پرەزيدەنت جاتتىعۋ جۇيەلەرى، بيىككە ورمەلەۋ قابىرعالارى جانە وقۋ ورتالىعىنىڭ مۋلتيمەديالىق مىلتىق اتۋ پوليگونىن ارالادى.
مەملەكەت باسشىسى–قازاقستان قارۋلى كۇشتەرىنىڭ جوعارعى باس قولباسشىسى «قايسار-2021» وقۋ-جاتتىعۋىنا باردى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
قاسىم-جومارت توقايەۆ قازاقستان رەسپۋبليكاسى ىشكى ىستەر مينيسترلىگى ۇلتتىق ۇلان قۇرىلىمىنىڭ الماتى وبلىسىنداعى جاۋىنگەرلىك جانە ادىستەمەلىك دايىندىق ورتالىعىندا وتكەن «قايسار-2021» جەدەل-تاكتيكالىق وقۋ-جاتتىعۋلارىنا باردى.
مەملەكەت باسشىسىنا ارنايى جاساق قىزمەتكەرلەرىنىڭ قويان-قولتىق ۇرىسقا دايىندىعى كورسەتىلدى. پرەزيدەنت جاتتىعۋ جۇيەلەرى، بيىككە ورمەلەۋ قابىرعالارى جانە وقۋ ورتالىعىنىڭ مۋلتيمەديالىق مىلتىق اتۋ پوليگونىن ارالادى.
جوعارعى باس قولباسشى اسكەريلەر الدىندا سويلەگەن سوزىندە قازاقستاننىڭ مىقتى مەملەكەت بولىپ قالىپتاسۋىنا قۇقىق قورعاۋ ورگاندارى ەلەۋلى ۇلەس قوسىپ جاتقانىن اتاپ ءوتتى.
– سىزدەردىڭ قاجىرلى ەڭبەكتەرىڭىزدىڭ ارقاسىندا ەلىمىزدە قوعامدىق قاۋىپسىزدىك بەرىك ورنىقتى. قىلمىسپەن كۇرەسىپ، ازاماتتاردىڭ الاڭسىز تىرشىلىگىن قامتاماسىز ەتۋ – تاۋەكەلى كوپ جۇمىس. ءتارتىپ ساقشىسى كەز-كەلگەن ۋاقىتتا قاتەردىڭ بەتىن قايتارۋعا دايىن تۇرۋعا ءتيىس. بۇل زور جاۋاپكەرشىلىك پەن توزىمدىلىكتى تالاپ ەتەدى. پوليسيا قىزمەتكەرلەرى قاشاندا قىراعى ءارى شيراق بولۋى كەرەك. سوندىقتان، وسىنداي وقۋ-جاتتىعۋلار كاسىبي شەبەرلىكتى شىڭداۋ ءۇشىن وتە ماڭىزدى، – دەدى قاسىم-جومارت توقايەۆ.
پرەزيدەنت قۇقىق قورعاۋ ورگاندارىندا قىزمەت ەتۋ فيزيكالىق جانە پسيحولوگيالىق قىسىمعا ۇشىراتادى، ءتىپتى، كەيدە جەكە ومىرىنە دە ءقاۋىپتى ەكەنىنە توقتالدى.
– تاۋەلسىزدىك جىلدارىندا ىشكى ىستەر ورگاندارى مەن ۇلتتىق ۇلاننىڭ اسكەري قىزمەتشىلەرى قاتارىنان، بارلىعى 802 ازامات قىزمەتتىك مىندەتتەرىن ورىنداۋ بارىسىندا قازا تاپتى. ولار ءومىرىنىڭ سوڭىنا دەيىن انتىنا ادال بولدى. ەرلەردىڭ ەسىمى ماڭگى ۇمىتىلمايدى. جانقيارلىعى مەن باتىرلىعى ءۇشىن 1567 قىزمەتكەر وردەندەرمەن جانە مەدالدارمەن ماراپاتتالدى، – دەدى مەملەكەت باسشىسى.
جوعارعى باس قولباسشى قۇقىق قورعاۋ ورگاندارى سالاسىنداعى شتاتتىق قىزمەتكەرلەردىڭ الەۋمەتتىك جاعدايىن جاقسارتۋ ماسەلەسىنە توقتالدى.
– الداعى ءۇش جىلدا ىشكى ىستەر ورگاندارى قىزمەتكەرلەرىنىڭ لاۋزىمدىق ەڭبەكاقىسى ورتا ەسەپپەن 30 پايىزعا وسەدى. وسى ماقساتقا جۇمساۋعا 100 ميلليارد تەڭگەدەن استام قارجى قاراستىرىلعان. ۇلتتىق ۇلان ساربازدارىنىڭ ايلىق جالاقىسى بىرتىندەپ ءوسىپ كەلەدى. 2021-2023 جىلدارى وفيسەرلەردىڭ جالاقىسى 70 پايىزعا، كەلىسىمشارت بويىنشا قىزمەت ەتەتىن اسكەريلەردىڭ ەڭبەكاقىسى 60 پايىزعا جۋىق ارتادى. 2024 جىلدىڭ سوڭىنا دەيىن ارنايى كۇشتەردە قىزمەت ەتەتىندەر مەن كەلىسىمشارت بويىنشا قىزمەت ارتقارىپ جۇرگەندەردىڭ ءبارى وفيسەر شەنىن الادى. جىل سايىن تۇرعىن ۇيگە قوماقتى قاراجات جۇمسالىپ كەلەدى. قازىرگى كەزدە 24 مىڭ پوليسيا قىزمەتكەرى مەن 13،5 مىڭنان استام اسكەري قىزمەتشىگە تۇرعىن ءۇي تولەمدەرى بەرىلىپ تۇرادى. قوعامدىق ءتارتىپ پەن قاۋىپسىزدىكتى كۇزەتەتىن قىزمەتكەرلەرگە جان-جاقتى الەۋمەتتىك قولداۋ كورسەتۋ ءبىزدىڭ مەملەكەتىمىزدىڭ باسىمدىقتارىنىڭ ءبىرى بولىپ قالا بەرەدى، – دەدى قازاقستان پرەزيدەنتى.
قاسىم-جومارت توقايەۆ بۇگىنگى جەدەل-تاكتيكالىق جاتتىعۋلارعا باعا بەرە كەلە، ىشكى ىستەر مينيسترلىگى ءتۇرلى داعدارىستاردىڭ الدىن الۋعا جانە جولىن كەسۋگە تاس ءتۇيىن دايىن ەكەندەرىن كورسەتتى دەدى. مەملەكەت باسشىسى وسى جەتىستىكتەرمەن توقتاپ قالۋعا بولمايتىنىن، حالىقارالىق وزىق تاجىريبەنى مۇقيات زەردەلەپ، وتاندىق مامانداردى دايىنداۋ جۇيەسىن دايەكتى تۇردە جەتىلدىرۋ قاجەت ەكەنىنە توقتالدى.
– حالىقارالىق احۋالدىڭ شيەلەنىسۋى جاعدايىندا ءبىزدىڭ كۇشتىك قۇرىلىمدار مەيىلىنشە ۇتقىر بولۋعا ءتيىس. اۋعانستانداعى جاعدايعا بايلانىستى قوعامدا الاڭداۋشىلىق ارتىپ كەلە جاتقانىن كورىپ وتىرمىز. بۇل وقيعالار قازاقستانعا تىكەلەي ءقاۋىپ توندىرمەيدى. الايدا بەلگىلى ءبىر دارەجەدە قاتەرى بار. سوندىقتان ءبىز جاعدايدى مۇقيات باقىلاپ، كەز كەلگەن سىن-قاتەرگە لايىقتى جاۋاپ بەرۋگە دايىن بولۋىمىز كەرەك، – دەدى جوعارعى باس قولباسشى.
قاسىم-جومارت توقايەۆ كۇشتىك قۇرىلىمدار قىزمەتكەرلەرىنىڭ الدىندا سويلەگەن سوزىندە جاس ۇرپاقتىڭ سولارعا قاراپ بوي تۇزەيتىنىن ەسكەرتتى.
– بارشاڭىز ءتارتىپ ساقشىسى دەگەن ابىرويلى اتقا لايىق بولۋلارىڭىز كەرەك. سىزدەرگە بەرىلەتىن ەڭ جوعارى باعا – حالىقتىڭ سەنىمى مەن العىسى. ىشكى ىستەر ورگاندارىنىڭ قىزمەتكەرلەرى وسى سەنىمدى اقتايدى دەپ سەنەمىن، – دەدى مەملەكەت باسشىسى.
جوعارعى باس قولباسشىعا ىشكى ىستەر ءمينيسترى ەرلان تۇرعىمبايەۆ ۆەدومستۆو قىزمەتكەرلەرىنىڭ قوعامدىق قاۋىپسىزدىكتى قامتاماسىز ەتۋ بويىنشا تاپسىرمالاردى ورىنداۋعا دايىندىعى تۋرالى بايانداپ، ارنايى، اسكەري تەحنيكالار مەن قارۋ-جاراقتاردىڭ ۇلگىلەرىن كورسەتتى.