋىنا لايىقتى ۇلەس قوسقان قوعامدىق-ساياسي كوشباسشىلارىن، عىلىم جانە مادەنيەت قايراتكەرلەرىن ءقادىر تۇتپايتىن حالىقتىڭ كەلەشەگى دە بۇلىڭعىر بولماق. ءبىز، قازاق حالقى، ساياسي تۇلعالارىمىزدىڭ ەڭبەگىنە قۇرمەتپەن، پاراساتتىلىقپەن قاراۋىمىز قاجەت. بۇل – قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆتىڭ تۇلعاسىنا دا قاتىستى اقيقات. ونىڭ تاۋەلسىز ەلىمىزدى قۇرۋ ىسىنە سىڭىرگەن ەڭبەگىن بۇكىل الەم قاۋىمداستىعى مويىندادى. سوندىقتان تۇڭعىش پرەزيدەنتتىڭ تاريحي رولىنە قۇرمەتپەن قاراۋ – بارىمىزگە ورتاق مىندەت. ونىڭ ساياسي مۇراسىنا كەلەشەك ۇرپاق ادىلەتتى باعاسىن بەرمەك. ال، قازىرگى ۇرپاق وكىلدەرى ەلىمىز ءۇشىن تاباندى جۇمىس ىستەۋى كەرەك. ءبىز ءبارىمىز حالىق رەتىندە، ەڭ الدىمەن، ەڭبەكقور بولۋىمىز قاجەت. ساياسي ويىندارعا توسقاۋىل قويعان ءجون. ءبىز وتكەنگە جالتاقتاماي، جارقىن بولاشاعىمىزعا زور سەنىممەن قادام باسۋىمىز كەرەك»، – دەدى مەملەكەت باسشىسى.
قاسىم-جومارت توقايەۆ ءسوزىن قورىتىندىلاي كەلە، پوليسيانىڭ ۇستانىمىن وزگەرتىپ، جۇمىستىڭ جاڭا ۇلگىسىنە كوشۋدى باستى مىندەت رەتىندە اتادى. ونىڭ پىكىرىنشە، حالقىمىزدىڭ بەيبىت ءومىر ءسۇرىپ، ءوز ەلىنىڭ بولاشاعىنا سەنىممەن قاراۋى – پوليسەيلەردىڭ ادال قىزمەتىنە بايلانىستى.
جيىن سوڭىندا مەملەكەت باسشىسى سالانىڭ ءبىرقاتار قىزمەتكەرىنە مەملەكەتتىك ناگرادالار تاپسىردى.
