بۇگىن - ەلىمىزدە رەسپۋبليكا كۇنى.
اقوردانىڭ رەسمي سايتى پرەزيدەنت قۇتتىقتاۋىن جاريالادى، دەپ حابارلايدى Almaty-akshamy.kz.
قۇرمەتتى وتانداستار!
بارشاڭىزدى ۇلتتىق مەرەكەمىز – رەسپۋبليكا كۇنىمەن شىن جۇرەكتەن قۇتتىقتايمىن!
قازاقستاننىڭ تاريحي تاڭداۋىن ايقىنداعان ەگەمەندىك دەكلاراسياسى – ەلدىگىمىزدىڭ بەرىك تۇعىرى. وندا مەملەكەتىمىزدىڭ اۋماقتىق تۇتاستىعىنىڭ مىزعىماستىعى، حالقىمىزدىڭ جالپىۇلتتىق بىرەگەيلىگىن نىعايتۋعا ۇمتىلىسى جانە ازاماتتارىمىزدىڭ قۇقىقتارى مەن بوستاندىقتارىنا كەپىلدىك بەرىلەتىندىگى ناقتى كورىنىس تاپقان. وسى باستى قاعيداتتار كونستيتۋسيامىزدا، زاڭداردا جانە قازاقستاننىڭ ستراتەگيالىق باعىت-باعدارىن بەلگىلەيتىن باسقا دا قۇجاتتاردا كورسەتىلگەن.
رەسپۋبليكا كۇنى ىرىستى ىنتىماق پەن ءوزارا تىلەۋلeستىكتىڭ ارقاسىندا حالقىمىزدىڭ بارلىق سىن-قاتەردەن سۇرىنبەي ءوتىپ، ازاتتىققا جەتكەنىن ايگىلەيدى. ءبىز بابالار اماناتىنا ادال بولامىز. ەل بىرلىگىن ءاردايىم نىعايتا بەرەمىز. ەگەمەندىگىمىزدى ءقادىر تۇتىپ، كوزدىڭ قاراشىعىنداي ساقتايمىز.
حالقىمىز ءتاتۋ-تاتتى ءارى بەرەكەلى قوعام قۇرۋعا بار ەرىك-جىگەرىن جۇمسايدى، جاسامپاز ىسىمەن جاڭا بەلەستەردى باعىندىرادى. ءاربىر وتانداسىمىز ادال ازامات دەگەن اتقا لايىق بولىپ، ەلىمىزدى دامىتۋعا سالماقتى سوزىمەن، ونەگەلى ىسىمەن ۇلەس قوسادى.
ءبىز بىرگە ماقساتىمىزعا جەتەمىز – بارشاعا بىردەي مۇمكىندىك بەرەتىن ادىلەتتى قازاقستاندى قۇرامىز.
بايراعىمىز كوك اسپاندا اسقاق جەلبىرەسىن!
ۇلتتىڭ رۋحى قاشاندا بيىك بولسىن!
ەلىمىز وسىپ-وركەندەي بەرسىن!
سىزدەرگە زور دەنساۋلىق، باق-بەرەكە جانە تولاعاي تابىس تىلەيمىن!