قاسىم-جومارت توقايەۆ الماتى قالاسىنداعى جاڭادان اشىلعان قاراعايلى ساياباعىن ارالاپ كوردى دەپ حابارلايدى Almaty-akshamy.kz
پرەزيدەنتكە الماتى قالاسىن كوركەيتۋگە باعىتتالعان الداعى جۇمىس جوسپارى مەن كوگالداندىرۋ ءىسىنىڭ اۋقىمى تۋرالى ەسەپ بەرىلدى. مەملەكەت باسشىسىنا «جاسىل الماتى» باعدارلاماسى اياسىندا قالا بويىنشا 3 جىلدا 1 ميلليون ءتۇپ كوشەت وتىرعىزۋ جوسپارلانعانى جونىندە باياندالدى. بيىل 350 مىڭ كوشەت ەگۋ جوسپارلانىپ وتىر. الداعى ۋاقىتتا ساياباقتىڭ اۋماعىن 63 گەكتارعا دەيىن كەڭەيتۋ كوزدەلىپ وتىر.
قاسىم-جومارت توقايەۆقا ىلە الاتاۋى تابيعي پاركى مەن الماتى قورىعى اۋماعىندا ساياحاتشىلار مەن الپينيستەردىڭ قاۋىپسىزدىگى مەن جايلى دەمالىسى ءۇشىن سالىنعان شاعىن ۇيلەر كورسەتىلدى. ولار جىلىتۋ پەشتەرىمەن جانە توتەنشە جاعدايدا قاجەتتى قۇتقارۋ قۇرالدارىمەن جابدىقتالعان.
سوڭىندا مەملەكەت باسشىسى قالا تۇرعىندارى مەن قوناقتاردىڭ جايلى دەمالۋىنا، قاۋىپسىزدىگىنە جانە قورشاعان ورتانىڭ تازالاعىنا باسا ءمان بەرىلگەن جۇمىستاردىڭ جالعاسا بەرەتىنىنە سەنىم ءبىلدىردى.
– مەن قازاقستان بويىنشا 2 ميلليارد ءتۇپ كوشەت وتىرعىزۋ باستاماسىن ۇسىندىم. ويتكەنى ءبىز، شىن مانىندە، كوگالداندىرۋعا ءزارۋمىز. الماتى بۇرىن جاسىل قالا ەدى. وكىنىشكە قاراي، قازىرگى كەزدە بۇل مارتەبەسىن جوعالتىپ الدى. ايىرىلىپ قالعان مارتەبەمىزدى قايتارۋىمىز كەرەك. اعاش ەگۋ – بيىك مادەنيەتتىلىكتىڭ بەلگىسى، – دەدى قاسىم-جومارت توقايەۆ.