جيىن بارىسىندا ۇلتتىق قاۋىپسىزدىك ستراتەگياسىن جۇزەگە اسىرۋعا باعىتتالعان نەگىزگى ادىس-تاسىلدەردى جانداندىرۋ ماسەلەلەرى قاراستىرىلدى.
مەملەكەت باسشىسى الەمدە قالىپتاسقان كۇردەلى گەوساياسي احۋال جاعدايىندا تالقىلانىپ وتىرعان پروبلەماتيكا قازاقستاننىڭ ەكونوميكالىق جانە اسكەري الەۋەتىن نىعايتۋ تۇرعىسىنان زور مانگە يە ەكەنىن اتاپ ءوتتى، دەپ حابارلايدى اlmaty-akshamy.kz.
پرەمەر-مينيستردىڭ ورىنباسارى — ۇلتتىق ەكونوميكا ءمينيسترى نۇرلان بايبازاروۆ بايانداما جاسادى.
سونىمەن قاتار ءبىرقاتار سالالىق مەملەكەتتىك ورگاننىڭ باسشىلارى مالىمەت بەردى.
قاسىم-جومارت توقايەۆ ۇلتتىق قاۋىپسىزدىككە ءقاۋىپ توندىرەتىن نەگىزگى سىن-قاتەرلەرگە وبەكتيۆتى تالداۋ جاساپ، ولاردىڭ الدىن الۋ شارالارىن ازىرلەۋ قاجەتتىگىن ايتتى.
پرەزيدەنت ازاماتتاردىڭ جانە تۇتاس مەملەكەتتىڭ قاۋىپسىزدىگى ۇكىمەت پەن بارلىق ۆەدومستۆو قىزمەتىنىڭ باسىم باعىتى رەتىندە ءاردايىم ەرەكشە نازاردا بولۋعا ءتيىس ەكەنىن اتاپ ءوتتى.
قاۋىپسىزدىك كەڭەسى وتىرىسىنىڭ قورىتىندىسى بويىنشا ۇلتتىق مۇددەنى قورعاۋ جانە ۇلتتىق قاۋىپسىزدىككە تونەتىن قاتەرلەردى باسقارۋ جۇيەسىنىڭ تيىمدىلىگىن ارتتىرۋعا باعىتتالعان ءبىرقاتار شەشىم قابىلداندى.