پرەزيدەنت قاسىم-جومارت توقايەۆقا قوردىڭ وسى ۋاقىتقا دەيىن اتقارعان قىزمەتى مەن الداعى كەزەڭگە ارنالعان مىندەتتەرى تۋرالى اقپارات بەرىلدى، دەپ حابارلايدى aqshamnews.kz اقوردانىڭ رەسمي سايتىنا سىلتەمە جاساپ.
بولات جامىشيەۆتىڭ ايتۋىنشا، «قازاقستان حالقىنا» قورى ءۇش جىلدا جالپى سوماسى 230 ميلليارد تەڭگە بولاتىن 103 قايىرىمدىلىق جوباسىن قارجىلاندىردى. ونىڭ ىشىندە 58 جوبا تولىعىمەن اياقتالدى. قوردىڭ قىزمەتى اشىقتىق، ەسەپتىلىك جانە تۇراقتىلىق قاعيداتتارىنا نەگىزدەلگەن. 2023 جىلدىڭ قورىتىندىسى بويىنشا Ernst&Young كومپانياسى سىرتقى اۋديت جۇرگىزدى.
مەملەكەت باسشىسىنا قوردىڭ دەنساۋلىق ساقتاۋ سالاسىنا، اتاپ ايتقاندا، اۋىر جانە سيرەك كەزدەسەتىن سىرقاتقا شالدىققان ناۋقاستاردى دارى-دارمەكپەن قامتاماسىز ەتۋگە ەرەكشە ءمان بەرەتىنى جونىندە باياندالدى. وسى ماقساتتا 461 ادامعا، سونىڭ ىشىندە 342 بالاعا 57،7 ميلليارد تەڭگە بولىنگەن. قاتەرلى ىسىككە دۋشار بولعان 1200-دەن استام ادامعا قۇنى 14،5 ميلليارد تەڭگە بولاتىن ارناۋلى پرەپاراتتار بەرىلگەن. بەس ونكولوگيالىق ورتالىق پەن بالالارعا قىزمەت كورسەتەتىن 22 نەيروحيرۋرگيا بولىمشەسىنە زاماناۋي قۇرال-جابدىقتار ساتىپ الىندى. بالالار مۇگەدەكتىگىنىڭ الدىن الۋعا ارنالعان 13 ەرتە ارالاسۋ ورتالىعىن اشۋ جوسپارلانعان بولاتىن. بۇگىندە وسى ماقساتتاعى 10 نىسان قىزمەت كورسەتە باستادى.
الەۋمەتتىك قولداۋ باعىتىندا اۋتيزم بەلگىلەرى بار بالالارعا ارنالعان 7 ورتالىق، سونداي-اق وڭىرلەردە 6 وڭالتۋ ورتالىعى پايدالانۋعا بەرىلدى. الداعى ۋاقىتتا تاعى 20 ورتالىق ىسكە قوسىلادى. 150 ادام يننوۆاسيالىق پروتەزبەن قامتىلدى.
تىرەك مەكتەپتەردىڭ الەۋەتىن دامىتۋ جوباسى اياسىندا 135 اۋىل مەكتەبى جاڭعىرتىلدى. الماتى وبلىسىنداعى 50 مەكتەپتە جانە قاراعاندى وبلىسىنداعى 86 ءبىلىم وشاعىندا فيزيكا، حيميا، بيولوگيا ساباقتارىنا ارنالعان زاماناۋي كابينەتتەر جابدىقتالدى. قوردىڭ ءبىلىم بەرۋ گرانتتارىنا 3 مىڭنان استام ستۋدەنت يە بولدى. اقتوبە وبلىسىندا 134 شاعىن جيناقتى مەكتەپتىڭ ماتەريالدىق-تەحنيكالىق بازاسى جاڭارىپ، سيفرلىق تەحنولوگيالار ارقىلى وقىتۋدىڭ ءتورت مودەلى ەنگىزىلدى.
مادەنيەت پەن سپورت سالاسىندا باتىس قازاقستان وبلىسىنىڭ كىتاپحانالارىن كوميۋنيتي ورتالىق رەتىندە قايتا قۇرۋ جانە 13 ءمودۋلدى سپورت زالىن سالۋ جۇمىستارى قولعا الىندى. ەلدى مەكەندەردەگى 100 بالالار سپورت زالى جابدىقتالدى.
بولات جامىشيەۆتىڭ ايتۋىنشا، قور تاسقىننان زارداپ شەككەن جاندارعا قولداۋ كورسەتىپ، بەس وبلىستاعى 627 ءۇيدىڭ قۇرىلىسىن قارجىلاندىردى.
«شاعىن قالالار – ۇلكەن مۇمكىندىكتەر» الەۋمەتتىك باستاماسى اياسىندا ءىرى كاسىپورىنداردىڭ جانە بيزنەستىڭ قولداۋىمەن مونوقالالاردىڭ ينفراقۇرىلىمىن جاقسارتۋ باعدارلاماسىن ازىرلەۋ جوسپارلانىپ وتىر.
قاسىم-جومارت توقايەۆ «قازاقستان حالقىنا» قورىنىڭ جۇمىسىن جوعارى باعالاپ، قايىرىمدىلىق شارالارىنىڭ قازاقستانداعى ازاماتتىق قوعامنىڭ دامۋى مەن الەۋمەتتىك تۇراقتىلىعىن نىعايتۋداعى ماڭىزىن اتاپ ءوتتى.