قاسىم-جومارت توقايەۆ ايتقالي جاقۇتوۆ اتىنداعى ەكىنشى جىلۋ ەلەكتر ستانسياسىندا بولدى دەپ حابارلايدى almaty-akshamy.kz
پرەزيدەنت ستانسيا اۋماعىندا جاڭادان سالىناتىن قۋاتى 600 مۆت بولاتىن بۋ-گاز قوندىرعىسىنىڭ قۇرىلىسىنا دايىندىق جۇمىستارىمەن تانىستى.
«سامۇرىق-قازىنا» ءۇاق» اق باسقارما ءتوراعاسى الماسادام ساتقالييەۆ پرەزيدەنتكە قالالىق ەنەرگەتيكا كەشەنىن جاڭعىرتۋ ناتيجەسىندە اۋاعا تارايتىن زياندى قالدىقتار 2026 جىلعا قاراي جىلىنا 50،4 مىڭ توننادان 6،7 مىڭ تونناعا دەيىن ازاياتىنى تۋرالى مالىمەت بەردى.
سودان كەيىن ەنەرگيا كەشەنىنە اۋقىمدى جاڭعىرتۋ جۇمىستارىنىڭ باستالعانىن بىلدىرەتىن ەستەلىك كاپسۋلاسىن قويۋدىڭ سالتاناتتى ءراسىمى ءوتتى.
پرەزيدەنت شاراعا قاتىسۋشىلاردىڭ الدىندا سويلەگەن سوزىندە جاڭا قوندىرعىنىڭ قۇرىلىسى بۇكىل قالالىق ەنەرگەتيكا كەشەنىن جاڭعىرتۋ جۇمىستارىنىڭ باستالعانىن بىلدىرەتىنىن اتاپ ءوتتى.
– الداعى بەس جىلدا الماتى مەن الماتى اگلومەراسياسى تۇراقتى ەنەرگيامەن جانە جىلۋمەن قامتاماسىز ەتىلەدى. بەلگىلەنگەن جوسپاردى جۇزەگە اسىرۋ تۇرعىسىنان العاندا، مەملەكەت باسشىسىنىڭ ءوزى وسى كاپسۋلانى قالاپ، ءتيىستى جۇمىستاردى باستاپ بەرگەنى ۇلكەن جاۋاپكەرشىلىك جۇكتەيدى، – دەدى پرەزيدەنت.
وسىعان بايلانىستى مەملەكەت باسشىسى «سامۇرىق-قازىنا» قورىنىڭ ءتوراعاسى مەن قالا باسشىلىعىنا، سونداي-اق جەو قىزمەتكەرلەرىنە بارلىق جۇمىستى مەرزىمىندە جانە ساپالى ورىنداۋعا شاقىردى. سونىمەن قاتار اتالعان ءوڭىر ەلىمىزدىڭ نەگىزگى ەكونوميكالىق ورتالىقتارىنىڭ ءبىرى بولعاندىقتان، بۇل جۇمىستاردىڭ اسا ماڭىزدى ەكەنىن اتاپ ءوتتى.
– ەڭ باستىسى، ءبىز ەكولوگيانى جاقسارتىپ، تۇرعىنداردى تازا اۋامەن قامتاماسىز ەتەمىز. مەن ءۇشىن بۇل اسا ماڭىزدى. مەنىڭ تاپسىرمام بويىنشا ۇكىمەت قالانىڭ اۋاسىن تازارتۋ ءۇشىن قاجەتتى شارالاردى قابىلدايدى دەپ الماتىلىقتارعا ۋادە بەردىم. شىن مانىندە، بىرنەشە جىل بويى قالا تۇرعىندارى ەكولوگيانىڭ لاستانۋىنان زارداپ شەگىپ كەلدى. ءبىز بۇل ماسەلەنى تۇبەگەيلى شەشۋىمىز كەرەك، – دەدى قاسىم-جومارت توقايەۆ.