پرەزيدەنتكە قاراعاندى وبلىسىنىڭ 2023 جىلعى الەۋمەتتىك-ەكونوميكالىق دامۋ قورىتىندىسى تۋرالى ەسەپ بەرىلدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
قاسىم-جومارت توقايەۆقا بىلتىر 11 ايدىڭ ىشىندە وڭىردەگى ونەركاسىپ ءونىمىنىڭ كولەمى 3،1 تريلليون تەڭگەنى قۇراعانى جونىندە باياندالدى. نەگىزگى كاپيتالعا سالىنعان ينۆەستيسيا 16،3 پايىزعا ارتىپ، 727 ميلليارد تەڭگەگە جەتكەن.
وبلىس اكىمىنىڭ ايتۋىنشا، وڭدەۋ ونەركاسىبى سالالارىندا، اتاپ ايتقاندا، ماشينا جاساۋ ىسىندە 45 پايىز، جەڭىل ونەركاسىپتە 23،9 پايىز، فارماسيەۆتيكادا 20 پايىز وسىمگە قول جەتكىزىلگەن. سونىمەن قاتار قاعاز ونەركاسىبىندە، قۇرىلىس يندۋسترياسى مەن قارا مەتاللۋرگيادا ءوسىم بايقالادى.
شاعىن جانە ورتا بيزنەس سالاسىندا 100 مىڭنان استام كومپانيا قىزمەت ەتەدى جانە بۇل باعىتتا وڭىردەگى بەلسەندى حالىقتىڭ 45 پايىزى جۇمىس ىستەيدى. كاسىپكەرلەر ءۇشىن بولشەك سالىقتىڭ مولشەرى 4 پايىزدان 2 پايىزعا دەيىن تومەندەتىلدى. بيىل جالپى وڭىرلىك ونىمدەگى شاعىن جانە ورتا بيزنەستىڭ ۇلەسىن 19 پايىزدان 25 پايىزعا ارتتىرۋ جوسپارلانىپ وتىر.
وبلىس اكىمىنىڭ ايتۋىنشا، ەكونوميكانىڭ بارلىق سالاسىندا 25 مىڭنان استام جۇمىس ورنى اشىلىپ، جۇمىسسىزدىق دەڭگەيى 4،1 پايىزعا، كەدەيلىك دەڭگەيى 2،7 پايىزعا دەيىن تومەندەگەن. ال حالىقتىڭ ناقتى تابىسى 4،7 پايىزعا كوبەيگەن.
بۇدان بولەك، پرەزيدەنتكە جىلىتۋ ماۋسىمىنىڭ بارىسى، Qarmet كاسىپورنىنداعى قازىرگى جاعداي تۋرالى باياندالدى. مەملەكەت باسشىسىنا جاڭا ينۆەستوردىڭ ءوندىرىستى تۇراقتاندىرۋ جانە ونىڭ كولەمىن ارتتىرۋ باعىتىندا قابىلداپ جاتقان شارالارى، سونداي-اق ءوندىرىستى جاڭعىرتۋ جانە كومپانيا جۇمىسشىلارىنىڭ ەڭبەك قاۋىپسىزدىگىن قامتاماسىز ەتۋ جوسپارى جونىندە مالىمەت بەرىلدى.
الەۋمەتتىك سالا بويىنشا اۋىلدىق جەرلەردە 92 دەنساۋلىق ساقتاۋ نىسانىنىڭ قۇرىلىسى، ەكى اۋدانارالىق اۋرۋحانانى جاڭعىرتۋ جۇمىستارى باستالعان. بيىل «جايلى مەكتەپ» جوباسى اياسىندا وڭىردە 7100 ورىندىق 10 مەكتەپ پايدالانۋعا بەرىلمەك.
سونىمەن بىرگە ەرماعانبەت بولەكپايەۆ الەۋمەتتىك سالانىڭ جاي-كۇيى، «اۋىل – ەل بەسىگى» جانە «اۋىل اماناتى» جوبالارىنىڭ ىسكە اسىرىلۋى تۋرالى دا باياندادى.
كەزدەسۋ سوڭىندا قاسىم-جومارت توقايەۆ وبلىستى ودان ءارى دامىتۋ جانە تۇرعىنداردىڭ ءال-اۋقاتىن جاقسارتۋ جونىندە ءبىرقاتار تاپسىرما بەردى. سونداي-اق مەملەكەت باسشىسى Qarmet كومپانياسىنا قاراستى نىساندارداعى جاعدايدى ەرەكشە باقىلاۋعا الۋ قاجەت ەكەنىن اتاپ ءوتتى.